កំពង់ឆ្នាំង ៖ លោកយាយម្នាក់បានយកខ្សែលួស មកចងកសម្លាប់ខ្លួនដោយសារតែមានជីវភាពខ្វះខាត និងមានជម្ងឺផ្លូវចិត្ត។
ហេតុការណ៍ភ្ញាក់ផ្អើលនេះបានកើតឡើងវេលាម៉ោង៥និង១០នាទីព្រឹក ថ្ងៃទី១៦ ខែតុលា ឆ្នាំ២០១៥ ចំណុចភូមិចាស់តាស៊ឹម ស្ថិតនៅក្នុងភូមិជ្រលងកក់ ឃុំក្រាងលាវ ស្រុករលារប្អៀរ តែលោកយាយបានចងកស្លាប់តាំងពីយប់ថ្ងៃទី១៥ ខែតុលា ឆ្នាំ២០១៥មកម្ល៉េះ។
អ្នកស្រុកក្នុងភូមិជ្រលងកក់បានឲ្យដឹងថា លោកយាយដែលចងកសម្លាប់ខ្លួនខាងលើនេះឈ្មោះ អួន យ៉ុង អាយុ៦១ឆ្នាំ មានទីលំនៅក្នុងភូមិឃុំកើតហេតុខាងលើ សព្វថ្ងៃគាត់រស់នៅ២នាក់ចៅស្រី អាយុ១៤ឆ្នាំម្នាក់ ចំណែកកូនចៅបែកមានប្តីប្រពន្ធ ទៅរស់នៅឆ្ងាយៗអស់ហើយ គឺមានតែចៅស្រីម្នាក់នេះ ដែលនៅជូយមើលថែរក្សាគាត់។
នៅមុនពេលកើតហេតុគេឃើញលោកយាយរងគ្រោះខាងលើនេះដើរសំដៅទៅភូមិចាស់ដែលជាកន្លែងកើតហេតុនោះដែរ តែគេមិនបានចាប់អារម្មណ៍ថាគាត់ទៅធ្វើអីនៅទីនោះទេ លុះភ្លឺឡើងទើបមានអ្នកភូមិប្រទះឃើញ ហើយក៏ផ្អើលឆោឡោឡើង និងបានរាយការណ៍ទៅសមត្ថកិច្ចមូលដ្ឋានឲ្យមកធ្វើការពិនិត្យផងដែរ។
លោកនាយផ្នែកព្រហ្មទណ្ឌ នៃអធិការដ្ឋានស្រុករលារប្អៀរបានឲ្យដឹងថា ករណីស្លាប់របស់លោកយាយខាងលើនេះ ក្រោយពីសមត្ថកិច្ចក្រុមបច្ចេកទេសធ្វើការពិនិត្យទៅលើសាកសពរួចរាល់ហើយ សមត្ថកិច្ចឲ្យដឹងថា ការស្លាប់របស់លោកយាយ គឺពិតជាបានស្លាប់ដោយចងកធ្វើអត្តឃាតប្រាកដមែន។ សពលោកយាយត្រូវបានប្រគល់ឲ្យទៅក្រុមគ្រួសារនិងអ្នកភូមិជួយយកទៅចាត់ចែងធ្វើបុណ្យទានតាមប្រពៃណី៕
លោកយាយអាយុ៦១ឆ្នាំចងកសម្លាប់ខ្លួនចោលចៅស្រីតែម្នាក់ ព្រោះមានជម្ងឺផ្លូវចិត្ត
0 Comments