សមត្ថកិច្ចនគរបាលមូលដ្ឋានបាននិយាយឲ្យដឹងថា បុរសចងកអត្តឃាតខ្លួននោះមានឈ្មោះ ជួន ភុន អាយុ៧៦ឆ្នាំ មានប្រពន្ធឈ្មោះ ជួន ហ៊ុំ អាយុ៧៩ ឆ្នាំ មាននទីលំនៅភូមិឃុំកន្លែងកើតហេតុ។
ស្ត្រីវ័យចំណាស់ជាប្រពន្ធបាននិយាយឲ្យដឹងថា ប្តីគាត់កើតជម្ងឺទឹកនោមប្រៃយូរមកហើយ និងបានចេញដំបៅនៅម្រាមជើងខាងស្តាំទាំងអស់ លើកលែងតែកូនជើងមួយចេញ។ គាត់បានទៅមណ្ឌលសុខភាព ឃុំ ទៅរកគ្រូខ្មែរមើលអស់ហើយតែមិនជា ដំបៅកាន់តែរីកធំឡើងៗ ធ្វើអោយប្តីគាត់មានការលំបាកទ្រាំជាខ្លាំងព្រោះតែការពឺតចុកចាប់ពីដំបៅនេះ។
កន្លងមកពេលពឺតចុកចាប់ម្តងៗគាត់តែងតែនិយាយប្រាប់ចាស់ៗក្នុងភូមិថា បើពឺត ម្លឹងៗទ្រាំមិនបានចង់តែចង ក សម្លាប់ខ្លួនឲ្យស្លាប់ទេ។ នៅព្រឹកថ្ងៃកើតហេតុ ប្តីគាត់បានបញ្ឆោតឲ្យចៅគាត់ទៅទិញបបរឲ្យគាត់ហូប ចំណែកគាត់ក៏មិនបានចាប់ អារម្មណ៍ដែរ មួយសន្ទុះក្រោយមកខណៈដែលចៅបានត្រឡប់មកពីទិញបបរឲ្យជីតាវិញរកតាមិនឃើញវា ក៏សួររក ពេលនោះខ្ញុំដែលកំពុងបោសផ្ទះ បានឆ្លើយថា អញឃើញគាត់ដើរទៅខាងលិចផ្ទះ ប្រហែលជាទៅរកបត់ជើងធំទេដឹង ពេលនោះចៅខ្ញុំក៏រត់ទៅរកស្រាប់តែប្រទះឃើញតាវាចងកនិងវល្លិឈើ សម្លាប់ខ្លួនបាត់ទៅហើយ វាបានរត់បណ្តើរស្រែកបណ្តើរឲ្យគេជួយ ហើយក៏ផ្អើលឆោឡោឡើង។
សមត្ថកិច្ចនគរបាលមូលដ្ឋានបានឲ្យដឹងថា បុរសរូបនោះ បានយកក្រមា ចងកនិងដើម ជន្លុះជាប់ជា មួយវល្លិទ្រាល នៅចំងាយប្រមាណជាង២០០ម៉ែត្រពីខាងលិចផ្ទះ។ ក្រោយពីសមត្ថកិច្ចបានពិនិត្យធ្វើកោសល្យវិច័យលើសពបុរសរូបនោះ បានឲ្យដឹងថា បុរសឈ្មោះ ជូន ភុន ពិតជាបានចងកសម្លាប់ខ្លួនពិតមែន សមត្ថកិច្ចបានប្រគល់សពបុរសចំណាស់រូបនោះ ទៅក្រុមគ្រួសារយកទៅធ្វើបុណ្យទានតាមប្រពៃណីនៅក្នុងលំនៅដ្ឋាន។
សូមបញ្ជាក់ថា នេះជាករណីលើកទី៣ ហើយនៅខេត្តកំពង់ឆ្នាំង មានមនុស្សចងកសម្លាប់ខ្លួន រយៈពេល៤ថ្ងៃ ដើមខែសីហានេះ មានចំនួន៣នាក់ហើយ គឺនៅថ្ងៃទី២ ខែសីហា នៅស្រុកបរិបូណ៌មានបុរស២នាក់បានចងកសម្លាប់ខ្លួន ដោយបុរសម្នាក់តូចចិត្តមានជម្ងឺមហារីកក្រពះមើលមិនជា បុរសទី២មានសតិមិននឹងនរ៕
បុរសចំណាស់បានសម្រេចចងកសម្លាប់ខ្លួន ព្រោះមានជម្ងឺទឹកនោមប្រៃ កើតដំបៅមើលមិនជា
0 Comments