លោកឧកញ៉ា លី គឹមឈុន អតីតប្រធានក្លិបស្វាយរៀងអេហ្វស៊ី (ព្រះខ័នរាជ) បានទទួលមរណភាពនៅព្រឹកថ្ងៃទី២៣ ខែកញ្ញា ម្សិលមិញនេះដោយរោគាពាធ ហើយសពរបស់លោកតម្កល់នៅគេហដ្ឋាននៅម្ដុំផ្សាអូឬស្សី។
លោក សំ វ៉ាន់ដេត គ្រូបង្វឹកប្រចាំក្លិបស្វាយរៀងអែហ្វស៊ី បានសរសេរនៅលើហ្វេសប៊ុករបស់លោកថា៖ «ព្រឹកនេះ (ថ្ងៃពុធម្សិលមិញ) ក្រុមបាល់ទាត់ខេត្តស្វាយរៀង មានទុក្ខដ៏ក្រៀមក្រំបំផុតដែលលោកប្រធានក្លិបចាស់ លោក លី គឹមឈុន បានទទួលមរណៈភាពដោយរោគាពាធ។ យើងទាំងអស់គ្នាពិតជាសោកស្ដាយពន់ពេកគ្មានអ្វីប្រៀបផ្ទឹមបាននិងសូមចូលរួមកាន់មរណៈទុក្ខដ៏ធំធេងនេះ។ យើងទាំងអស់គ្នាជាថ្នាក់ដឹកនាំ ជាគ្រូ ជាកីឡាករទាំងអស់សូមឧទ្ទិសជូនដល់វិញ្ញាណក្ខន្ធលោកប្រធានអោយបានសុគតិភព ក្នុងឋានបរមសុខ»។
គេនៅចាំបានថាលោកឧកញ៉ា លី គឹមឈុន បានឈរឈ្មោះធ្វើជាប្រធានក្លិបព្រះខ័នរាជតាំងពីបង្កើតឡើងដំបូងនៅឆ្នាំ ២០០៧ មក។ ប៉ុន្ដែនៅឆ្នាំ ២០១៣ លោកបានផ្ទេរតំណែងប្រធានក្លិបជូនឯកឧត្តម ឌី វិជ្ជា គ្រប់គ្រងជំនួសវិញ ដោយសារតែលោកឧកញ៉ាមានជំងឺប្រចាំកាយ មិនអាចគ្រប់គ្រងក្លិបបានជាបន្ត។ គ្រានោះក្លិបក៏បានប្ដូរឈ្មោះពីព្រះខ័នរាជ មកជាស្វាយរៀងអែហ្វស៊ី រហូតទល់សព្វថ្ងៃនេះ។
ក្នុងយុគ្គសម័យក្រោមការគ្រប់គ្រងរបស់លោកឧកញ៉ា លី គឹមឈុន ក្រុមព្រះខ័នរាជ ជំនាន់នោះធ្លាប់ឈ្នះជើងឯករងក្នុងពានរង្វាន់សម្ដេចតេជោ ហ៊ុន សែន ឬ ហៅថា Hun Sen Cup ក្នុងឆ្នាំ ២០០៨ ហើយឆ្នាំ ២០០៩ និង ២០១០ ឈរចំណាត់ថ្នាក់លេខ៣ ឆ្នាំ ២០១១ និង ២០១២ ឈ្នះជើងឯក ២ ឆ្នាំជាប់គ្នា។ ក្រៅពីនោះធ្លាប់ឈ្នះជើងឯករងក្នុងពាន Binh Phuoc TV Cup នៅឆ្នាំ ២០១២ ផងដែរ។ចំពោះពានរង្វាន់មិត្តហ្វូនខេមបូឌានលីក ព្រះខ័នរាជ ធ្លាប់ឈ្នះជើងឯករងកាលឆ្នាំ២០១០ បន្ទាប់ពីចាញ់ភ្នំពេញក្រោន ៣-២ នៅវគ្គផ្ដាច់ព្រ័ត្រ ខណៈដែល ឆ្នាំ ២០១១ និង ២០១២ ជាប់ចំណាត់ថ្នាក់លេខ៣៕
អតីតប្រធានក្លិបស្វាយរៀងអែហ្វស៊ី ទទួលមរណភាពដោយរោគាពាធកាលពីព្រឹកថ្ងៃពុធ
0 Comments