ភ្នំពេញ ៖ អតីតសង្ឃវត្តគោកចំបក់ឈ្មោះ ជា វណ្ណដា អាយុ២៨ឆ្នាំ មកពីកម្ពុជាក្រោម ត្រូវបានបញ្ជូនឡើងតុលាការកាលពីវេលាម៉ោង៩ព្រឹកថ្ងៃទី១៩ ខែសីហា ឆ្នាំ២០១៥ ដើម្បីបើកការស៊ើបអង្កេតលើបទចោទប្រកាន់ ក្លែងលិខិតសាធារណៈ បទគំរាមថា នឹងសម្លាប់ និងបទរក្សាទុកគ្រឿងញៀនប្រព្រឹត្តនៅវត្តគោកចំបក់ ខណ្ឌដង្កោ កាលពីថ្ងៃទី១សីហា២០១៥។
សូមបញ្ជាក់ថា ឈ្មោះ ជា វណ្ណដា និងដៃគូរបស់គេឈ្មោះ ដាវ ទេព អាយុ២៨ឆ្នាំ ជាសង្ឃគង់នៅវត្តគោកចំបក់ ត្រូវបានអាជ្ញាធរក្រុងភ្នំពេញចាប់ខ្លួនកាលពីថ្ងៃទី១ ខែសីហា ឆ្នាំ២០១៥ ពេលធ្វើរដ្ឋបាលក្នុងវត្ត ។ ខណៈនោះសមត្ថកិច្ចបានរកឃើញមានគ្រឿងញៀន ដាវ កាំបិត ដំបងនិងខោលីអូស្រីជាដើម។
តុលាការបានឃុំអតីតសង្ឃទាំងពីរនាក់ នៅគុកព្រៃសកាលពីថ្ងៃទី៣ ខែសីហា ឆ្នាំ២០១៥ ហើយនៅថ្ងៃនេះមន្ត្រីឆ្មាំគុកបានបញ្ជូនតែឈ្មោះ ជា វណ្ណដាម្នាក់ប៉ុណ្ណោះមកធ្វើការសាកសួរ។ ចំណែកឈ្មោះដាវទេព មិនទាន់ចាត់ការទេ។
ខណៈតុលាការកំពង់សាកសួរជនជាប់ចោទ មានព្រះសង្ឃព្រមាន២០អង្គ និងអ្នកសហគមន៍បឹងកក់មួយចំនួនបានមកស្រែកតវ៉ាឲ្យតុលាការដោះលែងអតីតសង្ឃទាំងពីរអង្គវិញ៕
បញ្ជូនអតីតសង្ឃវត្តគោកចំបក់ មកបើកការស៊ើបអង្កេត
0 Comments