ភ្នំពេញ ៖ ជនសង្ស័យម្នាក់ក្នុងចំណោមបក្ខពួក៦នាក់ ត្រូវបាននគរបាលសហការជាមួយប្រជាពលរដ្ឋដេញចាប់ខ្លួនបានភ្លាមៗក្រោយពីពួកគេបាននាំគ្នាធ្វើសកម្មភាពជិះម៉ូតូដេញកាប់ជនរងគ្រោះពីរនាក់កំពុងជិះម៉ូតូពេលនោះជនរងគ្រោះស្រែកថា ចោរផ្អើលដល់សមត្ថកិច្ចទើបចាប់ខ្លួនបានម្នាក់ ឯ៥នាក់ទៀតបាននាំគ្នាគេចខ្លួនបាត់។
ករណីនេះបានកើតឡើងនៅវេលាម៉ោង២២និង៤០នាទីយប់ ថ្ងៃទី២៣ ខែកញ្ញា ឆ្នាំ២០១៥តាមបណ្ដោយផ្លូវ២០១១ ស្ថិតភូមិតាងួន សង្កាត់កាកាប ខណ្ឌពោធិសែនជ័យ។
ជនរងគ្រោះទាំង២នាក់នោះមាន ១-ឈ្មោះ សែន មករា អាយុ២៦ឆ្នាំ និង២-ឈ្មោះ ឃួន ឧត្តម អាយុ២១ឆ្នាំ ទាំង២នាក់មានមុខរបរជាកម្មករសំណង់ និងស្នាក់នៅជាមួយគ្នានៅក្នុងភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ។
ជនសង្ស័យមានឈ្មោះ ឈាង សិទ្ឋ ភេទប្រុសអាយុ២៣ឆ្នាំ មានមុខរបរជាកម្មកររោងចក្រ ស្នាក់នៅភូមិតាងួន សង្កាត់កាកាប ខណ្ឌពោធិ៍សែនជ័យ និងមានស្រុកកំណើតនៅក្នុងភូមិព្រៃទទឹង ឃុំព្រៃទទឹង ស្រុកព្រៃឈរ ខេត្តកំពង់ចាម។
តាមសម្ដីរបស់ជនរងគ្រោះបានឲ្យដឹងថា នៅមុនពេលកើតហេតុខ្លួន រួមជាមួយមិត្តភ័ក្ដិប្រុសម្នាក់បានជិះម៉ូតូឌ្រីមសេ១២៥ មួយគ្រឿង ពណ៌ខ្មៅ ពាក់ស្លាកលេខព្រៃវែង1A-9535 តាមបណ្ដោយផ្លូវ២០១១ ក្នុងល្បឿនលឿន ដោយគោលបំណងប្រញាប់ទៅយកបងស្រីទៅធ្វើការ ខណៈដែលកំពុងតែជិះនោះ ក៏ស្រាប់តែមានជនសង្ស័យមានគ្នា៦នាក់ ជិះម៉ូតូ២គ្រឿង ដោយនៅក្នុងដៃប្រដាប់ដោយដាវ២ដើម និងកាំបិតប៉័ងតោចំនួន១ បានជិះដេញមកតាមពីក្រោយ ពេលឃើញដូចនេះមានការភិតភ័យ បានបន្ថែមល្បឿនជិះគេចពីជនសង្ស័យទាំងនោះ រហូតជិះមកដល់ចំណុចកើតហេតុត្រង់ស្តុប២០០៤ ក៏ត្រូវជនសង្ស័យទាំងនោះស្ទាក់ផ្លូវជាប់ ក៏ទាញដំបង និងកាំបិតមកព្រួតវាយលើជនរងគ្រោះទាំង២នាក់នោះ បណ្ដាលឲ្យជនរងគ្រោះម្នាក់ត្រូវមួយដំបងបែកក្បាល ហូរឈាម ធ្វើឲ្យជនរងគ្រោះស្រែកថា ចោរៗ បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចេញមកជួយអន្តរាគមន៍ដេញចាប់ជនសង្ស័យទាំងនោះបានម្នាក់ រួមនឹងម៉ូតូឌ្រីមសេ១២៥ មួយគ្រឿងយកមកប៉ុស្តិ៍កាកាប។ ចំណែកជនសង្ស័យ៥នាក់ទៀត បានរត់គេចខ្លួនបាត់ស្រមោលតែម្តង។
ចំពោះករណីនេះជនសង្ស័យបាននិយាយថា ពួកគេមិនមានចេតនាដេញវាយប្លន់នោះទេ គឺជាការដេញវាយដោយគំនុំ តែជនរងគ្រោះថាខ្លួនមិនដែលមានគំនុំអីជាមួយអ្នកណាឡើយនាពេលកន្លងមកនោះ៕
ជនសង្ស័យ១ក្រុមមានគ្នា៦នាក់ដេញកាប់ប្លន់ម៉ូតូជនរងគ្រោះ
0 Comments