កំពង់ស្ពឺ ៖ ក្រុមការងារបច្ចេកទេសនាយកដ្ឋានធារាសាស្ត្រកសិកម្មនៃក្រសួងធនធានទឹក និងឧតុនិយមសហការជាមួយមន្ទីរធនធានទឹក និងឧតុនិយមខេត្តកំពង់ស្ពឺបាននឹងកំពុងធ្វើការជួសជុល និងថែទាំទំនប់អាងទឹកសំរោងបាក់ដែលស្ថិតក្នុងភូមិសាស្ត្រឃុំមហាសាំង ស្រុកភ្នំស្រួច ខេត្តកំពង់ស្ពឺ។
លោក ឈា ប៊ុនរិទ្ធ ប្រធាននាយកដ្ឋានធារាសាស្ត្រកសិកម្មនៃក្រសួងធនធានទឹក និងឧតុនិយម បានឲ្យដឹងកាលពីម៉ោង១០និង៣០នាទីមុននេះថា ការងារជួសជុល និងថែទាំទំនប់អាងទឹកសំរោងបាក់នេះបានចាប់ដំណើរការកាលពីថ្ងៃទី១៨ ខែតុលា ឆ្នាំ២០១៥ ដោយមានទំហំការងារកាប់សំអាតព្រៃនៅសងខាងទំនប់អាង, កាយពុះតួទំនប់អាងប្រវែង១២០ម៉ែត្រ (ដល់បាតអាង), ចាក់ដីបំពេញ និងកិនបង្ហាប់តួទំនប់ដែលដាច់ដោយសារទឹកហូរច្រោះ (រន្ធនាគ), ផ្លាស់ប្ដូរសន្លឹកទ្វារ ចំនួន០២សន្លឹក, ផ្លាស់ប្ដូរដងវ៉ាន និងឧបករណ៍លើកដាក់ទ្វារ, សាងសង់បង្កាន់ដៃទ្វារទឹកថ្មី និងជួសជុលស្នាមប្រេះនៃសំណង់។
លោកប្រធាននាយកដ្ឋានបានបន្តថា បច្ចុប្បន្នក្រុមការងាររបស់លោក និងមន្ទីរធនធានទឹកខេត្តកំពង់ស្ពឺកំពុងសម្រុកធ្វើការងារខាងលើនេះ ដើម្បីឲ្យបានរួចរាល់នៅសប្ដាហ៍ក្រោយ។ លោក អៀ ពិសិដ្ឋ ប្រធានមន្ទីរធនធានទឹក និងឧតុនិយមខេត្តកំពង់ស្ពឺបានឲ្យដឹងថា អាងទឹកសំរោងបាក់អាចស្តុកទឹកបានប្រមាណ៥០ម៉ឺនម៉ែត្រគូប និងមានលទ្ធភាពស្រោចស្រពលើផ្ទៃដីស្រូវវស្សាប្រមាណ៤៥០ហិកតា និងស្រូវប្រាំង៣០ហិកតា។ លោកប្រធានមន្ទីរក៏បានថ្លែងអំណរគុណចំពោះក្រុមការងារក្រសួង ដែលតែងតែចុះជួយការងារមន្ទីររបស់លោកទាំងការងារបច្ចេកទេសគ្រឿងចក្រ និងសម្ភារៈធ្វើឲ្យបណ្ដាប្រព័ន្ធធារាសាស្ត្រនៅទូទាំងខេត្តកំពង់ស្ពឺទទួលបានការជួសជុល និងថែទាំជាប់ជាប្រចាំ៕
ក្រុមការងារបច្ចេកទេសក្រសួងធនធានទឹកជួសជុលទំនប់អាងទឹកសំរោងបាក់
0 Comments