ភ្នំពេញ ៖ មួយសប្ដាហ៍បានកន្លងផុតទៅ រឿងរ៉ាវសំខាន់ៗមួយចំនួនក្នុងស្ថាប័នតុលាការ ត្រូវបានសាធារណជនមួយចំនួនចាប់អារម្មណ៍និងតាមដានយ៉ាងចិត្តទុកដាក់បំផុត ។ ជនគំរាមសម្លាប់លោកបណ្ឌិត សុខ ទូច ត្រូវតុលាការឃុំខ្លួន គឺជារឿងរ៉ាវសំខាន់បំផុតក្នុងសប្ដាហ៍នេះ ។ ក្រៅពីនេះ មានករណីផ្សេងទៀត ដូចជា សាលាឧទ្ធរណ៍កាត់ក្តីប្រធានគណបក្សខ្មែរអភិវឌ្ឍន៍សេដ្ឋកិច្ចរឿងឆបោកប្រាក់ជាង១៥ម៉ឺនដុល្លារ ជាដើម។
ខាងក្រោមនេះជារឿងរ៉ាវសំខាន់ៗក្នុងស្ថាប័នតុលាការប្រចាំសប្ដាហ៍ ៖
ទី១ ៖ បុរសម្នាក់ ដែលបានសរសេរនិងបង្ហោះរូបភាពតាមបណ្ដាញសង្គមហ្វេសបុក មានខ្លឹមសារប្រមាថអាយុជីវិត លោកបណ្ឌិត សុខ ទូច ប្រធានក្រុមស្រាវជ្រាវនៃរាជបណ្ឌិតសភាកម្ពុជា ត្រូវបានលោក ឃី ឆៃ ចៅក្រមស៊ើបសួរសាលាដំបូងរាជធានីភ្នំពេញ សម្រេចកាលពីល្ងាចថ្ងៃទី៧ ខែកញ្ញា ឆ្នាំ២០១៥ ឃុំខ្លួនដាក់ពន្ធនាគារ ក្រោមការចោទប្រកាន់ពីបទ គំរាមកំហែងថានឹងសម្លាប់។
មាត្រា២៣៣ នៃក្រមព្រហ្មទណ្ឌ ចែងថា “ ការគំរាមកំហែងថា នឹងសម្លាប់ កាលបើការគំរាមកំហែងនេះធ្វើឡើងម្តងហើយម្តងទៀត ឬ សម្ដែងចេញតាមលិខិត ឬ វត្ថុអ្វីមួយ ត្រូវផ្ដន្ទាទោសដាក់ពន្ធនាគារពី៦ខែទៅ២ឆ្នាំ និង ពិន័យជាប្រាក់ពី១លានរៀល ទៅ៤លានរៀល។ បុរសរូបនេះ ឈ្មោះ ផង់ សីហា អាយុ២៧ឆ្នាំ មានស្រុកកំណើត ភូមិព្រៃកន្ទ្រង់ ឃុំស្ដៅកោង ស្រុកបាភ្នំ ខេត្តព្រៃវែង ត្រូវបាននគរបាលសន្តិសុខផ្ទៃក្នុងក្រសួងមហាផ្ទៃ ឃាត់ខ្លួន កាលពីល្ងាចថ្ងៃទី៥ ខែកញ្ញា ឆ្នាំ២០១៥ នៅចំណុចព្រំដែនប៉ោយប៉ែត ខេត្តបន្ទាយមានជ័យ បន្ទាប់ពីបុរសរូបនេះ បានឆ្លងដែនពីប្រទេសថៃចូលក្នុងទឹកដីកម្ពុជាវិញ។
ទី២ ៖ ប្រធានគណបក្សខ្មែរអភិវឌ្ឍន៍សេដ្ឋកិច្ច លោក ហួន រាជចំរើន ដែលចូលរួមជ្រើសរើសតំណាងរាស្ត្រកាលពីឆ្នាំ២០១៣ តែពុំទទួលបានលទ្ធផល នោះ ត្រូវបានសមត្ថកិច្ចចាប់ខ្លួននិងតុលាការឃុំខ្លួនពីបទឆបោកប្រាក់ជាង១៥ម៉ឺនដុល្លារ ពាក់ព័ន្ធរឿងជំនួញដីធ្លី នៅក្រុងប៉ោយប៉ែត ខេត្តបន្ទាយមានជ័យ។
