ស្របពេលជាមួយគ្នានឹងការងារសិល្បៈកំពុងរីកលូតលាស់ដុះដាលទៅមុខគួរឲ្យកត់សម្គាល់នេះដែរ តារាសម្ដែងវ័យក្មេងគួរឲ្យស្រលាញ់ កញ្ញា បេប៊ី ឮល្បីថា បច្ចុប្បន្ននាងសម្បូរប្រុសតាមស្រលាញ់ច្រើន ពិសេសអ្នកមានអំណាច និងមាសប្រាក់ គឺតែងប្រាថ្នាចង់បានចិត្តកាយរបស់នាងយកទៅក្រសោបក្រេបក្លិនលម្អងបុប្ផាដ៏សែនឈ្ងុយឈ្ងប់ម្នាក់នេះធ្វើជាម្ចាស់បេះដូង។
ប្រភពពីចង្កោមអ្នកសិល្បៈបាននាំគ្នានិយាយថា ស្រីស្រស់ បេប៊ី មិនត្រឹមតែលេចធ្លោលើការងារសិល្បៈនោះទេ នាងថែមទាំងលេចធ្លោផងដែរចំពោះរឿងស្នេហា ខណៈបច្ចុប្បន្នមានប្រុសៗជាច្រើនបានកំពុងតែតាមចោមរោមស្រលាញ់នាង។ ប៉ុន្តែគួរឲ្យស្តាយ ព្រោះនាងមានម្ចាស់រួចទៅហើយ គឺគូស្នេហ៍ម្ចាស់ចិត្តម្នាក់ជាកំលោះពោះម៉ាយកូនមួយមានវ័យចំណាស់ប្រហែលឪពុករបស់របស់នាងទៀតផង។
ប្រភពបាននិយាយទៀតថា បេប៊ី បានភ្ជាប់ទំនាក់ទំនងស្នេហាជាមួយបុរសម្នាក់នេះជាងមួយឆ្នាំមកហើយ តែរឿងដែលគួរឲ្យសោកស្ដាយបំផុតនៅត្រង់នាងតែងព្យាយាមនិយាយកុហកបិទបាំងការពិតមិនប្រាប់ពីទំនាក់ទំនងស្នេហាក្រៅឆាក ដើម្បីឲ្យមហាជនបានដឹងឡើយ។ មិនតែប៉ុណ្ណោះ រាល់ពេលមានគេសួរនាំពីរឿងនេះ នាងតែងបង្ហាញពីអាកប្បកិរិយា ឫកពាមិនសប្បាយចិត្ត ហាក់មានបំណងចង់លាក់បាំងការពិត។
ប្រភពបានបន្ថែមថា រឿងដែលហួសចិត្តជាងនេះទៅទៀតនោះ នៅត្រង់ថា ពេលខ្លះគេក៏ធ្លាប់ឃើញកញ្ញា បេប៊ី កាន់ដៃបណ្ដើរគ្នាជាមួយបុរសម្នាក់នេះចូលភោជនីយដ្ឋាន និងហាងទំនើបៗញ៉ាំអាហាររួមគ្នាទៀតផង ប៉ុន្តែនៅពេលគេសួរថា តើបុរសម្នាក់នោះត្រូវជាម៉េចជាមួយនាង គឺត្រូវបានស្រីស្រស់ម្នាក់នេះឆ្លើយប្រាប់ថា ជាបងទៅវិញ។
កម្ពុជាថ្មី នៅរសៀលថ្ងៃទី០៥ ខែកក្កដា ឆ្នាំ២០១៥នេះ មិនទាន់អាចស្វែងរកការបំភ្លឺជុំវិញរឿងរ៉ាវខាងលើពីសាមីខ្លួន កញ្ញា ប៊េប៊ី តាមទូរស័ព្ទបាននៅឡើយទេ។ ហេតុនេះ យើងរង់ចាំស្វាគមន៍ជានិច្ចរាល់ការចេញមុខស្រាយបំភ្លឺបញ្ជាក់ការពិតប្រាប់ដល់មហាជនពីសំណាក់តារាសម្ដែង និងពិធីការិនីប្រចាំស្ថានីយទូរទស្សន៍My TVកញ្ញា បេប៊ី៕
បេប៊ី និយាយកុហកមហាជន
0 Comments