ភ្នំពេញ ៖ បច្ចុប្បន្ននេះក្នុងទីផ្សារនៃព្រះរាជាណាចក្រកម្ពុជា ផលិតផលកែសម្រស់មួយចំនួនដូចជា ឡេលាបឲ្យស្បែកស ឲ្យមុខស បំបាត់មុន ជាំ ជាដើមកំពុងមានទីផ្សារយ៉ាងខ្លាំងក្នុងស្រទាប់យុវជន និងយុវនារី ដែលមានចង់ឲ្យខ្លួនមានសម្រស់ស្រស់ស្អាតដូចតារាថៃ ឬកូរ៉េ។ ការជ្រើសរើសរបស់ពួកគាត់មិនត្រូវបានឆ្លងកាត់ការពិចារណាច្រើននោះទេ គឺល្បឺតគ្នា តាម Facebook ឬមិត្តភក្ដិ ដែលជាអ្នកត្រូវបានអ្នកដទៃទាក់ទងឲ្យប្រើ ហើយណែនាំអ្នកដទៃទៀតដើម្បីបានប្រយោជន៍នូវកម្រៃជើងសា។ ការជ្រើសរើសមិនផលិតផលមិនបានត្រឹមត្រូវ បានផ្តល់នូវលទ្ធផលដូចជាមហារីកស្បែក និងជំងឺសើស្បែកមួយចំនួនទៀត។ ផលិតផលទាំងនោះភាគច្រើនត្រូវបានអ្នកលក់ផ្សព្វផ្សាយថាបាននាំចូលមកពីប្រទេស ថៃ ឥណ្ឌូនេស៊ី សាំងហ្គាពួរនិងម៉ាឡេស៊ីជាដើម។
តាមប្រភពច្បាស់ការមួយប្រាប់ កម្ពុជាថ្មី ឲ្យដឹងថា នៅប្រទេសម៉ាឡេស៊ី និងសាំងហ្គាពួរបានរកឃើញសារធាតុផ្សំម្យ៉ាងដែលអាចធ្វើឲ្យអ្នកប្រើប្រាស់ផលិតផលនេះកើតមហារីកស្បែកមុខបាន។ អាជ្ញាធរបានហាមឃាត់ការនាំចូលផលិតផលនេះមកលក់ឲ្យប្រជាជនរបស់ពួកគេឡើយ ថែមទាំងធ្វើការផ្សព្វផ្សាយតាមប្រព័ន្ធផ្សព្វផ្សាយផ្សេងៗរបស់គេដើម្បីឲ្យប្រជាជនដឹងអំពីផលិតផលក្លែងក្លាយនេះ។ ផលិតផលនេះប្រើដំបូងទទួលបានលទ្ធផលភ្លាមៗ តែនឹងបង្កឲ្យអ្នកប្រើប្រាស់មានជំងឺមហារីកស្បែក និងឈានទៅដលការរលួយស្បែកថែមទៀតក្នុងអំឡុងពេលណាមួយ។
នៅពេលដែលទីផ្សាររបស់ប្រទេស ម៉ាឡេស៊ី និង សាំងហ្គាពួរ ត្រូវបានហាមឃាត់ការនាំចូលដ៏តឹងរ៉ឹងពីសំណាក់ក្រសួងសុខាភិបាលរបស់ប្រទេសនេះមក ធ្វើឲ្យទីផ្សារផលិតផលក្លែងក្លាយទាំងនេះ បានផ្លាស់ប្តូរទីផ្សារ ដោយងាកមកចូលក្នុងប្រទេសកម្ពុជាយើងវិញ ហើយក្នុងអំឡុងពេលប៉ុន្មានខែនេះការនាំចូលយ៉ាងគំហុកដូចទឹកបាក់ទំនប់ ដែលជាទីចាប់អារម្មណ៍ប្រើប្រាស់របស់ សុភាពនារីសុភាពបុរស និងភេទទី៣ ដែលមានក្ដីប្រាថ្នាចង់ស្អាតដូចតួកូរ៉េ និងថៃ ដោយមិនបានគិតពីផលប៉ះពាល់ ដោយសារធាតុគីមីបំផ្លាញស្បែករបស់ខ្លួនធ្វើឲ្យកើតមហារីកនេះទេ។
ប្រភពពីប្រទេសដដែលនេះបានទម្លាយអាថ៌កំបាំងទៀតថា ក្រុមវេជ្ជបណ្ឌិតរបស់ក្រសួងសុខាភិបាលសាំងហ្គាពួរបាន បញ្ជាក់ថា ផលិតផលនេះពេលអ្នកប្រើប្រាស់ដំបូង គឺទទួលបានសម្រស់លើផ្ទៃមុខស្រស់ស្អាតខ្លាំងណាស់ លុះពួកគេប្រើប្រាស់លើកក្រោយៗទៀតវាក៏ចាប់ផ្ដើមបង្កជាមហារីកស្បែក នៅលើផ្ទៃមុខ នឹងអាចឈានទៅរកការរលួយផ្ទៃមុខទាំងមូលថែមទៀតផង តាមកម្រិតរបស់អ្នកប្រើប្រាស់ ផលិតផលនេះ ព្រោះវាមានសារជាតិផ្ទុកដោយថាមពលគីមីកម្រិតខ្លាំងដែលធ្វើឲ្យស្បែករបស់មនុស្សប្រែប្រួលដ៏សាហាវបំផុត។
