សៀមរាប ៖ នៅវេលាម៉ោងជាង៤ទៀបភ្លឺ ថ្ងៃទី១២ ខែកញ្ញា ឆ្នាំ២០១៥ ស្ថិតនៅមុខកន្លែងលក់សំបុត្រ មានហេតុការណ៍គ្រោះថ្នាក់ចរាចរណ៍មួយគួរឲ្យរន្ធត់បណ្ដាលឲ្យមន្ត្រីប៉េអឹម ខេត្តសៀមរាប ម្នាក់បានស្លាប់បាត់បង់ជីវិតនៅកន្លែងកើតហេតុ ចំណែកមនុស្ស២នាក់ផ្សេងទៀត ជាអ្នកដឹកត្រីលក់តាមម៉ូតូរងរបួសធ្ងន់ ដោយសារតែរថយន្តកាមរីបាឡែនបើកបុកបញ្ច្រាសទិសអូសជាង២ម៉ែត្រ។
មន្ត្រីនៅកន្លែងកើតហេតុបានឲ្យដឹងថា ជនរងគ្រោះ ដែលស្លាប់ជាមន្ត្រីអាវុធហត្ថស្រុកប្រាសាទបាគង ខេត្តសៀមរាបមានឈ្មោះខែម សៀងលី ភេទប្រុស អាយុ ឋានៈ ព្រឹន្ទបាលឯក មកធ្វើការជាមួយខាងអប្សរា ជិះម៉ូតូម៉ាកឃ្លីក ពណ៌ខ្មៅ។ ចំណែក២នាក់ផ្សេងទៀត ជាអ្នកដឹកត្រីលក់ ជិះម៉ូតូ ម៉ាកវ៉េវ ពណ៌ខ្មៅនៅមិនទាន់ដឹងឈ្មោះនៅឡើយទេ។ រីឯម៉ូតូទាំង២គ្រឿងរងការខូចខាតធ្ងន់ធ្ងរ។
មន្ត្រីសមត្ថកិច្ចបញ្ជាក់ថា ជនបង្កគ្រោះថ្នាក់ចរាចរណ៍នេះត្រូវបានឃាត់ខ្លួនភ្លាមៗនាំយកទៅ កាន់ការិយាល័យចរាចរណ៍ ខេត្តសៀមរាបទាំងយប់។ ជននេះជិះរថយន្តម៉ាកកាមរីបាឡែន ពណ៌ទឹកប្រាក់ ពាក់ស្លាកលេខសៀមរាប 2B-1482 ក្នុងទិសដៅខាងជើងមកត្បូង។ ចំណែកម៉ូតូជនរងគ្រោះទាំង២បើកពីទិសខាងត្បូងទៅជើង មកដល់ចំណុចខាងលើ ក៏ត្រូវរថយន្ត ដែលបើកក្នុងល្បឿនលឿនរេចង្កូតមកបុកម៉ូតូខាងឆ្វេងដៃពេញទំហឹងតែម្ដង។ ជាមួយគ្នានេះអ្វី ដែលគួរឲ្យសង្វេគនោះ ក្រោយកើតហេតុ គេបាន ឃើញក្រុមគ្រួសារជនរងគ្រោះមន្ត្រីប៉េអឹម ដែលស្លាប់បានមកកន្លែងកើតហេតុ រួចស្រែក ទ្រហោយំគួរឲ្យអាឡោះអាល័យពន់ពេក៕
បើកឡានដឹកស្រីស្នេហ៍រេចង្កូតបុករះម៉ូតូបណ្ដាលឲ្យស្លាប់មន្ត្រីPMម្នាក់
0 Comments