ក្រចេះ ៖ រថយន្ដ Land Cruiser ដឹកឈើប្រណិតពេញប្រៀប ត្រូវបានកម្លាំងចម្រុះរបស់គណៈបញ្ជាការឯកភាពស្រុកចិត្របុរី ដឹកនាំដោយលោក អ៊ួង សម្បត្តិ អភិបាលរងស្រុក បង្ក្រាបបាន កាលពីវេលាម៉ោង៧យប់ថ្ងៃទី១៨ ខែសីហា ឆ្នាំ២០១៥ នៅចំណុចភូមិឫស្សីចារ ឃុំថ្មរគ្រែ ស្រុកចិត្របុរី។
លោក អ៊ួង សម្បត្តិ អភិបាលរងស្រុកចិត្របុរី បានឲ្យដឹងថា ដោយមានការបញ្ជារពីសំណាក់លោក អភិបាលស្រុក ហង្ស ចាន់ឌី រូបលោកក៏បានដឹកនាំកម្លាំងជំនាញរដ្ឋបាលព្រៃឈើ និងនគរបាលស្រុកចុះធ្វើការបង្ក្រាបបានរថយន្តលុចស្ស៉ីស ដឹកឈើនៅចំណុចខាងនេះ។
លោក អភិបាលរងស្រុកបន្តថា នៅក្នុងប្រតិបត្តិការបង្ក្រាបនេះ គឺមានសភាពតានតឹងណាស់ គឺបានចំណាយពេលចាប់វេលាម៉ោង ៧រហូតទៅដល់ម៉ោង១១យប់ឯណោះ លោកបញ្ជាក់ថា នៅពេលសមត្ថកិច្ចបង្ក្រាបបានហើយខណៈដែល កម្លាំងជំនាញរដ្ឋបាលព្រៃឈើកំពង់នាំ យករថយន្ដដឹកឈើនោះ ទៅទុកនៅស្ថានីយ បណ្ដុះកូនឈើខ្សារ ដល់ចំណុចជិតបន្ទាយយោធាខេត្ត ស្ថិតក្នុង សង្កាត់អូរឫស្សី ក្រុងក្រចេះ ស្រាប់តែមានមនុស្ស ១ក្រុមដែលគេដឹងថាជា ឈ្មួញឈើ បើករថយន្ដ Lexus350 ពណ៌ស ស្លាកលេខ ភ្នំពេញ 2AA-3633 បើករារាំងសមត្ថកិច្ច មានចេតនាចង់រំដោះ រថយន្ដដឹកឈើនោះទៅវិញ។
សមត្ថកិច្ចបញ្ជាក់ថា អ្នកបើករថយន្ដរារាំងនោះ ឈ្មោះ វណ្ណា ជាឈ្មួញឈើយ៉ាងសកម្ម ដែលស្គាល់ថា ជាកូនប្រសា យាយលក់បាយនៅស្រុកឆ្លូង និងឈ្មោះ ទេព្យ ហ៊ុយ ជាមន្ត្រីអាវុធហត្ថ បានមកធ្វើសកម្មភាពអន្តរាគមន៍រារាំងចង់រំដោះ រថយន្ដដឹកឈើ នោះ។
សមត្ថកិច្ចបញ្ជាក់ទៀតថា ដោយស្ថិតក្នុងស្ថានភាពដ៏តានតឹង អស់រយៈពេលជាច្រើនម៉ោងរហូតទាល់តែមានការបញ្ជាពី ព្រះរាជអាជ្ញា អន្តរាគមន៍ ក្រោយមកស្ថានការណ៍ក៏បានធូរស្រាលឡើងវិញ បន្ទាប់ពី និងកម្លាំងនគរបាល បានមកដល់ទើបក្រុមឈ្មួញ បើករថយន្ដរត់គេចអស់។
បើតាមមន្ត្រីរដ្ឋបាលព្រៃឈើថ្មក្រែ បានឲ្យដឹងថា រថយន្តខាងលើត្រូវបានយកទៅរក្សាទុកនៅថ្នាលបណ្តុះកូនឈើខ្សារ ហើយឈើដែលសមត្ថកិច្ចរឹបអូស បានជាឈើប្រភេទធ្នង់ មានចំនួន៤២កំណាត់ ស្មើជិត២ម៉ែត្រគូប៕
បង្ក្រាបរថយន្តដឹកឈើរបស់មន្ត្រីអាវុធហត្ថ មានមនុស្ស៣នាក់ចេញមុខប្រុងរំដោះ
0 Comments