បន្ទាយមានជ័យ ៖ ប្រជាពលរដ្ឋខេត្តបន្ទាយមានជ័យកំពុងមានក្តីបារម្ភគ្រាដែលអ្នកស្លាប់និងរបួសមានការកើនឡើងក្នុងខែសីហា ឆ្នាំ២០១៥ដោយគ្រោះថ្នាក់ចរាចរណ៍លើដងផ្លូវ។
បើតាមរបាយការរបស់ការិយាល័យ ចរាចរណ៍ផ្លូវគោកនៃស្នងការដ្ឋាននគរបាលខេត្តបន្ទាយមានជ័យបានឲ្យដឹងថា សម្រាប់ខែសីហាគ្រោះថ្នាក់ចរាចរណ៍បានសម្លាប់មនុស្សអស់ ចំនួន១៥នាក់ ស្រី៤នាក់កើនដល់១០នាក់បើធៀបនឹងខែកក្កដា របួសធ្ងន់១៨នាក់ស្រី២នាក់ កើន១២ករណីនិងរបួសស្រាល០៨នាក់ស្រី ០៦នាក់កើន០៥ករណី។ ខូចខាតម៉ូតូធ្ងន់ស្រាល២២គ្រឿងរថយន្តតូចធំ១២គ្រឿង។
លោកសោម គឹមសួគ៌ ប្រធានការិយាល័យចរាចរណ៍ផ្លូវគោកខេត្តបន្ទាយមានជ័យបានលើកឡើងថា មូលហេតុនៃគ្រោះថ្នាក់ចរាចរណ៍ភាគច្រើនកើតទ្បើងបណ្ដាលមកពីអ្នកបើកបរប្រើល្បឿនហួសកំណត់ និងការប្រើប្រាស់គ្រឿងស្រវឹង។ ក្នុងករណីខ្លះក៏បណ្ដាលមកពីកត្តា ផ្លូវថ្នល់ផងដែរ ដូចជាកំណាត់ផ្លូវខ្លះពុំបានដាក់ផ្លាកសញ្ញាកំណត់ល្បឿនបើកបរច្បាស់លាស់។ ក្រៅពីបានឆក់យកជីវិតមនុស្ស គ្រោះថ្នាក់ចរាចរណ៍បានបន្សល់នូវអ្នករបួសពិការ កូនកំព្រា ស្ត្រីមេម៉ាយ និងសោកនាដកម្មគ្រប់បែបយ៉ាងមកលើប្រជាពលរដ្ឋ និងការខូចខាតទ្រព្យសម្បត្តិឲ្យប៉ះពាល់ដល់គោលនយោបាយកាត់បន្ថយភាពក្រីក្ររបស់រាជរដ្ឋាភិបាល។ ម្យ៉ាងទៀត គ្រោះថ្នាក់ចរាចរណ៍ក៏បានទម្លាក់បន្ទុកស្ថានភាពហិរញ្ញវត្ថុដល់សមាជិកគ្រួសារនៃជនរងគ្រោះដែលនៅរស់ទៀតផង៕
ពលរដ្ឋខេត្តបន្ទាយមានជ័យ៖គ្រោះថ្នាក់ចរាចរណ៍នៅតែជាក្តីបារម្ភ
0 Comments