ភ្នំពេញ ៖ ការស្នើនេះបានធ្វើឡើងនៅក្នុងជំនួបរវាងឯកឧត្តមឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា ជាមួយរដ្ឋមន្ត្រីការទេសនូវែលហ្សេឡង់ លោក ម៉ូរ៉ៃ ម៉ាគុលលី ( Murray Mc Cully។
លោក ជុំ សសុន្ទរី មន្ត្រីអ្នកនាំពាក្យក្រសួងការបរទេសកម្ពុជាបានថ្លែងប្រាប់អ្នកសារព័ត៌មានបន្ឬាប់ពីជំនួបកាលពីវេលាម៉ោង១១ និង៣០ នាទីមុននេះថា នៅក្នុងជំនួបនោះ ឯកឧត្តមឧបនាយករដ្ឋមន្ត្រី ហោ ណាំហុង បានជំរាបទៅភាគីរដ្ឋមន្ត្រីការបរទេសនូវែលហ្សេឡង់ថា គោលដៅសំខាន់របស់រាជរដ្ឋាភិបាលកម្ពុជា គឺការលើកកំពស់ជីវភាពប្រជាជនឲ្យបានកាន់តែល្អប្រសើឡើង ហើយរាជរដ្ឋាភិបាលបានសម្រេចគោលដៅសេដ្ឋកិច្ឋ៧ ភាគរយរយៈពេលជាងមួយទសវត្សកន្លងមកនេះ ធ្វើឲ្យកាត់បន្ថយនូវអត្រាភាពក្រីក្របានជាងមួយ១ ភាគរយក្នុងមួយឆ្នាំ ហើយនៅឆ្នាំ២០១៥ នេះសេដ្ឋកិច្ចកម្ពុជាមានកំណើន៧ ភាគរយ ហើយបើតាមការវាយតម្លៃរបស់ IMF បញ្ជាក់ថា សេដ្ឋកិច្ចកម្ពុជានឹងមានកំណើនជាង៧ ភាគរយសំរាប់រយៈពេល៥ ឆ្នាំតទៅមុខទៀត។
ជាមួយគ្នានោះរដ្ឋមន្ត្រីការបរទេសកម្ពុជា ក៏បានលើកឡើងពីបញ្ហាជាអាទីភាពចំនួន៤ ចំណុចនៃការអភិវឌ្ឍន៍សេដ្ឋកិច្ចនៅកម្ពុជា ទី១, ការអភិវឌ្ឍន៍ធនធានមនុស្ស ទី២, ខាងកសិកម្ម ទី៣, ផ្នែកហេដ្ឋារចនាសម្ព័ន្ធ និងទី៤, ផ្នែកថាមពល ហើយឯកឧត្តមឧបនាយករដ្ឋមន្ត្រី ក៏បានបញ្ជាក់ផងដែរថា អង្កររបស់កម្ពុជាជាប់ចំណាត់ថ្នាក់ជាអង្ករលេខ១ នៅលើពិភពលោកក្នុងរយៈកាល៣ ឆ្នាំជាប់ៗគ្នា ហើយមកដល់ពេលនេះកម្ពុជានៅសល់ស្រូវប្រមាណ៤,៥ លានតោនសំរាប់ការនាំចេញ ហើយសង្ឃឹមថា អនាគតកម្ពុជា នឹងអាចនាំចេញទៅលក់នៅប្រទេសញូហ្សេឡិន។
តាមលោក ជុំ សសុន្ទរី បានបញ្ជាក់ថា នៅក្នុងជំនួបនោះ ឯកឧត្តមឧបនាយករដ្ឋមន្ត្រី ក៏បានថ្លែងអំណរគុណដល់ញូហ្សេឡិន ដែលបានផ្តល់ជំនួយដល់កម្ពុជា ជាពិសេសលើការដោះមីន ការថែរក្សាប្រាសាទអង្គរវត្ត និងសាលាក្ដីខ្មែរក្រហមជាដើម។ ព្រមទាំងការផ្តល់អាហារូបករណ៍ដល់កម្ពុជា ដែលបានចូលរួមចំណែក ដ៏សំខាន់ក្នុងការអភិវឌ្ឍន៍ធនធានមនុស្ស ហើយកាលពីឆ្នាំ២០១៤ បានផ្តល់អាហារូបករណ៍ដល់កម្ពុជាចំនួន៥១ នាក់បានទៅសិក្សានៅប្រទេសញូហ្សេឡិន ហើយជាមួយគ្នានោះក៏បានស្នើឲ្យញូហ្សេឡិនផ្តល់អាហារូបករណ៍បន្ថែមទៀតដល់កម្ពុជា ក៏ដូចជាអ្នកការទូតវ័យក្មេងរបស់កម្ពុជា។
នៅក្នុងជំនួបនោះដែរ ឯកឧត្តមឧបនាយករដ្ឋមន្ត្រី ហោ ណាំហុង ក៏បានស្នើឲ្យញូហ្សេឡិន បង្កើនកិច្ចសហការគ្នាបន្ថែមទៀតលើវិស័យកសិកម្ម និងធុរកិច្ចរវាងប្រទេសទាំំងពីរ ហើយនៅក្នុងក្រមខ័ណ្ឌទំនាក់ទំនងអាស៊ាន និងញូហ្សេឡិន ឯកឧត្តមឧបនាយករដ្ឋមន្ត្រី ក៏បានលើកឡើងពីកិច្ចប្រជុំនៅកូឡាំពួរ ដែលបានសម្រេចលើកកំពស់ទំនាក់ទំនងរវាងអាស៊ាន និងញូហ្សេឡិន ពីដៃគូទូលំទូលាយ ទៅជាភាពជាដៃគូយុទ្ធសាស្ត្រ ដើម្បីដាក់ឲ្យថ្នាក់ដឹកនាំសំរេចនៅកិច្ចប្រជុំកំពូលអាស៊ានសំរេចនៅចុងឆ្នាំនេះ។
ជាមួយគ្នានោះឯកឧត្តមឧបនាយករដ្ឋមន្ត្រី ហោ ណាំហុង ក៏បានស្នើឲ្យរដ្ឋមន្ត្រីការបរទេសញូហ្សេឡិនជំរុញភាពជាដៃគូសេដ្ឋកិច្ចទូលំទូលាយតំបន់ ហើយនេះជាក្របខណ្ឌទំនាក់ទំនងមួយ ដែលការចរចាបង្កើតឡើងនូវដៃគូសេដ្ឋកិច្ចទូលំទូលាយតំបន់នេះ បានធ្វើឡើងនៅក្នុងពេលដែលកម្ពុជាធ្វើជាប្រធានអាស៊ានកាលពីឆ្នាំ២០១២ ហើយមកដល់ពេលនេះ ការចរចា ដើម្បីបង្កើតឡើងនូវទំនាក់ទំនងដៃគូសេដ្ឋកិច្ចទូលំទូលាយតំបន់កំពុងតែបន្តទៀត ដែលមានប្រទេសចំនួន១៦ ជាសមាជិក ក្នុងនោះមានប្រទេសអាស៊ានទាំង១០ ចិន ជប៉ុន កូរ៉េ អូស្ត្រាលី ញូហ្សេឡិន និងឥណ្ឌា៕
កម្ពុជាស្នើឲ្យញូហ្សេឡិនបង្កើនកិច្ចសហការបន្ថែមទៀត លើវិស័យកសិកម្ម និងធុរកិច្ច
0 Comments