ភ្នំពេញ ៖ បុរសម្នាក់បានស្លាប់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់ បន្ទាប់ពីជិះម៉ូតូទាក់ដៃចង្កូតគ្នា ជាមួយម៉ូតូមួយគ្រឿងទៀត បណ្ដាលឲ្យដួលខ្ទាតចូល ក្រោមកង់រថយន្តកិនស្លាប់នៅនឹងកន្លែង ហើយរថយន្ត និងម៉ូតូបង្កបានបើកគេចខ្លួនបត់អស់។
ហេតុការណ៍នេះកើតឡើងកាលពីវេលាម៉ោង១៨និង២០នាទី ព្រលប់ថ្ងៃទី៨ ខែកញ្ញា ឆ្នាំ២០១៥នៅតាមបណ្តោយផ្លូវជាតិលេខ៤ក្នុងភូមិអូដឹម សង្កាត់ចោមចៅ ខណ្ឌពោធិ៍សែនជ័យ។ ជនរងគ្រោះដែលស្លាប់មានឈ្មោះអើយ ចាន់ថន ភេទប្រុស អាយុ៣៦មុខរបរកសិករ ស្នាក់នៅភូមិថ្នល់បំបែកសង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅស្រុកស្អាងខេត្តកណ្ដាលជាអ្នកជិះពីក្រោយ។ ចំណែកអ្នកឌុបរងរបួសធ្ងន់បាក់ជើងម្ខាងមានឈ្មោះជា សុខជាភេទប្រុសអាយុ២៧ឆ្នាំត្រូវជាប្អូនថ្លៃជនរងគ្រោះដែលស្លាប់ មុខរបរជាងជួសជុលម៉ូតូស្នាក់នៅជាមួយគ្នានិងមានស្រុកកំណើតជាមួយគ្នាជិះម៉ូតូមួយគ្រឿងម៉ាក់ ស៊ុយសុគីស្មាស់រីវ៉ូពណ៍ ខ្មៅស៊េរីឆ្នាំ2009 ពាក់ស្លាកលេខកណ្ដាល1H 5136 ។
តាមប្រភពព័ត៌មានបានឲ្យដឹងថា មុនពេលកើតហេតុ គេឃើញម៉ូតូជនរងគ្រោះជិះឌុបគ្នាក្នុងទិសដៅពីលិចទៅកើតស្របទិសគ្នាជាមួយរថយន្តបង្ក និងម៉ូតូបង្ក ពោលគឺយានយន្តទាំងបីគ្រឿង ធ្វើដំណើរស្របទិសគ្នាទាំងអស់ ដោយម៉ូតូជនរងគ្រោះជិះមុខគេ លុះមកដល់ចំណុចកើតហេតុ មានម៉ូតូមួយគ្រឿងទៀត ជិះមកពីក្រោយបើកយ៉ាងលឿន បណ្ដាលឲ្យទាក់ដៃចង្កូតជាមួយម៉ូតូជនរងគ្រោះបណ្ដាលឲ្យអ្នកជិះពីក្រោយដួលបោកក្បាលចូលក្រោមកង់ឡានកិនបញ្ឆិតចំក្បាល និងម្នាក់ទៀតជាអ្នកឌុបកិនបាក់ជើងម្ខាងតែម្ដង។
ភ្លាមៗនោះរថយន្តបង្កដែលគេស្គាល់ថា ជាប្រភេទរថយន្តដឹកកម្មករ និងម៉ូតូបង្កបាននាំគ្នាបើកគេចខ្លួនបាត់គាប់ជួនពេលនោះមានភាពរញ៉េរញ៉ៃផងដោយសារមានរថយន្តដឹកកម្មករច្រើន ព្រោះជាពេលដែលគេចេញពីធ្វើការ ជាហេតុនាំឲ្យមានឱកាសបើកគេចបានយ៉ាងស្រួល។
ក្រោយកើតហេតុសមត្ថកិច្ចចរាចរចុះមកធ្វើការវាស់វែង និងប្រគល់សពជនរងគ្រោះឲ្យទៅក្រុមគ្រួសារយកទៅធ្វើបុណ្យនៅស្រុកកំណើតតាមប្រពៃណី ហើយម៉ូតូត្រូវយកទៅទុកនៅប៉ុស្តិ៍មួយអន្លើសិនក្រែងអាចតាមស្រាវជ្រាវរកឃើញយានយន្តបង្កនៅពេលក្រោយ៕
ជិះម៉ូតូទាក់ដៃចង្កូតគ្នាដួលបោកក្បាល ចូលក្រោមរថយន្តកិនស្លាប់ម្នាក់
0 Comments