សៀមរាប ៖ សមត្ថកិច្ចប្រឆាំងគ្រឿងញៀន នៃស្នងការនគរបាលខេត្តបានសហការជាមួយកម្លាំងការពារអន្តរាគមន៍ នៃស្នងការដ្ឋាននគរបាលខេត្តសៀមរាបបានចុះប្រតិបត្តិការបង្ក្រាបករណីជួញដូរនិងប្រើប្រាស់នូវសារធាតុញៀន រហូតឈានដល់ធ្វើការឃាត់ខ្លួនបានជនសង្ស័យចំនួន៣នាក់ ក្នុងក្រុងសៀមរាប ខណៈពួកគេកំពុងចែកចាយនៅចំណុចផ្សារបុរីប្រិមប្រិយ នៅក្នុងភូមិត្រពាំងសេះសង្កាត់គោកចក ក្រុង/ខេត្តសៀមរាប។
ប្រតិបត្តិការបង្ក្រាបករណីជួញដូរគ្រឿងញៀននេះបានធ្វើឡើងនៅវេលាម៉ោង២១និង២០នាទីថ្ងៃទី២២ ខែកញ្ញា ឆ្នាំ២០១៥ ស្ថិតនៅចំណុចក្នុងភូមិ/សង្កាត់/ក្រុងសៀមរាប។
លោកវរសេនីយ៍ទោ អ៊ុំ សាអាត នាយការិយាល័យនគរបាលប្រឆាំងគ្រឿងញៀន នៃស្នងការនគរបាលខេត្តបានប្រាប់ថា ក្នុងការចុះបង្ក្រាបករណីខាងលើនេះ កម្លាំងជំនាញបានសហការជាមួយ កម្លាំងនគរបាលប៉ុស្តិ៍សង្កាត់សាលាកំរើក រហូតឈានដល់ធ្វើការឃាត់ខ្លួនបានជនសង្ស័យចំនួន៣នាក់ ក្នុងនោះមានទី១/ឈ្មោះ សួន សំរស់ ភេទប្រុស អាយុ១៩ឆ្នាំ មុខរបរគ្មាន (ឃាត់ខ្លួនថ្ងៃទី២២ ខែកញ្ញា) (ជួញដូរ) រស់នៅភូមិអញ្ចាញ សង្កាត់នគរធំ ក្រុងសៀមរាប។ ទី២/ឈ្មោះ ហុង ភក្តី ភេទប្រុសអាយុ២១ឆ្នាំ មុខរបរគ្មាន (ឃាត់ខ្លួនថ្ងៃទី២២ ខែកញ្ញា) រស់នៅភូមិពោងពាយ សង្កាត់ឫស្សីកែវ ក្រុងភ្នំពេញ(ចាត់ចែងឲ្យប្រើប្រាស់) និងទី៣/ឈ្មោះ រិទ្ឋ លក្ខ័ ភេទប្រុស អាយុ២៨ឆ្នាំ មុខរបរមិនពិត(ឃាត់ខ្លួនថ្ងៃទី២២ ខែកញ្ញា) ស្នាក់នៅទីរួមខេត្តសៀមរាប (ចាត់ចែងឲ្យប្រើប្រាស់)។
លោកបន្តថា ក្រោយពីធ្វើការឃាត់ខ្លួនបានជនសង្ស័យខាងលើ កម្លាំងជំនាញបានធ្វើការដកហូតបានវត្ថុតាងរួមមាន ទូរស័ព្ទដៃ៣គ្រឿង ម៉ូតូមួយគ្រឿង និងឧបករណ៍ច្នៃជក់មួយចំនួនធំ។ បច្ចុប្បន្ន ជនសង្ស័យទាំង៣នាក់ និងវត្ថុតាង ត្រូវបានកម្លាំងជំនាញកសាងសំណុំរឿងបញ្ជូនទៅតុលាការនៅរសៀលថ្ងៃទី២៣ ខែកញ្ញា ឆ្នាំ២០១៥ ដើម្បីចាត់ការតាមផ្លូវច្បាប់៕
បញ្ជូនជនសង្ស័យ៣នាក់និងវត្ថុតាងទៅតុលាការ ពីបទជួញដូរ និងប្រើប្រាស់នូវសារធាតុញៀន
0 Comments