ភ្នំពេញ ៖ ដែកស្មិតជាផលិតផលនាំចូលមកពីប្រទេសសាំងហ្គាពួរ និងប្រទេសថៃតាមរយៈក្រុមហ៊ុនញូប្រដាកសិនជាច្រើនឆ្នាំមកហើយ។ ដែកស្មិតត្រូវបានគេស្គាល់ច្រើនលើការច្នៃជាបង្កាន់ដៃជណ្ដើរផ្ទះ ជាបង្អួច ជាគ្រែ ជាក្លោងទ្វារធំៗបានយ៉ាងប្រណិត។ តាមការរៀបរាប់របស់លោកឃាង រតនា អ្នកកាន់គម្រោងផលិតពីដែកស្មិតបានឲ្យដឹងតាមរយៈទូរស័ព្ទថា បច្ចុប្បន្ននេះក្រុមហ៊ុនបានធ្វើការពង្រីកទីផ្សារការច្នៃដែកស្មិតបានចំនួន២ខេត្តមានខេត្តព្រះសីហនុ និងខេត្តសៀមរាប។
លោករតនាបន្តថា ការច្នៃដែកស្មិតទៅតាមលំនៅឋាន ក្រៅពីផលិតជាបង្អួច , ទ្វារ , បង្កាន់ដៃជណ្ដើរផ្ទះ, គ្រែ ក៏នៅមានការច្នៃជាក្បាច់ក្បូរជាប់នឹងជញ្ជាំងក៏មានដែរដោយគិតជាម៉ែត្រការ៉េដែលមានតម្លៃខ្ពស់បំផុតក្នុងមួយម៉ែត្រការ៉េថ្លៃ៧៥០ដុល្លារ។
ដែកស្មិតនេះ ជាប្រភេទដែកទន់អាចបត់ ឬពត់ទៅតាមតម្រូវការចង់បានដែលខុសគ្នាទៅនឹងដែកថែបមានភាពរឹងនោះ។
លោកឃាង រតនាបន្តទៀតថា ដូចជាក្លោងទ្វារដែលឃើញក្នុងរូបភាពខាងលើនេះជាផលិតផលពីដែកស្មិតទទួលបានការគាំទ្រច្រើនពីអតិថិជន ដោយសារផលិតផលដែកនេះធានាគុណភាពខ្ពស់ចាប់ពី៥ឆ្នាំទៅដល់២០ឆ្នាំ ហើយអតិថិជនអាចប្ដូរផ្លាស់ពណ៌បានពេលដែលប្រើប្រាស់ផលិតផលដែលស្មិតទាំងនោះហើយអស់រយៈពេលយូរឆ្នាំក៏ដោយ ក៏ក្រុមហ៊ុនអាចទៅប្ដូរលាបជាថ្មីទៀតបានតាមការកុម្ម៉ង់ទៅនឹងចំណង់ចំណូលចិត្តរបស់អ្នកប្រើប្រាស់ផងដែរ៕
ផលិតផលពីដែកស្មិតកំពុងបានពង្រីកទីផ្សារក្នុងស្រុក
0 Comments