ប្រដាល់ ៖ ការប្រកួតជម្រុះប្រដាល់ដណ្ដើមខ្សែក្រវាត់កំពូលជើងឯកK.Cement ទម្ងន់៦៣,៥០០គីឡូក្រាម លើកទី២ ជុំទី១ លើសង្វៀនSEA-TV នៅល្ងាចថ្ងៃសៅរ៍ ទី១២ ខែកញ្ញា ឆ្នាំ២០១៥នេះមាន២គូ ដែលមួយគូនៅក្នុងពូលA និងមួយគូទៀតនៅក្នុងពូលB។
មួយគូនៅក្នុងពូលAនោះ គឺ ឆៃ សារ៉ា អ្នកប្រដាល់សមាគមកីឡាក្រសួងការជាតិត្រូវជួបប្រកួតជាមួយ តក់ សោភ័ណ្ឌ អ្នកប្រដាល់ក្លិបម្កុដរាជសីហ៍។ រវាងពួកគេទាំងពីរនេះ មុនចូលរួមប្រកួតខ្សែក្រវាត់នេះធ្លាប់ជួបគ្នាម្តងហើយកាលពីថ្ងៃទី២៣ ខែសីហា ឆ្នាំ២០១៥ ដោយ ឆៃ សារ៉ា ឈ្នះ តក់ សោភ័ណ្ឌ ដោយពិន្ទុ។
ឆៃ សារ៉ា ជាអ្នកប្រដាល់ស្រករក្រោយ តក់ សោភ័ណ្ឌទេ តែគេមានស្នៀតប្រដាល់ល្អ និងមានចិត្តប្រដាល់ធំមិនខ្លាចនោះទេ ទើបលើកមុនគេវាយឈ្នះ តក់ សោភ័ណ្ឌនោះ។ តែយ៉ាងណាក្នុងការជួបជាមួយ តក់ សោភ័ណ្ឌ ក្នុងជម្រុះខ្សែក្រវាត់នេះ មិនដឹងថា សារ៉ា អាចយកឈ្នះ សោភ័ណ្ឌ បានទៀតឬអត់នោះទេ? តក់ សោភ័ណ្ឌ គេជាអ្នកប្រដាល់ចាស់វស្សា ហើយគេក៏ជាអ្នកប្រដាល់ខ្លាំងមួយរូបដែរ។
សោភ័ណ្ឌ មានផ្លែល្អ ហើយចិត្តប្រដាល់ក៏ធំដែរ។ ប្រកួតចុងក្រោយនេះវាយចាញ់ ឆៃសារ៉ានេះ គេមិនអស់ចិត្តនោះទេ។ ដូច្នេះក្នុងជំនួបជម្រុះនេះ ជាឱកាសសម្រាប់ សោភ័ណ្ឌ ដើម្បីសងសឹកវិញហើយ ប៉ុន្តែត្រង់ឈ្នះឬចាញ់មិនអាចទាយមុនបានឡើយ។
អ្នកប្រដាល់ទាំងពីរនាក់នេះមានមហិច្ឆតាចង់ឈ្នះដូចគ្នាសម្រាប់ការប្រកួតជម្រុះជុំទី១នេះ តែមិនដឹងថា ឆៃ សារ៉ា ឈ្នះ ឬក៏ តក់ សោភ័ណ្ឌ ឈ្នះនោះទេ?
