ពោធិ៍សាត់ ៖ ក្រុមប្រព្រឹត្តអំពើចោរកម្ម ចោរលួចទ្រព្យសម្បត្តិប្រជាពលរដ្ឋម្នាក់ក្នុងចំណោមបក្ខពួក៣នាក់ ត្រូវបាននគរបាលស្រុកក្រគរស្រាវជ្រាវតាមចាប់ខ្លួនបាន ក្រោយពីទទួលបានពាក្យបណ្ដឹងពីជនរងគ្រោះរួចមក។
លោក អែម រុន អធិការនគរបាលស្រុកក្រគរបានឲ្យដឹងថា ជនសង្ស័យ ដែលឃាត់ខ្លួនបានម្នាក់នោះ ឈ្មោះនឹល ពុទ្ធា អាយុ៣១ឆ្នាំភេទប្រុសរស់នៅភូមិផ្សា ឃុំអន្លង់ត្នោត ស្រុកក្រគរ ខេត្តពោធិ៍សាត់ ដោយតាមបណ្ដឹងជនរងគ្រោះឈ្មោះ នី វ៉ាត អាយុ៤៩ឆ្នាំនៅភូមិជាមួយគ្នា។ បានធ្វើសកម្មភាពចូលលួចទ្រព្យសម្បត្តិប្រជាពលរដ្ឋកាលពីវេលាម៉ោង១២និង៣០នាទីឈានចូលថ្ងៃទី២២ ខែកញ្ញា ឆ្នាំ២០១៥ នៅក្នុងភូមិកណ្ដាល ឃុំអន្លង់ត្នោត ស្រុកក្រគរ ខេត្តពោធិ៍សាត់។
លោកបន្តថា ក្រោយពីធ្វើសកម្មភាពលួចទ្រព្យសម្បត្តិ របស់ជនរងគ្រោះមានពាក្យបណ្ដឹងរបស់ជនរងគ្រោះដល់មន្ត្រីនគរបាលយុត្តិធម៌ភ្លាម លោកក៏បានឲ្យកម្លាំងបើកការស្រាវជ្រាវរហូតដល់ចាប់ខ្លួននៅម៉ោង១១និង៣០នាទីថ្ងៃទី២២កញ្ញាយកមកកាន់អធិការដ្ឋាននគរបាលស្រុកក្រគរហើយសួរនាំជនសង្ស័យដោយគេបានសារភាពថា ខ្លួនពិតជាបានប្រព្រឹត្តចូលលូចទ្រព្យសម្បត្តិទីនោះពិតប្រាកដមែនដោយមានគ្នាបីនាក់ហើយគេចខ្លួន២នាក់។
លោក អែម រុន បន្តថា ទ្រព្យសម្បត្តិដែលចោរនោះលួចយករួមមាន ក្រវិល១គូ ខ្សែ.ក នាឡិកា ខោអាវមួយចំនួនរួមនឹងលុយ១០ម៉ឺនរៀល ហើយកម្លាំងនគរបាលរបស់លោកបានកំពុងបន្តតាមចាប់បក្ខពួកគេពីនាក់ទៀត ដោយខណៈនេះជនសង្ស័យបានកំពុងបំពេញសំណុំរឿងទៅស្នងការចាត់ការបន្តដើម្បីផ្ដន្ទាទោសតាមផ្លូវច្បាប់៕
ចាប់បានចោរម្នាក់ក្នុងចំណោម៣នាក់លួចពីយប់ចាប់បានពេលព្រឹក
0 Comments