ពោធិ៍សាត់ ៖ ខុសគ្នារយៈពេលតែជាងបួនម៉ោងសោះមានករណីកើតមានអំពើហិង្សាដល់ទៅករណីនៅក្នុងស្រុកពីផ្សេងគ្នា ដោយមូលហេតុតែម្យ៉ាងគឺផឹកសីុស្រវឹងចាប់ផ្ដើមមានអំនួតដាក់គ្នារៀងខ្លួន ក៏ម្ខាងក្លាយជាជនរងគ្រោះនិងម្ខាងទៀតក្លាយជាទោសទាន់ប្រឈមនិងផ្លូវច្បាប់ទៅរស់នៅក្នុងគុក។
បើតាមលោក ធៀង ឡេង អធិការនគរបាលស្រុកវាលវែងបានប្រាប់អ្នកយកព័ត៌មានថា នៅថ្ងៃទី២២ ខែកញ្ញា ឆ្នាំ២០១៥ វេលាម៉ោង៣និង៥០នាទី មានករណីហិង្សាដោយចេតនាមួយបានកើតឡើងនៅចំណុចចម្ការចេក ភូមិសំឡាញ ឃុំក្រពើពីរ ដែលបង្កឡើងដោយឈ្មោះ ឡុច ឡូ ហៅក្លូ ភេទប្រុស អាយុ៣៨ឆ្នាំ រស់នៅភូមិ/ឃុំខាងលើ គឺបានវាយទៅលើឈ្មោះ ហ៊ុយ ហ៊ាន ភេទប្រុស អាយុ៣៥ឆ្នាំ ដែលរស់នៅភូមិ/ឃុំខាងលើ ធ្វើឲ្យរងរបួស។
លោកអធិការបន្តថា បើតាមកំលាំងនគរបាលប៉ុស្តិ៍រដ្ឋបាលលោកចុះដល់ទីតាំងកើតហេតុដើម្បីស្រាវជ្រាវនិងឃាត់ខ្លួននោះឲ្យដឹងថា មូលហេតុដែលនាំឲ្យកើតមានអំពើហិង្សានេះ គឺមកពីការនាំគ្នាផឹកស៊ី លុះដល់ពេលស្រវឹងរវាងជនសង្ស័យនិងជនរងគ្រោះ ក៏ចាប់ផ្ដើមអួតយកឈ្នះរៀងខ្លួន ធ្វើឲ្យជនដៃដល់អត់ទ្រាំមិនបានក៏បានប្រើអំពើហិង្សាទៅលើជនរងគ្រោះឲ្យរងរបួសតែម្ដង។
ក្រោយពីមានហេតុការណ៍នេះភ្លាមកម្លាំងនគរបាលប៉ុស្តិ៍ក៏ចុះឃាត់ខ្លួនជនសង្ស័យទៅកាន់អធិការដ្ឋាននគរបាលស្រុកវាលវែង ដើម្បីកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធីច្បាប់។
ករណីអំពើហិង្សាផ្ដើមពីផឹកស្រាស្រវឹងនេះកើតមាននៅស្រុកវាលវែងនេះទើបតែរួចបានប្រមាណជាជាងបួនម៉ោងក៏កើតមានមួយករណីទៀត បើតាមលោក យឿន មន្ត្រីនគរបាលស្រុកបាកានបានឲ្យដឹងថា មានអំពើហិង្សាមួយបានកើតឡើងនៅវេលាម៉ោង៦និង៣០នាទីយប់ ថ្ងៃទី២២ ខែកញ្ញា ឆ្នាំ២០១៥ ក្នុងភូមិក្រោលក្របី ឃុំត្រពាំងជង ស្រុកបាកាន ខេត្តពោធិ៍សាត់ ដែលបង្កឡើងដោយជនសង្ស័យឈ្មោះ កែវ សុផល ហៅសឿន ភេទប្រុស អាយុ៥៦ឆ្នាំ រស់នៅភូមិ/ឃុំកើតហេតុខាងលើ។ ដោយបានទាញដែកច្រត់របស់ជនរងគ្រោះឈ្មោះ ឡុង សែ អាយុ៤៨ឆ្នាំ ជាជនពិការជើងខាងស្តាំ បានវាយចំត្រង់ក្បាលបណ្ដាលឲ្យបែកក្បាលរងរបួសធ្ងន់ ហើយត្រូវបានបញ្ជូនទៅកាន់មណ្ឌលសុខភាពនៅឃុំបឹងខ្នារ ស្រុកបាកាន ខេត្តពោធិ៍សាត់ ដោយក្រោយពីធ្វើសកម្មភាពនេះភ្លាមៗដែរ នគរបាលខាងឃុំត្រពាំងជងក៏បានឃាត់ខ្លួនជនបង្ក ដើម្បីបញ្ជូនទៅតុលាការ ដែលករណីនេះបង្កឡើងដោយសារការផឹកស៊ីទាស់សំដីគ្នា។
បើតាមលោក សាង ផលបុណ្យ ប្រធានមន្ទីរបង្អែកស្រុកបាកានបានប្រាប់ឲ្យដឹងនៅវេលាម៉ោង១០ព្រឹក ថ្ងៃទី២៣ ខែកញ្ញា ឆ្នាំ២០១៥នេះថា ជនរងគ្រោះត្រូវបានជនបង្កវាយរយៈក្បាលដេរចំនួន៦ថ្នេរ តែសំណាងល្អហើយដែលត្រូវបានដឹកយកទៅមន្ទីរពេទ្យទាន់ពេល កុំអីអាចប៉ះពាល់ដល់ក្បាលធ្ងន់ធ្ងរខ្លាំងជាងនេះទៀត៕
ខុសគ្នាជាង៤ម៉ោងសោះអំពើហិង្សាពីករណីម្ខាងរបួសម្ខាងជាប់គុកដោយសារតែស្រា
0 Comments