យោងទៅតាមវិទ្យាស្ថានជាតិនៃការស្រាវជ្រាវសេដ្ឋកិច្ច និងសង្គម (NIESR) បានឲ្យដឹងថា កំណើនសេដ្ឋកិច្ចរបស់ពិភពលោក នឹងមានសភាពយឺត នៅឆ្នាំនេះ ទៅដល់កម្រិតទាបបំផុត ចាប់តាំងពីមានវិបត្ដិសេដ្ឋកិច្ចមក។ មជ្ឈមណ្ឌលផ្ដល់គំនិតនេះ បានកាត់បន្ថយការព្យាករឆ្នាំ២០១៥ របស់ខ្លួនមកនៅ៣.០ភាគរយពី៣.២ភាគរយ ដែលខ្លួនទស្សន៍ទាយនៅក្នុងខែឧសភា។
NIESR ក៏បានកាត់បន្ថយការព្យាករកំណើនសម្រាប់ប្រទេសអាមេរិក និងប្រទេសសេដ្ឋកិច្ចទីផ្សារ ដែលកំពុងងើបឡើងជាច្រើនផ្សេងទៀតផងដែរ បើទោះបីជាការព្យាករសម្រាប់តំបន់ចាយប្រាក់អឺរ៉ូ ត្រូវបានកាត់បន្ថយតែបន្ដិចបន្ដួចក៏ដោយ។ ការកាត់បន្ថយការព្យាករកំណើនរបស់ខ្លួនសម្រាប់សេដ្ឋកិច្ចរបស់ប្រទេសអង់គ្លេស មិនបានផ្លាស់ប្ដូរទេ គឺចំនួន២.៥ភាគរយ។
ការទស្សន៍ទាយកំណើនពេញមួយឆ្នាំសម្រាប់ប្រទេសអង់គ្លេស នៅតែមិនផ្លាស់ប្ដូរដែរ បើទោះបីជា NIESR កាត់បន្ថយការប៉ាន់ស្មានកំណើនរបស់ខ្លួនសម្រាប់រយៈពេល៣ខែ ទៅដល់ដំណាច់ខែកញ្ញា ពី០.៨ភាគរយមកនៅ០.៤ភាគរយក៏ដោយ។ NIESR បានរកឃើញសេដ្ឋកិច្ចរបស់ប្រទេសក្រិកថា ជាគ្រោះថ្នាក់ដ៏សំខាន់មួយចំពោះកំណើនពិភពលោក។ ការព្យាកររបស់ខ្លួន គឺផ្អែកទៅលើការប៉ាន់ស្មានថា នឹងមានការធូរស្បើយនូវប្រាក់បំណុលក្នុងទំហំធំសម្រាប់ប្រទេសក្រិក ដែលបច្ចុប្បន្នស្ថិតនៅឆ្ងាយពីការពិតខ្លាំងណាស់។
NIESR បាននិយាយថា វិបត្ដិចុងក្រោយបំផុតរបស់ប្រទេសក្រិក បានធ្វើឲ្យសកម្មឡើងវិញនូវប្រាក់បំណុលអំពីថា តើសហភាពរូបិយប័ណ្ណរបស់តំបន់ចាយប្រាក់អឺរ៉ូនេះ អាចទទួលបានជោគជ័យដោយពុំមានការធ្វើសមាហរណកម្មឲ្យបានខ្លាំង ឬក៏យ៉ាងណានោះ។ NIESR ក៏បាននិយាយផងដែរថា ការបង្អស់ល្បឿននៅចិន អាចគំរាមដល់ការព្យាកររបស់ខ្លួន ដែលតួលេខជាផ្លូវការបានទស្សន៍ទាយកំណើនចំនួន៧ភាគរយ ចំណែកអ្នកវិភាគមួយចំនួនបាននិយាយថា កំណើន៣ភាគរយ គឺទំនងជាង។
NIESR រំពឹងថា អតិផរណានឹងស្ថិតនៅប្រហែលកម្រិតសូន្យរហូតដល់ដំណាច់ឆ្នាំ ដោយសារតម្លៃប្រេងធ្លាក់ទាប និងប្រាក់ផោនឡើងថ្លៃ នៅប្រទេសអង់គ្លេស ប៉ុន្ដែថា វានឹងវិលត្រឡប់ទៅរកគោលដៅរបស់ធនាគារអង់គ្លេស ប្រហែល២ភាគរយនៅក្នុងមួយឆ្នាំ នៅឆ្នាំ២០១៧។ លោក Simon Kirby អ្នកសេដ្ឋកិច្ចនៅវិទ្យាស្ថានបាននិយាយថា នេះគឺជាគ្រោះថ្នាក់ដ៏សំខាន់នៅក្នុងស្រុក។ លោក Kirby បានបន្ដថា ការកើនឡើងនៅក្នុងតម្លៃនៃប្រាក់ Sterling របស់អង់គ្លេស និងការធ្លាក់នៅក្នុងតម្លៃប្រេង គឺមានលក្ខណៈបណ្ដោះអាសន្នតែប៉ុណ្ណោះ។ មជ្ឈមណ្ឌលផ្ដល់គំនិតនេះ រំពឹងថា ធនាគារអង់គ្លេស នៅទីបញ្ចប់នឹងដំឡើងអត្រាការប្រាក់នៅក្នុងខែកុម្ភៈ នៅឆ្នាំខាងមុខ៕
BBC News
NIESRទស្សន៍ទាយថា កំណើនសេដ្ឋកិច្ចពិភពលោកមានសភាពយឺត
0 Comments