ភ្នំពេញ ៖ អតីតពិធីការិនីទូរទស្សន៍ស៊ីធីអ៊ិនកញ្ញា ឯក សុជាតា ហៅ សាសា ក្រោយពីបង្កគ្រោះថ្នាក់ចរាចរណ៍បណ្ដាលឲ្យមនុស្សម្នាក់រងរបួសធ្ងន់ នៅខេត្តបាត់ដំបង ហើយបែរជាគេចវេសមិនព្រមទទួលខុសត្រូវលើទង្វើខ្លួនឯងនោះ ភ្លាមៗនេះដែរ គេសង្កេតឃើញមានមហាជនជាច្រើនបានចោទប្រកាន់រិះគន់យ៉ាងចាស់ដៃ លើតារាស្រីរូបនេះថា ត្រង់នាងមានរឿងចេះស្រែកទាមទាររកយុត្តិធម៌តែដល់ពេលខ្លួនបង្កបញ្ហាគ្រោះថ្នាក់លើគេវិញ បែរជាគេចវេសយករួចខ្លួន មិនចេញមុខទទួលខុសត្រូវសួរថា តើទង្វើនេះនាងមានបេះដូងជាមនុស្សឬអត់ ?
ស្របពេលសម្លេង នៃការរិះគន់បាននឹងកំពុងចាក់ស្រេះបាញ់ស្រោចយ៉ាងខ្លាំង ទៅលើកញ្ញាសាសា នោះដែរថ្មីៗនេះ នៅលើបណ្តាញសង្គមហ្វេសប៊ុកផ្ទាល់ខ្លួន ត្រូវបានគេប្រទះឃើញតារាស្រីរូបនេះសរសេរបង្ហោះពាក្យសម្តីប្រមាថអាយុជីវិតលើខ្លួនឲ្យស្លាប់ ក្នុងឆ្នាំនេះគួរឲ្យភ្ញាក់ផ្អើលបំផុត។
តាមរយៈអត្ថន័យខ្លឹមសារដែលត្រូវបានកញ្ញា សាសា បង្ហោះនៅលើបណ្ដាញសង្គមហ្វេសប៊ុកនាងបានសរសេរបែបចង់លាងកំហុសរបស់ខ្លួនថា បើសិនខ្ញុំជាមនុស្សអាក្រក់ សាងតែអំពើបាប មិនដែលធ្វើពើល្អ សូមឲ្យទេវតាយកជីវិតខ្ញុំក្នុងឆ្នាំនេះចុះ មិនបាច់ទុកឲ្យខ្ញុំ មានជីវិតដល់ឆ្នាំក្រោយទេ។
កញ្ញា សាសា បាននិយាយថា ខ្ញុំនាំរឿងស៊យឲ្យអ្នកជុំវិញខ្លួនខ្ញុំច្រើនពេកហើយ ហើយខ្ញុំក៏អស់ទឹកចិត្តក្លាហាន ដើរទៅមុខទៀតដែរ ទោះជាខ្ញុំខំញញឹមលាក់ទុក្ខក៏លាក់លែងបានទៀតដែរ ជីវិតគ្រួសារដែលមិនពេញលេញខំផ្តល់ភាពកក់ក្តៅឲ្យអ្នកជុំវិញខ្លួន តែខ្លួនឯងពិបាកយ៉ាងណាក៏មិនដែលប្រាប់នរណាម្នាក់ឡើង។ មួយជីវិតនេះមិនស្តាយក្រោយឡើយ បើបានស្លាប់ព្រោះអំពើបាបកម្មដូចដែលគេថា ខ្ញុំសុំស្លាប់ក្នុងឆ្នាំនេះចុះជាជាងចាំស្តាប់ ការជេរប្រមាថ ដោយពាក្យអាក្រក់ៗ ដូចជាសត្វ។
គូរំលឹកថា អតីតពិធីការិនីដែលល្បីល្បាញខាងដើរបង្ករឿងផ្អើលពេញផ្ទៃប្រទេសកញ្ញា សាសាកាលវេលាម៉ោងជាង ១១យប់ថ្ងៃទី២ ខែសីហា ឆ្នាំ២០១៥កន្លងទៅ នាងបានបើករថយន្តបង្កគ្រោះថ្នាក់ចរាចរណ៍ដោយបើបុកម៉ូតូរ៉ឺម៉កដឹកទឹកកក បណ្តាលឲ្យភាគីជនរងគ្រោះម្នាក់រងបួសធ្ងន់ចំណែករថយន្តទំនើបពណ៌សរបស់នាងរងការខូចខាតផ្នែកខាងមុខ។ ហេតុការណ៍គ្រោះថ្នាក់នេះកើតឡើងនៅម្តុំទល់មុខក្លឹបកម្សាន្តឈ្មោះ ស្តាឡាយ ស្ថិតនៅកណ្តាលក្រុងបាត់ដំបង។
សាក្សីនៅកន្លែងកើតហេតុបាននិយាយថា បន្ទាប់ពីបង្កហេតុភ្លាមៗនោះគេឃើញនាង សាសា ចេញពីក្នុងរថយន្តចុះទៅចរចាជាមួយភាគីម្ខាងទៀត ដោយត្រូវរូវគ្នានាងយល់ព្រមចេញសំណងរាល់ការខូចខាត និងព្យាបាលថ្លៃរបួសទៅឲ្យជនរងគ្រោះចំនួន៣លានរៀល ដើម្បីបញ្ចប់រឿង។ ប៉ុន្តែបើទោះបីជារឿងនេះត្រូវបានបញ្ចប់នៅនឹងកន្លែងក៏ដោយ តែសម្រាប់ទស្សនៈមហាជនមជ្ឈដ្ឋានខាងក្រៅនៅតែគិតថា រឿងរ៉ាវដែលកើតឡើងគឺជាកំហុសរបស់នាងទាំងស្រុង ដែលបើកមិនប្រុងប្រយ័ត្នក្នុងស្ថានភាពស្រវឹងរហូតបង្កគ្រោះថ្នាក់ដល់អ្នកដទៃបែបនេះ៕
សាសា ដាក់បណ្ដាសាខ្លួនឯងឲ្យស្លាប់ឆ្នាំនេះ
0 Comments