ភ្នំពេញ ៖ យុវជនម្នាក់បានបើករថយន្តមិនគោរពភ្លើងសញ្ញាចរាចរណ៍(ស្ដុប) ក៏ត្រូវសមត្ថកិច្ចដេញតាមឃាត់ ប៉ុន្តែរូបគេមិនបានឈប់ការបញ្ជារបស់សមត្ថកិច្ច ថែមទាំងបុកសមត្ថកិច្ចទាំងកម្រោលបណ្ដាលឲ្យរងរបួសធ្ងន់ទៀតផង។
ហេតុការណ៍នេះបានកើតឡើងកាលពីវេលាម៉ោង១៣និង៣០រសៀលថ្ងៃទី១១ ខែកញ្ញា ឆ្នាំ២០១៥នៅត្រង់ចំណុចភ្លើងស្តុបក្រពើហា នៅលើផ្លូវជាតិលេខ២ ស្ថិតក្នុងភូមិក្រពើហា សង្កាត់ព្រែកឫស្សី ក្រុងតាខ្មៅ។
លោកវរសេនីយ៍ទោស៊ឹម ប៊ុតបណ្ឌិត អធិការនគរបាលក្រុងតាខ្មៅ បានឲ្យដឹងថា គ្រោះថ្នាក់ចរាចរណ៍នេះបង្កឡើងដោយរថយន្តម៉ាកVISTO ពណ៌ក្រហម ពាក់ស្លាកលេខ ភ្នំពេញ 2R-7833 បើកបរដោយឈ្មោះមិន ម៉ាត់ ភេទប្រុស អាយុ២៣ឆ្នាំ មានទីលំនៅក្នុងភូមិលេខ២ ឃុំស្វាយរលំ ស្រុកស្អាង ខេត្តកណ្ដាល។
លោកបន្តថា នៅមុនពេលកើតហេតុ រថយន្តបង្កបានបើកបរក្នុងទិសដៅពីជើងទៅត្បូងតាមបណ្ដោយផ្លូវជាតិលេខ២។ លុះមកដល់ចំណុចកើតហេតុ អ្នកបើកបរមិនបានគោរពភ្លើងសញ្ញា(ស្តុប) ក៏ត្រូវសមត្ថកិច្ចដែលឈរជើងនៅគោលដៅស្តុបនោះឈ្មោះចាន់ ប៊ុនធឿន ភេទប្រុស អាយុ៤២ឆ្នាំមានទីលំនៅក្នុងភូមិព្រែកតាពៅ សង្កាត់ដើមមៀន ក្រុងតាខ្មៅ ដេញតាមឃាត់ ប៉ុន្តែរថយន្តមិនបានឈប់តាមការបញ្ជារបស់សមត្ថកិច្ចទេ រួចក៏បានបន្ថែមល្បឿនបុកសមត្ថកិច្ច បណ្ដាលឲ្យរងរបួសធ្ងន់(ប្រេះឆ្អឹងភ្នែកគោខាងឆ្វេង)ត្រូវបានមិត្តភ័ក្តបញ្ជូនទៅមន្ទីរពេទ្យសម្ភពផល្លី។ ក្រោយពេលកើតហេតុរថយន្តមិនបានឈប់ទេ ហើយបានបើករត់រហូតដល់ផ្ទះអ្នកស្គាល់គ្នានៅភូមិស្វាយរលំ ឃុំស្វាយរលំ ក៏ត្រូវសមត្ថកិច្ចឃាត់ទាំងរថយន្តនិងអ្នកបើកបរ នាំយកមកអធិការដ្ឋានក្រុងតាខ្មៅដើម្បីចាត់ការតាមនីតិវិធី រីឯមធ្យោបាយត្រូវបានសមត្ថកិច្ចយកមករក្សាទុកនៅអធិការដ្ឋានក្រុងតាខ្មៅបណ្ដោះអាសន្ន៕
ជិះរថយន្តមិនគោរពភ្លើងស្តុប សមត្ថកិច្ចតាមឃាត់ បើកបំបុកសមត្ថកិច្ចទាំងកម្រោល
0 Comments