ភ្នំពេញ ៖ កំណាត់ផ្លូវ២៧១ ដែលមានប្រវែងជាង៧គីឡូម៉ែត្រ ត្រូវបានសាលារាជធានីភ្នំពេញសម្រេចបើកការដ្ឋានជួសជុលឡើងវិញ ចាប់ពីផ្លូវសហព័ន្ធរុស្ស៊ី ស្ពានអាកាស៧មករាដល់ស្ពានអាកាសក្បាលថ្នល់ក្រោយពីខកខានក្នុងការជួសជុលអស់រយៈពេល ១៦ឆ្នាំមកនោះ។
ពិធីបើកការដ្ឋាននេះត្រូវបានធ្វើឡើងកាលពីព្រឹកថ្ងៃទី១៩ ខែសីហា នៅក្រោមស្ពានអាកាសស្ទឹងមានជ័យ សង្កាត់បឹងសាឡាង ខណ្ឌទួលគោក ក្រោមអធិបតីភាពលោកប៉ា សុជាតិវង្សអភិបាលរាជធានីភ្នំពេញ និងមន្ត្រីក្រោមឱវាទព្រមទាំងប្រជាពលរដ្ឋជាច្រើននាក់ផងដែរ។
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញឲ្យដឹងថា ផ្លូវលេខ២៧១នេះ បានស្ថាបនាឡើងក្នុងអំឡុងឆ្នាំ១៩៩៩ ជាប្រភេទផ្លូវកៅស៊ូACមាន ទទឹង១៨ម៉ែត្រចាប់ពីមហាវិថីសហព័ន្ធរុស្ស៊ីដល់ស្ពានអាកាសក្បាលថ្នល់ដែលពេលនោះ ផ្លូវ នេះមានតួនាទីជាផ្លូវក្រវាត់ក្រុង តភ្ជាប់ចរាចរណ៍ពីតំបន់ខាងជើងមកខាងត្បូង និងតំបន់ខាង កើតរាជធានីភ្នំពេញឆ្ពោះទៅក្រុងតាខ្មៅ និងផ្លូវជាតិលេខ១សំរាប់ចរាចររថយន្តធុនធ្ងន់ ដែលមានសភាពយ៉ាងមមាញឹក។
ការជួសជុលកែលំអនេះ ធ្វើឡើងលើចំងាយផ្លូវ៧.៧០០ ម៉ែត្រ ទទឹង១៨ម៉ែត្រជាប្រភេទផ្លូវអ៊ុតកៅស៊ូACដែលអនុវត្តដោយក្រុមហ៊ុនLy Service និងត្រួត ពិនិត្យបច្ចេកទេសដោយមន្ទីរសាធារណការនិងត្រូវចំណាយពេលជួសជុល១ខែ។
លោកប៉ា សុជាតិវង្ស អភិបាលនៃគណៈអភិបាលរាជធានីភ្នំពេញមានប្រសាសន៏ថា ផ្លូវលេខ២៧១ ជាផ្លូវសំខាន់ក្នុងការដោះស្រាយការកកស្ទះចរាចរដែលស្ថិតនៅចំណុចប្រ សព្វខណ្ឌ៣គឺខណ្ឌទួលគោក,ខណ្ឌចំការមន និងខណ្ឌមានជ័យត្រង់ចំណុចស្ពានអាកាស ស្ទឹងមានជ័យ ដែលមានចរាចរកកស្ទះខ្លាំងបំផុតនាពេលកន្លងមក។ តែក្រោយពីមានស្ពាន អាកាសស្ទឹងមានជ័យ បញ្ហាចរាចរនៅតំបន់ត្រូវបានកាត់បន្ថយស្ទើរតែទាំងស្រុងនៅពេល ដែលគេអាចធ្វើចរាចរបានទាំងក្រោមដី ,លើដី និងអាកាស។
លោកបន្តថា ផ្លូវ និងលូជារឿង ២ដាច់ដោយឡែកពីគ្នាតែវាជាកូនភ្លោះបើធ្វើផ្លូវអត់ធ្វើលូក៏មិនបាន,ធ្វើលូអត់ធ្វើផ្លូវក៏មិន កើត។ កន្លងមកប្រជាពលរដ្ឋតែងតែរិះគន់សាលារាជធានីភ្នំពេញថា ពេលភ្លៀងមិចមិនធ្វើ លូ ដល់រដូវប្រាំងសួរថា ម៉េច មិនធ្វើផ្លូវ។ការពិតយើងបានដាក់ទុនយ៉ាងច្រើនចូលទៅក្នុងដី ដែលបងប្អូនប្រជាពលរដ្ឋមើលមិនឃើញ ពោលគឺយើងបានស្ថាបនាប្រព័ន្ធលូខ្នាតធំជា យុទ្ធសាស្ត្របានប្រមាណ៥៥គីឡូម៉ែត្ររួចមកហើយ។. លោកប៉ា សុជាតិវង្ស បញ្ជាក់ថា ការ អភិវឌ្ឍទីក្រុងនេះគឺកើតចេញពីបាតដៃយើងទាំងអស់គ្នាដោយលំបាក ដូច្នេះមិនត្រូវឲ្យ ជនអគតិណាមួយមកបំផ្លាញសមិទ្ធផល និងភាពសុខសាន្តរបស់ប្រជាពលរដ្ឋឡើយ៕
បើកការដ្ឋានជួសជុលផ្លូវ២៧១ពីផ្លូវសហព័ន្ធរុស្ស៊ីដល់ក្បាលថ្នល់ប្រវែងជាង៧គីឡូម៉ែត្រ (Update)
0 Comments