ភ្នំពេញ ៖ ឯកឧត្តម នាយឧត្ដមសេនីយ៍ ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ មានប្រសាសន៍បែបនេះ បន្ទាប់ពីជំនួបពិភាក្សាការងារជាមួយ លោកឧត្ដមសេនីយ៍ឯកបម្រុង ង្វៀន ជីវិញ អនុរដ្ឋមន្ត្រីក្រសួងការពារប្រទេសនៃសាធារណរដ្ឋសង្គមនិយមវៀតណាម កាលពីរសៀលថ្ងៃទី១៩ ខែតុលា ឆ្នាំ២០១៥។
ឯកឧត្តម នាយឧត្តមសេនីយ៍ ទៀ បាញ់ បានមានប្រសាសន៍ថា រឿងកម្ពុជា និងវៀតណាមនេះមិនមែនជារឿងថ្មីទេ ប្រទេសទាំងពីរជាបងប្អូន ហើយក៏តែងតែជួបបញ្ហាលំបាកលំបិនជាមួយគ្នាច្រើនណាស់ដែរ ក្នុងរយៈពេលកន្លងមក។ ពេលនេះក៏មានបញ្ហាថ្មីៗដែលតម្រូវឲ្យយើងមានការឯកភាពគ្នាទាក់ទងបញ្ហានយោបាយ ឬវិស័យការពារជាតិរបស់ប្រទេសរៀងៗខ្លួន ហើយមានការចាំបាច់ច្រើន ដែលត្រូវការចាំត្រូវការពិភាក្សាគ្នា ស្វែងយល់គ្នា និងពឹងពាក់គ្នាទៅវិញទៅមក។
នាយឧត្តមសេនីយ៍បានអះអាងថា ជាការពិតណាស់កម្ពុជាត្រូវការពង្រឹងខ្លួន ចង់បង្កើនសមត្ថភាពរបស់ខ្លួន ឲ្យមានកម្រិតមួយសមស្របផងដែរនៅក្នុងតំបន់នេះ ហើយមានចំណុចមួយចំនួនដែលត្រូវពឹងពាក់វៀតណាមផងដែរ ពីព្រោះវៀតណាមមានសមត្ថភាពខ្លាំងក្លា ជាពិសេសលើវិស័យការពារជាតិនេះ ដូចជាការហ្វឹកហ្វឺន និងបច្ចេកវិទ្យាយោធាជាដើម ដែលអាចឲ្យកម្ពុជាយើងបំពេញសមត្ថភាពរបស់ខ្លួនបាន។ គោលការណ៍នេះមិនមានអ្វីដែលថ្មីទេ ប៉ុន្តែយើងពង្រីកបន្ថែមឲ្យកាន់តែរឹងមាំថែមទៀត និងស្របទៅតាមតម្រូវការវិវត្តនៃពិភពលោក ក៏ដូចជាក្នុងតំបន់។
នាយឧត្តមសេនីយ៍បញ្ជាក់ថា រយៈពេលកន្លងមកនេះកម្ពុជាយើងបានបញ្ជូនកម្មសិក្សាការីទៅសិក្សានៅសាធារណរដ្ឋសង្គមនិយមវៀតណាមយ៉ាងច្រើនតាំងពីរថ្នាក់បឋម រហូតដល់ថ្នាក់បំប៉ន និងថ្នាក់ខ្ពស់ផងដែរ ហើយបន្ទាប់ពីសិក្សា ក៏បានយកចំណេះដឹងទៅបំពេញតាមកន្លែងដែលខ្វះចន្លោះ ឲ្យកាន់តែរីកចម្រើនទៅមុខថែមទៀត។
ទាក់ទងដល់ដំណើរទស្សនកិច្ចរបស់លោកឧត្តមសេនីយ៍ឯកបម្រុង ង្វៀន ជីវិញ អនុរដ្ឋមន្ត្រីក្រសួងការពារប្រទេសនៃសាធារណរដ្ឋសង្គមនិយមវៀតណាមនាពេលនេះ, នាយឧត្តមសេនីយ៍ ទៀ បាញ់ បានបញ្ជាក់ថា ជាធម្មតាទេ ការទៅមកសួរសុខទុក្ខគ្នា និងរាយការណ៍ពីសភាពការណ៍នៃការរីកចម្រើនដល់គ្នាទៅវិញទៅមក គឺការចាំបាច់ ហើយការជជែកគ្នាលើបញ្ហាដែលនៅខ្វះខាត ក៏ជាបញ្ហាចាំបាច់ផងដែរ។ តាមនាយឧត្ដមសេនីយ៍ ទៀ បាញ់ បានអះអាងថា ចំពោះបញ្ហាខ្លះៗដែលបានកើតឡើងនៅតាមព្រំដែនយើងទាំងពីរ ក៏ត្រូវតែរាយការណ៍ឲ្យបានដឹងទៅវិញទៅមកផងដែរ ដើម្បីដោះស្រាយ និងការគ្រប់គ្រងបានឯកភពគ្នា។
ឯកឧត្តម នាយឧត្តមសេនីយ៍ ទៀ បាញ់ បានឲ្យដឹងដែរថា ជារៀងរាល់ឆ្នាំ ប្រទេសកម្ពុជា និងវៀតណាម ក៏តែងតែមានពិធីសារមួយរវាងក្រសួងការពារជាតិ និងក្រសួងការពារប្រទេសរបស់វៀតណាម ដែលពិធីសារនោះបានចែងច្បាស់ថា ត្រូវធ្វើអ្វីខ្លះ ហើយពិធីសារនេះភាគច្រើនបានទទួលការគាំទ្រពីវៀតណាមច្រើនជាង ជាពិសេសលើការបណ្តុះបណ្តាលកម្មសិក្សាការី ដែលកម្ពុជាបានបញ្ជូនទៅសិក្សា។
ដោយឡែកបញ្ហាព្រំដែនកម្ពុជា វៀតណាម នាយឧត្តមសេនីយ៍ ទៀ បាញ់ បានអះអាងថា សម្តេចអគ្គមហាសេនាបតីតេជោ ហ៊ុន សែន បានបកស្រាយនៅសភាជាង៥ ម៉ោង ហើយក្រោយនេះ ជាង៣ ម៉ោងទៀត ដូច្នេះវាគ្រប់គ្រាន់អស់ហើយលើបញ្ហាព្រំដែននេះ ហើយការដោះស្រាយដែលអូសបន្លាយយូ គឺយើងធ្វើអ្វីមួយឲ្យជាក់លាក់លើចំណុច ដែលមិនទាន់បានឯកភាពគ្នា ដែលតម្រូវឲ្យបញ្ជាក់បន្ថែមឲ្យបានច្បាស់៕
កម្ពុជា-វៀតណាមធ្លាប់ជួបបញ្ហាលំបាកលំបិនជាមួយគ្នាច្រើន និងមានបញ្ហាថ្មីៗទៀត
0 Comments