ភ្នំពេញ ៖ យុវជនម្នាក់បានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលដង្កោ បន្ទាប់ពីរូបគេជិះម៉ូតូ ម៉ាកនិច ឌុបសង្សារមកពីញ៉ាំអាហារពេលយប់ លុះមកដល់ផ្លូវស្ងាត់ត្រូវក្រុមចោរប្រើប្រាស់កាំភ្លើងភ្ជង់ប្លន់យកទៅបាត់ដោយសុវត្ថិភាព។
ជនរងគ្រោះឈ្មោះ ជា ណាក់ ភេទប្រុស អាយុជាង២០ឆ្នាំ ជាអ្នកធ្វើការនៅក្រុមហ៊ុនស៊ិន ទ្រីប្រាប់ឲ្យដឹងថា កាលពីវេលាម៉ោង១២និង៤០នាទីរំលងអាធ្រាត្រឈានចូលថ្ងៃទី២០ ខែតុលា ឆ្នាំ២០១៥ រូបគេ និងសង្សារបានជិះម៉ូតូឌុបគ្នាត្រឡប់មកពីហូបអាហារពេលយប់នៅច្បារអំពៅ ដើម្បីត្រឡប់មកកន្លែងស្នាក់នៅក្នុងបារ៉ាស់រថយន្តក្រុមហ៊ុនស៊ិន ទ្រីដោយជិះតាមបណ្តោយផ្លូវ៣៧១ បត់ចូលតាមផ្លូវបេតុងស្ថិតក្នុងសង្កាត់ដង្កោ ខណ្ឌដង្កោ ខណៈនោះស្រាប់តែលេចមុខក្រុមចោរមួយក្រុមមានគ្នា៤នាក់ ជិះម៉ូតូពីរគ្រឿង មួយគ្រឿង ម៉ាកស្កុបពី ពណ៌ស និងម៉ូតូមួយគ្រឿងទៀត មិនចាំម៉ាក ប្រដាប់ដោយកាំភ្លើងខ្លីមួយដើម ធ្វើសកម្មភាពភ្ជង់ប្លន់យកម៉ូតូរបស់រូបគេគេចខ្លួនបាត់ស្រមោល។
ជនរងគ្រោះប្រាប់បន្តថា ម៉ូតូរបស់រូបគេដែលត្រូវក្រុមចោរប្លន់យកទៅបាត់នោះគឺម៉ាកនិច ពណ៌ស ស្លាកលេខ ភ្នំពេញ 1CT-9823 ហើយបន្ទាប់ពីកើតមានករណីប្លន់បែបនេះរូបគេបានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលដង្កោ ដើម្បីជួយអន្តរាគមន៍តាមស្វែងរកក្រុមជនសង្ស័យយកមកផ្ដន្ទាទោសតាមច្បាប់៕
ជិះម៉ូតូឌុបសង្សារមកពីញ៉ាំអាហារ ដល់ផ្លូវស្ងាត់ត្រូវចោរប្លន់យកម៉ូតូទៅបាត់
0 Comments