នៅព្រឹកថ្ងៃទី៩ ខែកញ្ញា ឆ្នាំ២០១៥ សាលាឧទ្ធរណ៍ បានបើកសវនាការសំណុំរឿងនេះសាជាថ្មី ដោយផ្តោតលើបណ្ដឹងសុំនៅក្រៅឃុំបណ្ដោះអាសន្ន។ ក្រោយការសួរដេញដោលជិតមួយម៉ោង លោកចៅក្រម ប្លង់ សំណាង បានលើកពេលប្រកាសសាលក្រមទៅព្រឹកថ្ងៃទី១៤ ខែកញ្ញា ឆ្នាំ២០១៥ ៕
ទី៣ ៖ បុរសម្នាក់ បានលបចូលចាប់រំលោភសេពសន្ថវៈរួចសម្លាប់លោកយាយអាយុ៧៤ឆ្នាំយ៉ាងសាហាវព្រៃផ្សៃ ។ ទោះបីយ៉ាងណា ជនសង្ស័យត្រូវបានសមត្ថកិច្ចចាប់ខ្លួន ដើម្បីចាត់ការតាមច្បាប់ ។
ជនសង្ស័យឈ្មោះ ថាត់ ភឿន អាយុ៣៣ឆ្នាំ ត្រូវបានសាលាដំបូងខេត្តកំពត និង សាលាឧទ្ធរណ៍ ផ្ដន្ទាទោសដាក់ពន្ធនាគារ២៥ឆ្នាំ ពីបទ ” ឃាតកម្មដោយមានទារុណកម្ម អំពើឃោរឃៅ ឬ អំពើរំលោភសេពសន្ថវៈ តាមមាត្រា២០៥ នៃក្រមព្រហ្មទណ្ឌ ប្រព្រឹត្តកាលពីថ្ងៃទី១៥ ខែមីនា ឆ្នាំ២០១៣ នៅចំណុចភូមិអណ្តូងខ្មែរ សង្កាត់អណ្តូងខ្មែរ ក្រុងកំពត ខេត្តកំពត។
នៅព្រឹកថ្ងៃទី៩ ខែកញ្ញា ឆ្នាំ២០១៥ តុលាការកំពូលបានបើកសវនាការសំណុំរឿងនេះសាជាថ្មី។ ក្រោយការសួរដេញដោល តុលាការបានលើកពេលប្រកាសសាលដីកា ទៅថ្ងៃទី២៣ ខែកញ្ញា ឆ្នាំ២០១៥។
ទី៤ ៖ សកម្មជនគណបក្សសង្គ្រោះជាតិ លោក អ៊ុក ពេជ្រសំណាង នៅព្រឹកថ្ងៃទី១០ ខែកញ្ញា ឆ្នាំ២០១៥ ត្រូវបានលោក អ៊ឹម វណ្ណះ ចៅក្រមជំនុំជម្រះសាលាដំបូងរាជធានីភ្នំពេញ ផ្តន្ទាទោសដាក់ពន្ធនាគារ២ឆ្នាំ ដោយចោទប្រកាន់បីបទ ហិង្សាដោយចេតនា មានស្ថានទម្ងន់ទោស និង បទធ្វើឲ្យខូចខាតដោយចេតនាមានស្ថានទម្ងន់ទោស យោងតាមមាត្រា២១៨ និង មាត្រា ៤១១ នៃក្រមព្រហ្មទណ្ឌ ។
កាលពីពេលថ្មីៗនេះ លោក អ៊ុក ពេជ្រសំណាង ធ្លាប់ត្រូវបានតុលាការផ្ដន្ទាទោស៧ឆ្នាំ ក្នុងរឿងចូលរួមកុបកម្មនៅលើស្ពាននាគក្បែរទីលានប្រជាធិបតេយ្យ ផងដែរ៕
រឿងរ៉ាវសំខាន់ៗក្នុងស្ថាប័នតុលាការប្រចាំសប្ដាហ៍
0 Comments