ក្រុមអាជ្ញាធរ អារ៉ាប៊ីសាអ៊ូឌីត បានរឹតបន្តឹងផ្នែកសន្តិសុខ មុនពេលប្រារព្ធពិធីបុណ្យសាសនាប្រចាំឆ្នាំហាជិ ដោយក្នុងនោះកងកម្លាំងសន្តិសុខប្រហែល១សែននាក់ ត្រូវបានដាក់ពង្រាយដើម្បីគ្រប់គ្រងការធ្វើធម្មយាត្រាទៅកាន់ទីក្រុងបរិសុទ្ធម៉េកកា ជាកន្លែងដែលគេរៀបចំពិធីជួបជុំជនមូស្លីមប្រចាំឆ្នាំនៅសប្តាហ៍ក្រោយនេះ។
ក្រុមសមាជិកមកពីអង្គភាពប្រឆាំងនឹងអំពើភេរវកម្ម មន្ត្រីនគរបាលចរាចរណ៍ និងសមាជិកការពារជនស៊ីវិល ត្រូវបានដាក់ពង្រាយនៅចំណុចគោលដៅនីមួយៗនៅទូទាំងទីក្រុង។ មាននូវទាហានមកពីកងកម្លាំងការពារជាតិ និងកងទ័ពផងដែរ។
ខណៈនោះដែរ ក្រុមអាជ្ញាធរអារ៉ាប៊ីសាអូឌីត បានធ្វើការក្រើនរំឭកផងដែរដល់ក្រុមអ្នកធម្មយាត្រាដែលនឹងចូលរួមពិធីបុណ្យសាសនាហាជិ នៅទីក្រុងម៉េកកា នាសប្តាហ៍ក្រោយនេះ ថាពួកគេមិនត្រូវយកការជួបជុំប្រចាំឆ្នាំរបស់សាសនិកឥស្លាម ប្រើប្រាស់ក្នុងបុព្វហេតុនយោបាយជាដាច់ខាត ហើយក្រុមអាជ្ញាធរក៏បានបង្ហាញនូវក្តីកង្វល់មួយផងដែរ ថាចលាចលផ្នែកសាសនា នឹងអាចនាំឲ្យមានការវាយប្រហារ ឬប៉ះពាល់ដល់ជម្លោះផ្ទៃក្នុង។
ក្នុងឯកសណ្ឋានអាវទីទៃពីគ្នា និងនិយាយច្រើនភាសា ក្រុមអ្នកធម្មយាត្រារាប់ម៉ឺននាក់ បានពពាក់ពពានគ្នានៅនៅឯវិហាហ្គ្រែន របស់ទីក្រុងម៉េកកា សម្រាប់ពិធីបួងសួងមួយដល់ព្រះអាឡា។
សូមបញ្ជាក់ថា ភាពចលាចល និងសង្គ្រាមនិកាយសាសនា រវាងពួកមូស្លីមនិកាយស៊ុននី និងនិកាយស៊ីអ៊ីត បានយាយីដល់បណ្តាប្រទេសអារ៉ាប់ជាច្រើន ចាប់តាំងពីការបះបោរឆ្នាំ២០១១មក ជាហេតុធ្វើឲ្យសង្គ្រាមកាន់តែស្រួចស្រាល់ឡើង ក្នុងនោះគេឃើញ ប្រទេសយេមែន និងលីប៊ី បានចូលរួមជាមួយស៊ីរី និងអ៊ីរ៉ាក់ ធ្លាក់ទៅក្នុងសង្គ្រាមស៊ីវិល។ មនុស្សប្រហែល១.២លាននាក់ បាត់បង់ជីវិត មកទល់នឹងពេលនេះ ក្នុងឆ្នាំនេះ៕
ក្រុមអាជ្ញាធរអារ៉ាប៊ីសាអ៊ូឌីតរឹតបន្តឹងផ្នែកសន្តិសុខមុនពេលពិធីបុណ្យសាសនាហាជិ ចាប់ផ្តើម
0 Comments