ភ្នំពេញ ៖ បន្ទាប់ពីការផ្ទៀងផ្ទាត់ផែនទីរបស់រាជរដ្ឋាភិបាលកម្ពុជា ជាមួយអង្គការសហប្រជាជាតិ មើលឃើញថា ផែនទី១៨ផ្ទាំង ដូចគ្នាទាំងស្រុងនោះ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានផ្ញើសារពិសេសមួយ ជូនទៅលោក សម រង្ស៊ី ដើម្បីបញ្ជាក់អំពីបញ្ហាផ្សេងៗ ដូចជាផែនទី និងសន្ធិសញ្ញាជាដើម។
លិខិតរបស់សម្ដេចតេជោ ហ៊ុន សែន ដែលផ្ញើជូនលោក សម រង្ស៊ី ហើយដែលការិយាល័យរបស់យើងទើបទទួលបានកាលពីវេលាម៉ោង៨ និង៥ នាទីព្រឹកថ្ងៃទី២១ខែសីហា ឆ្នាំ២០១៥ មុននេះមានខ្លឹមសារ ទាំងស្រុងថា ជូនឯកឧត្តមសម រង្ស៊ី ! សង្ឃឹមថា ឯកឧត្តមនឹងយល់ពីគោលបំណងដែលខ្ញុំផ្ញើជូនឯកឧត្តមនូវព្រះរាជសារ ព្រះមហាក្សត្រនឹងច្បាប់ទាក់ទង ទៅនឹងសន្ធិសញ្ញាព្រំដែនកម្ពុជា វៀតណាម។ ខ្ញុំបានផ្ដល់ឱកាសច្រើនណាស់ហើយ សំរាប់ការយល់របស់ឯកឧត្តម នឹងសហការីឯកឧត្តមតែដូចមិនយល់ សោះរហូតបន្តប្រើពាក្យផែនទីក្លែងក្លាយ។ ម្សិលមិញក្រោយពេលផ្ទៀងផែនទីយកពីអង្គការសហប្រជាជាតិ តំណាងគណបក្សឯកឧត្តម បាននិយាយថា អ្នកនិយាយជាសិទ្ធិរបស់បុគ្គលមិនទាក់ទង នឹងគោលជំហរគណបក្សទេ។ សង្ឃឹមថា ឯកឧត្តមនឹងណែនាំដល់អ្នកដែលបញ្ចេញយោបល់ទាំងនោះឲ្យយល់ ដោយរាប់ទាំងប្រាប់ ពួកគេឲ្យដឹងអំពីច្បាប់ទាក់ទង នឹងសិទ្ធិ សញ្ញាបំពេញបន្ថែមរវាងកម្ពុជា នឹងវៀតណាមលើបញ្ហាព្រំដែនផង។
ខ្ញុំនឹងឲ្យផ្សព្វផ្សាយនូវឯកសារទាំងអស់ រាប់ទាំងលិខិតរបស់សម្ដេចឪផ្ញើ ជូនអតីតនាយករដ្ឋមន្ត្រី វៀតណាម ផាំ វ៉ាន់ដុង កាលពីឆ្នាំ១៩៩៩សុំយកខ្សែប្រេវីយេជាខ្សែព្រំដែន ទឹករវាងកម្ពុជានឹងវៀតណាម។ ខ្ញុំសង្ឃឹមថាឯកឧត្តមនឹង អប់រំផ្ទៃក្នុងបក្សកុំឲ្យធ្វើ សកម្មភាពទុច្ចរិតបំផ្លាញការខិតខំរបស់ រាជរដ្ឋាភិបាល លើការងារព្រំដែនដែលត្រូវបានកំណត់ដោយច្បាប់។ តាមរយៈការពន្យល់ដ៏តិចតួចនេះឯ.ឧអាចយល់ថា ហេតុអ្វីបានជា លោក ហុង ស៊ុនហួ ត្រូវចាប់ខ្លួននឹងសកម្មភាពផ្លូវច្បាប់នឹងត្រូវប្រកាន់យកសំរាប់ អ្នកណាក៏ដោយដែលនិយាយថា ផែនទីក្លែងក្លាយធ្វើសកម្មភាពញុះញង់ បោកប្រាស់ប្រជាពលរដ្ឋ បង្កអស្ថិរភាពដើម្បីកេងចំណេញយកសន្លឹកឆ្នោតដោយមិនគិតពីផលប្រយោជន៏ស្របច្បាប់ របស់ជាតិនឹងប្រជាជននោះឡើយ។ ឯកឧត្តមអាចចោទសួរខ្ញុំថា