ភ្នំពេញ ៖ មានរឿងរ៉ាវទំនាស់ដីធ្លីមួយកន្លែង ខណៈម្ចាស់ដីស្របច្បាប់មានសំណុំឯកសារគ្រប់គ្រាន់ ស្រាប់តែនៅថ្ងៃចុះវាស់វែងក៏មានលេចមុខលោកឧកញ៉ាវ័យក្មេងម្នាក់ ឈ្មោះ ភិន ផល្លា អាយុជាង៣០ឆ្នាំ មកអះអាងថា ដីនេះជាដីរបស់ខ្លួនទើបនឹងទិញថ្មីៗហើយមិនទាន់ទាំងឲ្យលុយគេគ្រប់ផង។
ការចុះវាស់វែងដីធ្លីដើម្បីធ្វើកម្មសិទិ្ធខាងលើធ្វើឡើងកាលពីវេលារសៀលថ្ងៃទី២០ ខែកក្កដា ឆ្នាំ២០១៥ នៅចំណុចដីឡូត៍មួយកន្លែងស្ថិតនៅក្រុមទី២៤ភូមិ៧ សង្កាត់ទឹកល្អក់១ខណ្ឌទួល គោក ដែលមានលោកអនុប្រធានការិយាល័យភូមិបាលខណ្ឌទួលគោក និងអាជ្ញាធរខណ្ឌ សង្កាត់ពាក់ព័ន្ធជាច្រើនរូប។
ការចុះវាស់វែងនេះមានការចូលរួមពីលោក ឧកញ៉ា ភិនផល្លា និង លោក ស្រីឡេងពុំនិងក្រុមគ្រួសារផងដែរតែ លោកស្រីឡេង ពុំ មិនបានចុះហត្ថលេខាឬផ្តិតមេដៃចូលរួមលើកំណត់ហេតុរបស់អាជ្ញាធរទេ ដោយលោកស្រីអះអាងថា ខ្លាចមានការឃុបឃិត ក្លែងបន្លំនៅលើលិខិតដែលចូលរួមវាស់វែងនោះ។
បើតាមលោកស្រី ឡេង ពុំ ដែលជាម្ចាស់ដីស្របច្បាប់ បានអះអាងថា ដីនេះមានទំហំទទឹង១៧ម៉ែត្របណ្តោយ២៨ម៉ែត្រ គាត់បានកាន់កាប់តាំងពីឆ្នាំ១៩៩៧មកម្ល៉េះ ដែលម្ចាស់មុនបានទូទាត់កាត់ឈ្មោះផ្ទេរប្តូរមកឲ្យគាត់នៅឆ្នាំ២០០៣ ដែលមានអាជ្ញាធរខណ្ឌសម័យនោះដឹងឮនិងអាស្រ័យផលនៅលើដីនេះរហូតមក។ គាត់អះអាងថា ម្ចាស់ដីមុនបានរស់នៅលើដីនេះតាំងឆ្នាំ១៩៨៧ ដែលមិនមានអ្នកណាមកទាមទារអ្វីឡើយ ដោយភូមិ សង្កាត់ ខណ្ឌដឹងឮមានឯកសារផ្លូវច្បាប់គ្រប់គ្រាន់ ហើយដីនេះកាលពីជាង១០មុនជាដីបឹង ដែលគាត់ធ្វើផ្ទះជួលនិងចាក់ដីអស់រាប់ពាន់ឡាន ដើម្បីកុំឲ្យលិចលង់។
លោកស្រីបន្តថា សូម្បីតែបង់ពន្ធអាកររាល់ឆ្នាំលើដីនេះក៏គាត់បានបំពេញកាតព្វកិច្ចត្រឹមត្រូវតាមច្បាប់រដ្ឋកំណត់ មិនដែលមានអ្នកណាមកជំទាស់ឬមិនឲ្យគាត់បង់ពន្ធនោះទេ ហើយភូមិ សង្កាត់ក៏បានបញ្ជាក់ថា ដីនេះជាដីរបស់គាត់ស្របច្បាប់ត្រឹមត្រូវផងដែររួមនឹងលោកអភិបាលខណ្ឌទួលគោកមុន ក៏បានស៊ីញេកាត់ឈ្មោះទទួលស្គាល់ទាំងអស់។
បើតាមលោក ឧកញ៉ាវ័យក្មេង ភិន ផល្លា បញ្ជាក់ថា ដីនេះគាត់ទិញពីជនជាតិចិនឈ្មោះជិនយានមិង នៅពេលថ្មីៗនេះចំនួន៨ឡូត៍ស្មើនឹងជាង១ពាន់ម៉ែត្រការ៉េ ក្នុងតំលៃ១ការ៉េ៥៥០ដុល្លារ ដោយមិនទាន់ឲ្យលុយគេគ្រប់ផង។
