ភ្នំពេញ ៖ ស្ត្រីខ្មែរចំនួន៥រូបដែលមានបំណងចង់រៀបការជាមួយបុរសជនជាតិចិននោះ ត្រូវបានណែនាំអំពីហានិភ័យមួយចំនួនដែលអាចកើតមានក្រោយពេលរៀបការ ប៉ុន្តែបើទោះបីជាទទួលបានការណែនាំបែបនេះក្តី ស្ត្រីទាំងនោះនៅតែបង្ខំចិត្តរៀបការដដែល នេះបើតាមការឲ្យដឹងពីមន្ត្រីអ្នកនាំពាក្យ។
លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិបានថ្លែងប្រាប់កម្ពុជាថ្មីកាលពីវេលាម៉ោង៤និង១៥នាទី ថ្ងៃទី០៩ ខែកញ្ញា ឆ្នាំ២០១៥មុននេះថា តាមការណែនាំរបស់ឯកឧត្ដមឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិ ,ឯកឧត្ដម ឡុង វិសាលោ រដ្ឋលេខាធិការក្រសួងការបរទេស និងសហ-ប្រតិបត្តិការអន្តរជាតិ បានអញ្ជើញនារីខ្មែរចំនួន៥រូប ដែលបានដាក់ពាក្យសុំច្បាប់អនុញ្ញាតរៀបការជាមួយបុរសជនជាតិចិន មកជម្រាបជូនពីហានិភ័យដែលបាននិងកំពុងកើតមានចំពោះស្ត្រីខ្មែរក្នុងពេលបច្ចុប្បន្នឲ្យពួកគេបានដឹង ក្នុងគោលបំណងឲ្យមានការពិនិត្យពិចារណាឲ្យបានហ្មត់ចត់។
លោក ជុំ សុន្ទរី បញ្ជាក់ថា សាមីខ្លួនទាំង៥រូប បានធ្វើកិច្ចសន្យាជាលាយលក្ខណ៍អក្សរ ដោយបានគូសបញ្ជាក់ថា “បានយល់ដឹងតាមរយៈវិទ្យុ និងតាមរយៈការអានកាសែតអំពីហានិភ័យដែលកើតមានក្នុងករណីជួញដូរស្ត្រីខ្មែរ តាមរយៈមេខ្យល់នាំទៅរស់នៅប្រទេសចិន” និងថា “នៅតែស្ម័គ្រចិត្តរៀបការ”។ ក្រសួងការបរទេស និងសហប្រតិបត្តិការអន្តរជាតិពុំអាចធ្វើការឃាត់ឃាំងបានឡើយ ដោយនោះជាសិទ្ធិអាពាហ៍ពិពាហ៍របស់ពលរដ្ឋខ្មែរ ដែលមានចែងក្នុងច្បាប់រដ្ឋធម្មនុញ្ញកម្ពុជា។
សូមបញ្ជាក់ថា រយៈពេលប៉ុន្មានខែចុងក្រោយនេះ ស្ត្រីខ្មែរដែលបានរៀបការជាមួយបុរសជនជាតិចិន ទៅរស់នៅប្រទេសចិននោះ ត្រូវបានអគ្គកុងស៊ុលខ្មែរប្រចាំនៅប្រទេសចិនជួយធ្វើអន្តរាគមន៍ឲ្យត្រឡប់មកមាតុប្រទេសវិញជាបន្តបន្ទាប់ ហើយទន្ទឹមនឹងការជួយធ្វើអន្តរាគមន៍នេះដែរ រដ្ឋមន្ត្រីការបរទេសកម្ពុជាបានធ្វើការអំពាវនាវឲ្យប្រជាពលរដ្ឋខ្មែរមានការប្រុងប្រយ័ត្នចំពោះមេខ្យល់ដែលតែងតែនាំឲ្យរៀបការជាមួយជនជាតិចិននេះ៕
ស្ត្រីខ្មែរ៥រូបនៅតែបង្ខំចិត្តរៀបការជាមួយបុរសជនជាតិចិន
0 Comments