ការនាំចូលមកទីផ្សារងងឹតតាមច្រករបៀង និងច្រកអន្តជាតិ ជាថ្នូរនឹងការដោះដូរផលចំណេញរវាងឈ្មួញ និងសមត្ថកិច្ចតាមតំបន់ទាំងនោះ ដោយពួកគាត់មិនបានគិតពី ផលប៉ះពាល់ដល់អនាគតទំពាំងស្នងឫស្សីរបស់ប្រទេសកម្ពុជាឡើយ។ ប្រហែលជាពួកគាត់គ្មានការសោកស្តាយ ស្រណោះអាល័យទេឬ នៅពេលដែលផលិតផលទាំងនេះបានសម្លាប់ បង ប្អូន កូន ក្មួយ សាច់ញាតិរបស់គាត់ ដោយសារតែការចង់បានផលចំណេញរបស់គាត់។
មួយវិញទៀតគឺជាភាពកម្សោយរបស់ក្រសួងសុខាភិបាល និងក្រសួងពាក់ព័ន្ធ ដែលមិនបានគិតគូរយកចិត្តទុកដាក់ពីផលប៉ះពាល់ធ្ងន់ធ្ងរលើផលិតផលក្លែងក្លាយមួយចំនួន ដែលហូរចូលមកស្រុកខ្មែរ ទើបលំហូរផលិតផលក្លែងបន្លំនេះហូរចូលមកស្រុកខ្មែរមិនឈប់ឈរ។ ទង្វើទាំងនេះបានបើកដៃឲ្យខាងឈ្មួញនិងសមត្ថកិច្ចនៅតាមច្រកព្រំដែនមានឱកាសច្រើនក្នុងការប្រកបរបរបែបនេះ ដោយមិនគិតពីអនាគតប្រទេសជាតិនាពេលខាងមុខរបស់ខ្លួនថាវាធ្លាក់ដល់កម្រិតណា ដោយសារផលប៉ះពាល់ទាំងនេះ ដូចជា ផលិតផលលើចំណីអាហារជាដើម។
បច្ចុប្បន្នផលិតផលប្រភេទក្លែងក្លាយនេះបានកំពុងចរាចរណ៍ពេញទំហឹងក្នុងព្រះរាជាណាចក្រកម្ពុជា។ ហេតុនេះក្រសួងសុខាភិបាល និងក្រសួងពាក់ព័ន្ធ គួរតែគិតគួររឹតបន្តឹងលើការនាំចូលផលិតផលដែលបំផ្លាញមនុស្សជាតិក្នុងប្រទេសរបស់ខ្លួន។ ត្រូវត្រួតពិនិត្យឲ្យអស់ នូវគ្រប់ផលិតផលដែលទាក់ទងទៅសុខុមាលភាពរបស់ប្រជាជនដែលចរាចរនៅលើទីផ្សារ មិនថាតាមច្រកព្រំដែន ទីប្រជុំជន ឬជនបទឡើយ ត្រូវតែផ្សព្វផ្សាយនិងចាត់វិធានការនេះជាបន្ទាន់ទើបពលរដ្ឋយើងគេចផុតពីជំងឺដ៏សាហាវនេះ។ បើសិនជានៅតែបណ្ដោយឲ្យមានការហូរចូលផលិតផលបែបនេះទៀត ប្រជាពលរដ្ឋនឹងបាត់បង់ថវិកាផ្ទាល់ខ្លួនក៏ដូចជារដ្ឋាភិបាលនាពេលខាងមុខ ព្រោះត្រូវទទួលការព្យាបាល ហើយប្រហែលជារកមន្ទីរពេទ្យសម្រាកព្យាបាលមិនបានក៏មិនដឹង។
បើតាមការបញ្ជាក់ពីអ្នក ដែលបានដឹងពីការនាំចូលផលិតផលនេះ បានបង្ហើបថា លោករដ្ឋមន្ត្រី ក្រសួងសុខាភិបាល មិនបានដឹងអំពីរឿងនេះទេ ព្រោះថ្នាក់ក្រោមៗគេបិទមាត់អស់ មិនព្រមទម្លាយឲ្យលោករដ្ឋមន្ត្រីនោះដឹងឡើយ។ ដូចនេះរាជរដ្ឋាភិបាលគួរតែចាត់វិធានការលើរឿងនេះបើរំពឹងទៅលើមន្ត្រីសមត្ថកិច្ចតាមច្រករបៀងនិងច្រកអន្តរជាតិ មិនអាចទុកចិត្តបានទាំងស្រុងទេ។ បើសិនជាមិនចាប់ដុសក្អែលចេញខ្លះទេនោះផលវិបាកនឹងធ្លាក់មកលើរាជរដ្ឋាភិបាលនៅថ្ងៃក្រោយមិនខាន៕
ផលិតផលកែសម្ផស្សក្លែងក្លាយ ធ្វើឲ្យកើតមហារីកស្បែក វាយលុកក្នុងទីផ្សារយ៉ាងខ្លាំង
0 Comments