បើតាមប្រភពព័ត៌មានឲ្យដឹងថា ដីនេះមានតែប្រជាជនខ្មែររស់នៅរហូតមក ដែលមានអាជ្ញាធរ ភូមិ សង្កាត់ ខណ្ឌទទួលស្គាល់ទាំងអស់ស្រាប់តែពេល អភិបាលខណ្ឌទួលគោកថ្មី លោក ឯក ឃុនដឿនមកកាន់តំណែង ក៏លេចចេញឯកសារថា ជាដីរបស់ជនជាតិចិន ហើយមានលោក ឧកញ៉ាវ័យក្មេង ភិន ផល្លា មកអះអាងថា ខ្លួនបានទិញពីជនជាតិចិនទៅវិញ។ អ្វីដែលហួសចិត្តនោះលោក ឧកញ៉ាភិន ផល្លា នោះបានអះអាងថា ដីខ្លួនទើបនឹងទិញថ្មីៗមាន៨ឡូត៍តែមិនដឹងដីនៅឯណាខ្លះ មិនដឹងគេសាងសង់របង មិនដឹងគេសាងសង់រោងឃ្លាំងអ្វីទាំងអស់ ព្រោះក្រៅពីដីរបស់លោក ស្រីឡេងពុំ ដី៧ឡូត៍ទៀតជារបស់លោក កែវសុខឃាង មេគយចល័តគេមានប័ណ្ណកម្មសិទ្ធិរួចរាល់អស់ហើយ តែលោក ឧកញ៉ា ភិនផល្លាមិនដឹងអ្វីទាំងអស់។
នៅក្នុងនោះសូម្បីតែមេភូមិ ជាម្ចាស់ទឹកដីដែលស្គាល់ទីតាំងដីច្បាស់ស្គាល់ម្ចាស់ដីស្របច្បាប់ គឺមិនត្រូវបានគេឲ្យចូលរួមវាស់វែងនោះទេ ព្រោះគាត់ជាឆ្អឹងទទឹង ក ក្នុងការរត់ការលេបយកដីនេះ។
គេឆ្ងល់ថាមានលុយរហូតបានងារជាឧកញ៉ា ហេតុអីសម័យនេះហើយមកទិញដីកណ្តាលក្រុងមិនដឹងជាន់លើដីគេមិនដឹងដីនៅកន្លែងណាខ្លះមិនដឹងគេសាងសង់លើដីរបស់ខ្លួនដូច្នេះ។ គេសង្ស័យថារឿងនេះហាក់ដូចជាមានការឃុបឃិតគ្នា (ធ្វើស៊ី )ពីសំណាក់លោក ចៅហ្វាយខណ្ឌថ្មី និងបក្ខពួកជាមួយ លោកឧកញ៉ាវ័យក្មេង ភិន ផល្លា និងមន្ត្រីសូរិយោដីម្នាក់ ឈ្មោះ ឈួន កុម្ភះ ដោយមិនខ្លាចធ្លាក់បុណ្យស័ក្តិទាំងអស់គ្នា ព្រោះខាងលោក ឧកញ៉ាមិនមានឯកសារអ្វីមកអំណះអំណាងឡើយ។
គេចាំមើលថា រឿងនេះនឹងក្លាយទៅជាយ៉ាងណា តើបុណ្យស័ក្តិលោកចៅហ្វាយខណ្ឌ លោកឧកញ៉ាបក្ខពួកដែលចង់រំលោភដីគេនោះនឹងរក្សាគង់វង្សដែរឬទេព្រោះមានឧកញ៉ាច្រើននាក់ហើយដែលមានរឿងខ្លះជាប់គុកខ្លះរត់ចោលស្រុកខ្លះលាលែងពីតំណែង។
ប្រជាពលរដ្ឋរងគ្រោះបានអំពាវនាវទៅថ្នាក់លើសុំជួយអន្តរាគមន៍រកយុត្តិធម៌ដល់ប្រជាពលរដ្ឋស្លូតត្រង់ផង បើពុំនោះទេច្បាស់ជាពួកគាត់ទឹកភ្នែកដោយសារឧកញ៉ានោះទៀតហើយ៕
លេចមុខឧកញ៉ាវ័យក្មេងម្នាក់ធ្វើនំអត់ម្សៅគាបសង្កត់ប្រជាពលរដ្ឋយកដី
0 Comments