បើមានផែនទីត្រឹមត្រូវហើយថែមទាំងមានច្បាប់គាំពារទៀត ហេតុអ្វីចាំបាច់ទៅសុំខ្ចីផែនទីពី អង្គការសហប្រជាជាតិ នឹងពីប្រទេសផ្សេងទៀត? ត្រង់ចំណុចនេះឯកឧត្តមអាចយល់ពីបំណងល្អរបស់ខ្ញុំដែល ចង់ឲ្យខ្មែរទាំងអស់ឯកភាពគ្នា លើផែនទីងាយស្រួលរួមគ្នា ការពារទឹកដីតាមផែនទីដែលរាជរដ្ឋាភិបាលមាន។ យើងខ្ចីផែនទីពីសហប្រជាជាតិ នឹងប្រទេសផ្សេងទៀត មកផ្ទៀងជាមួយផែនទីផ្លូវការរបស់កម្ពុជាដែលស្របតាមមាត្រា២ នៃរដ្ឋធម្មនុញ្ញនឹងមានច្បាប់ ធានាលើកិច្ចការព្រំដែនកម្ពុជាវៀតណាម។ យើងធ្វើនេះក៏ចង់ធានាតម្លាភាពក្នុងចំណោមជាតិ យើងកុំឲ្យចោទប្រកាន់គ្នាថា ផែនទីនេះត្រឹមត្រូវ ផែនទីនោះក្លែងក្លាយរាប់ទាំងផែនទី ឯ.ឧដែលទិញក្នុងតម្លៃ១៦៨ដុល្លារ ក៏បានយកមកផ្ទៀងរួចហើយដោយរាជបណ្ឌិតសភា។ មុនឯកឧត្តមផ្តល់ផែនទីឲ្យរាជបណ្ឌិតសភាទាំងឯ.ឧ ទាំងអ្នកគាំទ្រអះអាងថា ជាផែនទីត្រឹមត្រូវហើយចោទថា ផែនទីរដ្ឋាភិបាលជាផែនទីក្លែងក្លាយ ឬផែនទីចោរ។ ពេលនេះអ្វីៗ ច្បាស់ហើយផែនទីត្រឹមត្រូវរបស់ឯ.ឧខ្វះ២ផ្ទាំង សុំរកមកបង្គ្រប់ឲ្យរាជបណ្ឌិតសភា សំរាប់ស្រាវជ្រាវរបស់អ្នកវិទ្យាសាស្ត្រ, សុំឯកឧត្តមកុំបន្ទោសខ្ញុំថា ប្រើល្បិចយកសត្វមានពឹសចេញពីរូង ព្រោះផែនទីត្រឹមត្រូវរបស់ឯ.ឧសាហាវជាងសត្វ អាសិរពិសទៅទៀត ព្រោះផែនទីនេះមិនត្រឹមតែ បោសប្រាស់ប្រជាជនប៉ុណ្ណោះទេ តែផែនទីនេះបានធ្វើឲ្យសហការី ឯ.ឧខ្លះជាប់គុក នឹងខ្លះទៀតកំពុងរត់គេចខ្លួន។
ខ្ញុំសង្ឃឹមថាចាប់ពីពេលនេះតទៅបញ្ហាព្រំដែនពិសេសព្រំដែនកម្ពុជា-វៀតណាម លែងក្លាយទៅ ជាល្បែងនយោបាយបោកប្រាស់ប្រជាជនពីសំណាក់ឯ.ឧផ្ទាល់ នឹងមនុស្សក្នុងគណបក្សឯកឧត្តមតទៅទៀត។ ខ្ញុំនឹងចូលរួមកំដរឯកឧត្តមនូវគ្រប់ទម្រង់លែងនឹងគ្រប់កាលៈទេសៈគ្រប់រដូវកាលនឹងគ្រប់រស់ជាតិ (ក្តៅ.ត្រជាក់.ផ្អែម.ល្វីង.ជូរចត់) ។ល។
ខ្ញុំកំដរឯកឧត្តមបានទាំងអស់ ដូចដែលធ្លាប់បានធ្វើចំពោះខ្ញុំកន្លងមកតាំងពី មានស៊ីអត់សែន មានសែនអត់ស៊ីរហូតមកដល់វប្បធម៌សន្ទនា ដែលយើងបានរួមគ្នាកសាងឡើងដែលជាប្រយោជន៍សម្រាប់ជាតិ នឹងប្រជាជនយើងវែងឆ្ងាយទៅមុខទៀត៕
សម្ដេចតេជោ ហ៊ុន សែន ស្នើឲ្យលោក សម រង្ស៊ី ណែនាំមន្ត្រីរបស់ខ្លួនលើបញ្ហាផែនទី និងសន្ធិសញ្ញាផ្សេងៗ
0 Comments