បន្ទាយមានជ័យ ៖ ល្ងាចថ្ងៃទី១១ ខែកញ្ញា ឆ្នាំ២០១៥ នៅសាលាបឋមសិក្សាម៉ាឡៃ ក្នុងឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ បានប្រារព្ធទិវាអក្ខរកម្ម៨កញ្ញា ក្រោមប្រធានបទអក្ខរកម្មចូលរួមចំណែកកាត់បន្ថយចំណាកស្រុកដោយប្រថុយប្រថាន។ ពិធីទិវាអក្ខរកម្មនេះមានការចូលរួមពីលោក គោស៊ុំ សារឿត អភិបាលខេត្តបន្ទាយមានជ័យ ,លោក លី សារី អភិបាលរងខេត្តបន្ទាយមានជ័យ លោកគ្រូ អ្នកគ្រូ និងសិស្សជាច្រើននាក់ទៀតផងដែរ។
លោក គោស៊ុំ សារឿត បានមានប្រសាសន៍ក្នុងទិវាអក្ខរកម្មនោះថា ទិវាអក្ខរកម្មគឹជាទិវាធ្វើការផ្សព្វផ្សាយដល់មនុស្សដែលមិនចេះអក្សរឲ្យបានចូលរៀននៅថ្នាក់រៀនបន្ត មិនថាយប់ ឬថ្ងៃឡើយ ពិសេសមនុស្សចាស់ដែលមិនចេះអក្សរនិងជនពិការជាដើម។
លោកបានបន្តទៀតថា ទិវាអក្ខរកម្មឆ្នាំនេះក្រោមប្រធានបទអក្ខរកម្មរួមចំណែកកាត់បន្ថយពលករចំណាកស្រុកទាំងប្រថុយប្រថាន ហើយប្រធានបទនេះបានបង្កប់នូវអត្ថន័យយ៉ាងជ្រាលជ្រៅ និងបានបង្ហាញពីការបន្តយកចិត្តទុកដាក់របស់រាជរដ្ឋាភិបាលក្នុងការកសាងធនធានមនុស្សផ្សារភ្ជាប់នឹងវិជ្ជាជីវៈ ដើម្បីរួមចំណែកកាត់បន្ថយភាពក្រីក្ររបស់ប្រជាជន និងកាត់បន្ថយចំណាកស្រុកដោយប្រថុយប្រថាន ព្រោះការធ្វើចំណាកស្រុកដោយប្រថុយប្រថាន និងគ្មានគោលដៅច្បាស់លាស់ជាហេតុធ្វើឲ្យជួបបញ្ហាស្មុគស្មាញជាច្រើនពាន់ឧបសគ្គ និងគ្រោះថ្នាក់ដល់អាយុជីវិតទៀតផង។
លោកបានបន្តទៀតថា ដូច្នេះអាជ្ញាធរគ្រប់លំដាប់ថ្នាក់ត្រូវយកចិត្តទុកដាក់ក្នុងការជំរុញណែនាំប្រជាពលរដ្ឋដែលមិនបានរៀនសូត្រ ឬបោះបង់ការសិក្សា ដើម្បីឲ្យមានឱកាសបានចូលរៀនសាជាថ្មីនៅតាមថ្នាក់រៀនក្រៅប្រព័ន្ធ ពិសេសជនពិការឲ្យទទួលបាននូវការរៀនសូត្រ។
លោកបានបន្តទៀតថា សិស្ស និស្សិតនៅតាមគ្រឹះស្ថានសិក្សាសាធារណៈ និងឯកជន សហភាពសហព័ន្ធយុវជនកម្ពុជា ក្រុមកាយរឹទ្ធិ និងក្រុមយុវជនកាកបាទក្រហមកម្ពុជា ត្រូវចូលរួមបង្រៀនដល់ស្ម័គ្រចិត្តដល់អ្នកមិនចេះអក្សរនៅតាមថ្នាក់អក្ខរកម្ម។
លោកបានបន្តទៀតថា មានអក្ខរកម្ម មានការគិតគូរ និងការសម្រេចចិត្តបានត្រឹមត្រូវ មានអក្ខរកម្មនាំឲ្យសេដ្ឋកិច្ចជាតិកាន់តែរីកចម្រើន មានអក្ខរកម្មនាំឲ្យសង្គមជាតិអភិវឌ្ឍ និងមានសុខដុមរមនាទៀតផង៕
ការប្រារព្ធទិវាអក្ខរកម្ម៨កញ្ញា ក្រោមប្រធានបទ "អក្ខរកម្មរួមចំណែកកាត់បន្ថយចំណាកស្រុកដោយប្រថុយប្រថាន"
0 Comments