ចំពោះការប្រកួតក្នុងពូលBវិញនោះ គឺឯម លីថូ អ្នកប្រដាល់ក្លិបឫទ្ធីពោធិសែនជ័យ ត្រូវជួបជាមួយ សល់ ពិសិដ្ឋ អ្នកប្រដាល់ក្លិបកុសលកីឡា។ ពីរនាក់នេះក៏ធ្លាប់ជួបគ្នាពីរដងហើយដែរកន្លងមក ដោយវាយឈ្នះចាញ់គ្នាម្តងម្នាក់។
រវាងពួកគេពីរនាក់នេះ ឯម លីថូ ទំនងជាមានប្រៀបឈ្នះច្រើនជាង សល់ ពិសិដ្ឋ ដោយសារ លីថូ គេវាយមានផ្លែល្អជាង ពិសេសកណ្ដាប់ដៃ និងកែងនោះ។ សល់ ពិសិដ្ឋ គេមានចិត្តប្រដាល់តូច ប៉ុន្តែមានផ្លែជង្គង់ល្អ និងមានប្រៀបខាងកម្ពស់លើ ឯម លីថូ។
ទោះជាយ៉ាងណាប្រកួតចុងក្រោយនេះរបស់ពួកគេទាំងពីរសុទ្ធតែវាយចាញ់ដូចគ្នា គឺ ឯម លីថូវាយចាញ់ អៀង ច័ន្ទល័ក្ខ អ្នកប្រដាល់ក្លិបកងទ័ពជើងគោកក្នុងទឹកទី៣ ដោយសារវាយថែម។ ចំណែកការប្រកួតចុងក្រោយរបស់ សល់ ពិសិដ្ឋ វិញ គឺវាយចាញ់ ផង់ សុភ័ស្ស អ្នកប្រដាល់ក្លិបតាឡីដំរីមានរិទ្ធ ក្នុងទឹកទី២។ ដូច្នេះសម្រាប់ការជួបគ្នារវាង ឯម លីថូ និងសល់ ពិសិដ្ឋ នេះ ពុំដឹងថានរណាជាអ្នកឈ្នះនោះឡើយ?
គួរបញ្ជាក់ថា ព្រឹត្តិការណ៍ប្រកួតដណ្ដើមខ្សែក្រវាត់កំពូលជើងឯកK.Cement ទម្ងន់៦៣,៥០០គ.ក្រវគ្គIIនេះ មានអ្នកប្រដាល់ចំនួន៨រូបចូលរួម ដោយបែងចែកជាពីរពូល ដែលក្នុងមួយពូលមាន៤នាក់។
សម្រាប់ពូលA មានប្រាក់ រស្មី ក្លិបតាឯកដំបងដែកមានរិទ្ធ ,ស៊ូ វណ្ណះ ក្លិបនាគរាជមានជ័យ , ឆៃ សារ៉ា សមាគមកីឡាក្រសួងការពារជាតិ និងតក់ សោភ័ណ្ឌ ក្លិបម្កុដរាជសីហ៍។ ឯពូលB មាន ឯម លីថូ ក្លិបឫទ្ធីពោធិសែនជ័យ ,សល់ ពិសិដ្ឋ ក្លិបកុសលកីឡា , ហេង វាសនា ក្លិបព្រៃទទឹងខេត្តបាត់ដំបង និងសេង ស្រឿន ក្លិបព្រះខ័នរាជ។
រូបមន្តនៃការប្រកួត អ្នកប្រដាល់ទាំង៤ក្នុងពូលនីមួយៗនេះ នឹងត្រូវជម្រុះចោល២នាក់ ទុក២នាក់ ដែលមានពិន្ទុខ្ពស់ជាងគេសម្រាប់បន្តការប្រកួតក្នុងវគ្គពាក់កណ្ដាលផ្ដាច់ព្រ័ត្រ និងផ្ដាច់ព្រ័ត្រ ដើម្បីដណ្ដើមយកខ្សែក្រវាត់។
ជាមួយនឹងការប្រកួតជម្រុះខ្សែក្រវាត់K.Cementនេះ ក៏មានការប្រកួតជាលក្ខណៈមិត្តភាព អន្តរជាតិចំនួនពីរគូផងដែរ។ ក្នុងនោះអ្នកប្រដាល់ជើងខ្លាំងកម្ពុជា២រូប នឹងជួបប្រកួតជាមួយជើងខ្លាំងមកពីប្រទេសថៃនោះគឺ បាង កាយ៉ាក ក្លិបអប្សរាគុនខ្មែរ ជួប PHUN SAVATH ក្នុងទម្ងន់៥៧គីឡូក្រាម ឯផាន់ គ្រាន់ក្លិបព្រះខ័នរាជ ជួប PHA LANG CHHAI ក្នុងប្រភេទទម្ងន់៦៥គីឡូក្រាម៕
ជម្រុះខ្សែក្រវាត់K.Cement សារ៉ា ជួបសោភ័ណ្ឌ ឯ លីថូ ជួបពិសិដ្ឋ
0 Comments