ភ្នំពេញ ៖ ល្បែងក្រឡុកខ្លាឃ្លោកដុះស្លែមួយកន្លែងចាក់លុយរាប់រយដុល្លារ នៅក្នុងបុរីកីឡាត្រូវបានសមត្ថកិច្ចចុះបង្ក្រាបកាលពីរសៀលថ្ងៃទី២៤ ខែកញ្ញា ឆ្នាំ២០១៥នៅអគារបុរីកីឡាទី៤ សង្កាត់វាលវង់ ខណ្ឌ៧មករា រាជធានីភ្នំពេញ ប៉ុន្តែអ្នកលេងដឹងខ្យល់មុនថា មានការចុះបង្ក្រាបនាំគ្នារត់ គេចខ្លួនអស់នៅសល់តែមេអ្នកក្រឡុកនាំមកដុះក្អែលចេញម្តង។
មេក្លាឃ្លោកត្រូវបានគេស្គាល់ឈ្មោះចាន់ ណា អាយុ៥៤ឆ្នាំ ស្នាក់នៅបុរីកីឡាទី៤ ជាន់ទី៤ មុខរបរក្រឡុកខ្លាឃ្លោក ដុះស្លែរាប់ឆ្នាំមកហើយមិនដែលមានអ្នកណាហ៊ានទៅក្បែរទេដោយសារតែ មេរូបនោះបានសែនព្រានជាមួយអ្នកជំនាញត្រូវ។
ប្រភពពីសមត្ថកិច្ចបានឲ្យដឹងថា ក្រោយមានការរាយការណ៍ និងប្តឹងពីទីតាំងល្បែងខ្លាឃ្លោក ដុះស្លែមួយកន្លែងនៅក្រោយអគារបុរីកីឡាទី៤ លោកនេត ស៊ីថុនអធិការនគរបាលខណ្ឌ៧មករាបានចាត់កម្លាំងនគរបាលព្រហ្មទណ្ឌចុះទៅបង្ក្រាបឈានដល់ការចាប់ខ្លួនស្ត្រីខាងលើរួមជាមួយវត្ថុតាង ខណៈកំពុងអង្គុយលេងជាក់ស្តែងដោយរឹបអូសក្រដាសខ្លាឃ្លោក លុយ១០១០ដុល្លារ និងលុយខ្មែរ៤០ម៉ឺនរៀលផងដែរ ។
ប្រភពដោយឡែកមួយទៀតបានឲ្យដឹងថា អ្នកលេងជាច្រើនអ្នកដែលវក់នឹងល្បែងខ្លាឃ្លោកនេះ មុនការបង្ក្រាបហាក់មានការដឹងតម្រុយមុនបាននាំគ្នារត់គេចអស់នៅសល់តែម្ចាស់ អ្នកក្រឡុក ពាក់ព័ន្ធទៅនឹងបញ្ហានេះត្រូវបានអ្នកដឹងហេតុនិយាយថា អាចដឹងខ្យល់មុនទើបគេចអស់បែបនេះ។
បច្ចុប្បន្នជនសង្ស័យ និងវត្ថុតាងត្រូវបញ្ជូនទៅអធិការដ្ឋាននគរបាលខណ្ឌ៧មករា ដើម្បីចាត់ការតាមច្បាប់៕
ល្បែងក្រឡុកខ្លាឃ្លោកដុះស្លែនៅប្លុកបុរីកីឡាត្រូវបានបង្ក្រាប
0 Comments