ភ្នំពេញ ៖ នាវេលាម៉ោង៨ និង១៥នាទី ព្រឹកថ្ងៃទី១៩ ខែសីហា ឆ្នាំ២០១៥ នគរបាលព្រហ្មទណ្ឌខណ្ឌដង្កោ បានដឹកបញ្ជូនជនសង្ស័យ២នាក់ ទៅកាន់សាលាដំបូងរាជធានីភ្នំពេញ ករណីចែកចាយគ្រឿងញៀន។
ជនសង្ស័យទាំង២នាក់ ករណីចែកចាយគ្រឿងញៀន ត្រូវបានកម្លាំងនគរបាលព្រហ្មទណ្ឌខណ្ឌដង្កោ ឃាត់ខ្លួន កាលពីវេលាម៉ោង១១ និង៣០នាទី ថ្ងៃទី១៧ ខែសីហា ឆ្នាំ២០១៥ នៅចំណុចក្នុងរោងកម្មករសំណង់ស្នាក់នៅរបស់ បុរី ចំការដូង ស្ថិតក្នុងភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។
ជនសង្ស័យ ទី១ឈ្មោះ គឹម អុន ហៅ ដា ភេទប្រុស អាយុ៣៦ឆ្នាំ មុខរបរមិនពិតប្រាកដ ស្នាក់នៅក្នុងរោងកម្មករសំណង់ស្នាក់នៅរបស់ បុរី ចំការដូង ភូមិថ្មី សង្កាត់ដង្កោ ខណ្ឌដង្កោ និងមានស្រុកកំណើតភូមិក្រោលគោ ឃុំក្រោលគោ ស្រុកស្វាយជ្រុំ ខេត្តស្វាយរៀង និងទី២ឈ្មោះ ព្រំ សារិទ្ធ ភេទប្រុស អាយុ៣៧ឆ្នាំ មុខរបរមិនពិតប្រាកដ មានទីលំនៅផ្ទះជួល ភូមិទ្រា សង្កាត់ស្ទឹងមានជ័យ ខណ្ឌមានជ័យ និងមានស្រុកកំណើតភូមិស្វាយចេក ឃុំស្វាយធំ ស្រុកស្វាយជ្រុំ ខេត្តស្វាយរៀង។
លោក នៅ ទិត្យ នាយរងផ្នែកនគរបាលព្រហ្មទណ្ឌខណ្ឌដង្កោប្រាប់ឲ្យដឹងថា ការឃាត់ខ្លួន ជនសង្ស័យទាំង២នាក់ ករណីចែកចាយគ្រឿងញៀន គឺបន្ទាប់ពីទទួលបានសេចក្ដីរាយការណ៍ពីប្រជាពលរដ្ឋល្អរស់នៅក្បែរកន្លែងកើតហេតុ ហើយលោកក៏សុំការបញ្ជាពីលោកវរសេនីយ៍ទោ ជឹម ស៊ីថា អធិការខណ្ឌដង្កោ ដឹកនាំកម្លាំងចុះបង្ក្រាប ក្នុងនោះដកហូតបានវត្ថុតាង ថ្នាំញៀន ៣កញ្ចប់ ( ធំ១ តូច២) ថង់ច្រកថ្នាំញៀន ១ និងឧបករណ៍ប្រើប្រាស់ថ្នាំញៀនមួយចំនួនទៀត។
លោកនាយរងផ្នែកនគរបាលព្រហ្មទណ្ឌដង្កោខាងលើប្រាប់បន្តឲ្យដឹងថា ក្រោយពីឃាត់ខ្លួនសង្ស័យទាំង២នាក់ សមត្ថកិច្ចបាននាំខ្លួនមកកាន់អធិការដ្ឋាននគរបាលខណ្ឌដង្កោធ្វើការសាកសួរ ដើម្បីកសាងសំណុំរឿងបញ្ជូនទៅកាន់តុលាការរាជធានីភ្នំពេញ ផ្ដន្ទាទោសតាមច្បាប់៕
នគរបាលខណ្ឌដង្កោបញ្ជូនជនសង្ស័យ២នាក់ ទៅតុលាការករណីចែកចាយគ្រឿងញៀន
0 Comments