ភ្នំពេញ ៖ បើតាមមន្ត្រីក្រសួងសង្គមកិច្ចអតីតយុទ្ធជន និងយុវនីតិសម្បទា បានឲ្យដឹងកាលពីវេលាម៉ោង១៤និង១០នាទីរសៀលថ្ងៃទី២០ ខែតុលាថា លោកវង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានបង្ហាញយ៉ាងច្បាស់នូវ គោលការណ៍កាត់បន្ថយកុមារស្នាក់នៅមជ្ឈមណ្ឌល របស់រាជរដ្ឋាភិបាលកម្ពុជា និងអង្គការយូនីសេហ្វ ចំនួន៣០% គឺកម្ពុជានឹងខិតខំរកសហគមន៍ និងឪពុកម្តាយ ឲ្យរស់នៅវិញ។
មន្ត្រីដដែលបន្តថា ការថ្លែងរបស់លោករដ្ឋមន្ត្រីបែបនេះ គឺនៅក្នុងកិច្ចជួបពិភាក្សាការងារ ជាមួយលោកស្រី Debora Comini ប្រធានអង្គការយូនីសេហ្វ ប្រចាំនៅកម្ពុជា នៅទីស្តីការក្រសួង ថ្ងៃទី២០ ខែតុលា ឆ្នាំ ២០១៥។
មន្ត្រីដដែលបន្តទៀតថា លោក វង សូត បានលើកឡើងក្នុងទិសដៅ កាត់បន្ថយកុមារនៅក្នុងមជ្ឈមណ្ឌល ដោយ សារស្ថានភាពបច្ចុប្បន្ន គឺកុមារកំព្រាកម្ពុជា ពុំមែនស្ថិតដូចកុមារកំព្រាឆ្នាំ១៩៧៩ ក្រោយពីសង្គ្រាម ដែលអត់ម៉ែអត់ឪទៀតនោះឡើយ ក្នុងនោះសម្រាប់កុមារបច្ចុប្បន្នគ្រាន់តែជួបឧបសគ្គខ្លះៗ ខ្វះការ បីបាច់ការថែរក្សាពីឪពុកម្តាយតែប៉ុណ្ណោះ។ សម្រាប់បញ្ហានេះគឺរាជរដ្ឋាភិបាល និងអង្គការយូនីសេហ្វ មានគោលបំណង កាត់បន្ថយចំនួនកុមារ៣០% ពីមជ្ឈមណ្ឌលថែទាំជំនួសនៅខេត្ត៥ នៅឆ្នាំ២០១៨ គឺនៅរាជធានីភ្នំពេញ ខេត្តបាត់ដំបង កណ្ដាល ព្រះសីហនុ និងខេត្តសៀមរាប។
ក្នុងនោះលោករដ្ឋមន្ត្រី បានថ្លែងបន្តទៀតថា ការកាត់បន្ថយចំនួនកុមារនៅក្នុងមជ្ឈមណ្ឌលនេះ គឺវា អាចប៉ះពាល់ទៅដល់អង្គការមួយចំនួន ដែលមានបំណងចង់បង្កើតមជ្ឈមណ្ឌល ដើម្បីជួយដល់កុមារ នៅកម្ពុជាយើងបន្ថែមទៀត។ ចំពោះករណីនេះ លោករដ្ឋមន្ត្រីបានបញ្ជាក់ថា ការដែលធ្វើឲ្យមានផលប៉ះពាល់បែបនេះ ព្រោះអង្គការ មួយចំនួននៅកម្ពុជា គឺពុំបានសហការជាមួយរាជរដ្ឋាភិបាល និងអង្គការដៃគូផ្សេងៗណាមួយឡើយ ក្នុងនោះឯកឧត្តមរដ្ឋមន្ត្រី ស្នើឲ្យអង្គការទាំងនោះ មកសហការរួមគ្នា ដើម្បីការពារឧត្តមប្រយោជន៍រួម សម្រាប់កុមារទាំងអស់គ្នា។
ក្នុងពិធីជួបពិភាក្សានេះដែរ លោកស្រី Debora Comini ប្រធានអង្គការយូនីសេហ្វ ប្រចាំនៅ កម្ពុជា បានលើកឡើងថា យូនីសេហ្វនៅតែជាដៃគូជាមួយក្រសួងសង្គមកិច្ចយ៉ាងប្រសើរ និងចូលរួម គាំទ្រ ជាមួយការអនុវត្តន៍អនុក្រឹត្យរបស់រាជរដ្ឋាភិបាលផងដែរ ក្នុងការធ្វើសមាហរណកម្ម នៃការថែរទាំ កុមារជំនួស៕
កម្ពុជាជំរុញកាត់បន្ថយចំនួនកុមារស្នាក់នៅ ក្នុងមជ្ឈមណ្ឌល៣០%នៅឆ្នាំ២០១៨
0 Comments