ពោធិ៍សាត់ ៖ រថយន្តក្រុងមួយគ្រឿងរបស់ក្រុមហ៊ុនហុងលី ពណ៌សពាក់ស្លាកលេខភ្នំពេញ3A -43-59បានបើកបុកម៉ូតូពីស៊េរី125ពណ៌ខ្មៅពាក់ស្លាកលេខពោធិ៍សាត់1A. 55-10 ដែលសណ្ដោងរ៉ឺម៉កដឹកត្រី ចំពីក្រោយបណ្ដាលឲ្យអ្នកបើកម៉ូតូរបួសធ្ងន់ម្នាក់។ ចំណែករថយន្តបង្កនោះបានធ្លាក់ចេញផ្លូវប្រាសចូលប្រឡាយទៅខាងស្ដាំដៃដេកទីនោះតែម្ដង ដោយអ្នកបើកនិងអ្នកជិះរួមដំណើរលើរថយន្តនោះពុំមានគ្រោះថ្នាក់ឡើយ។
ហេតុការណ៍នេះបានកើតឡើងកាលពីវេលាម៉ោង៣និង៣០នាទីទៀបភ្លឺ ថ្ងៃទី៧ ខែកញ្ញា ឆ្នាំ២០១៥ ត្រង់ចន្លោះបង្គោលគីឡូម៉ែត្រលេខ១៥៧-១៥៨ទល់មុខក្រុមហ៊ុនថៃអ៊ីស៊ីក្នុងភូមិទទឹង ឃុំអន្លង់ត្នោត ស្រុកក្រគរ ខេត្តពោធិ៍សាត់។
ជនរងគ្រោះរបួសធ្ងន់ក្នុងឧប្បត្តិហេតុនេះ ត្រូវបានលោកស៊េរីង គឹមហួ នាយប៉ុស្តិ៍រដ្ឋបាលឃុំអន្លង់ត្នោត ប្រាប់ថា ឈ្មោះគៀត អន ភេទប្រុស អាយុ៥៣ឆ្នាំ រស់នៅភូមិផ្សា ឃុំអន្លង់ត្នោត ហើយត្រូវបានបញ្ជូនទៅកាន់មន្ទីរពេទ្យភ្លាមៗផងដែរ៕
រថយន្តក្រុងបុកម៉ូតូដឹកត្រីសណ្ដោងរ៉ឺម៉កពីក្រោយរបួសម្នាក់ រួចទៅប្រាសដេកក្បែរប្រឡាយ
0 Comments