ភ្នំពេញ ៖ ដោយសារផ្លូវបេតុងចំនួន៤ខ្សែនៅក្នុងមូលដ្ឋានសង្កាត់កាកាបខណ្ឌពោធិ៍សែនជ័យមានការខូចខាតខ្លាំងពេកទើបនៅព្រឹកថ្ងៃទី៣០ ខែតុលា ឆ្នាំ២០១៥នេះ អាជ្ញាធរខណ្ឌខណ្ឌបានរៀបចំបើកការដ្ឋានជួសជុលផ្លូវទាំងនោះឡើងវិញ ហើយក្នុងនោះក៏មានការដាក់ប្រព័ន្ធលូថ្មីចំនួន៤ខ្សែទៀតនិងស្តារប្រព័ន្ធលូចាស់ចំនួន៤ខ្សែ រួមនិងស្តារប្រឡាយបង្ហូរទឹកស្អុយមួយកន្លែងផងដែរ។
ការជួសជុលនេះត្រូវបានមតិប្រជាពលរដ្ឋរិះគន់ថា ស្ថាបនាមិនទាន់បានប៉ុន្មានផងក៏រងការខូចខាតទៅវិញហើយក្រុមហ៊ុនធ្វើមិនសូវមានគុណភាព។
ពិធីនេះ ប្រព្រឹត្តិទៅដោយមានការចូលរួមពីលោក ហែម ដារិទ្ធិ អភិបាលនៃគណៈអភិបាលខណ្ឌពោធិ៍សែនជ័យ និងមានការចូលរួមពីមន្ត្រី សាលាខណ្ឌជាច្រើនរូបរួមទាំងប្រជាពលរដ្ឋនៅក្នុងសង្កាត់កាកាបជិត៣០០នាក់ផងដែរ។
នៅក្នុងពិធីនោះលោក ហែម ដារិទ្ធិ បាននិយាយទៅកាន់ប្រជាពលរដ្ឋថា ដើម្បីឲ្យផ្លូវដែលយើងស្ថាបនារួចមានគុណភាពប្រើប្រាស់បានយូរអង្វែង យើងត្រូវតែពិនិត្យទៅលើប្រព័ន្ធលូតើវាមានការ កកស្ទះទឹកឬអត់ បើសិនជាវាកកស្ទះទឹក គឺបង្កឲ្យប៉ះពាល់ដល់ផ្លូវជាមិនខាន ទើបពេលនេះ គឺយើងធ្វើ ទាំងផ្លូវ ដាក់លូ ស្តារប្រព័ន្ធលូ និងស្តាប្រឡាយទឹកផងដែរ។ ហើយចំពោះសង្កាត់កាកាបនេះ គឺជាសង្កាត់មួយដែលរងការលិចលង់ជំនន់ទឹកភ្លៀងខ្លាំងជាងគេ។
លោកបានបន្តថា ដើម្បីឲ្យផ្លូវនិងប្រព័ន្ធលូអាចប្រើប្រាស់បានយូរនោះ គឺក៏ត្រូវការបងប្អូនប្រជាពលរដ្ឋ ចូលរួមជាមួយផងដែរ ដូចជាការវេចខ្ចប់សំរាមទុកដាក់ឲ្យបានត្រឹមត្រូវ កុំបោះចូលក្នុងលូវាបង្កឲ្យកកស្ទះទឹកហូរមិនលឿនឬក៏មិនរួចតែម្តង។
លោកបានបន្តថា ការជួសជុលផ្លូវ និងដាក់ប្រព័ន្ធលូ ឬស្តារប្រព័ន្ធលូ នេះ គឺត្រូវបានក្រុមហ៊ុន សំ ស៊ីវន ជាអ្នកដេញថ្លៃបានទទួលគម្រោងជួសជុលនិងស្តារ ក្នុងនោះជួសជុលផ្លូវចាក់បេតុងឆ្អឹងដែកចំនួន៤ខ្សែ មានផ្ទៃក្រឡាសរុប៤៧៥០ម៉ែត្រការ៉េ នៅក្នុងភូមិប៉ប្រកខាងត្បូង១ខ្សែប្រវែង៤៦៥ម៉ែត្រការ៉េ ភូមិតាងួន១ខ្សែប្រវែង៥២៥ម៉ែត្រការ៉េផ្លូវលេខ៣០ ក្នុងភូមិត្រពាំងល្វា១ខ្សែប្រវែង១.១០០ម៉ែត្រការ៉េ និងផ្លូវលេខ៥៦K ក្នុងភូមិចំការឪឡឹកនិងភូមិតាងួន១ខ្សែប្រវែង២.៦៦០ម៉ែត្រការ៉េ និងដាក់ប្រព័ន្ធលូថ្មីចំនួន៤ខ្សែ ក្នុងភូមិតាងួន ភូមិប៉ប្រកខាងជើងនិងប៉ប្រកខាងត្បូងសរុបប្រវែង៥.៦៤៥ម៉ែត្រការ៉េ រួមនិងគម្រោងស្តារ ប្រឡាយបង្ហូរទឹកសំអុយចំនួន១កន្លែងក្នុងភូមិចំការឪឡឹកប្រវែង៤៥០ម៉ែត្រ។
លោកបានបន្តថា បន្ទាប់ពីបើកការដ្ឋានរួចពេលក្រុមហ៊ុនចាប់ដំណើរការស្ថាបនានោះ សូមឲ្យបងប្អូនប្រជាពលរដ្ឋចូលរួមសហការជាមួយក្រុមហ៊ុនផង ដើម្បីឲ្យក្រុមហ៊ុនធ្វើទៅបានដោយរលូននោះ ពីព្រោះការស្ថាបនាវាតែងតែប៉ះពាល់បន្តិចបន្តួចចៀសមិនរួចនោះទេ។
ដោយឡែកពាក់ព័ន្ធនិងការបើកការដ្ឋានជួសជុលនេះដែរ ប្រជាពលរដ្ឋរស់នៅក្នុងសង្កាត់កាកាបបានធ្វើការរិះគន់ចំពោះក្រុមហ៊ុន សំ ស៊ីវន ថានាពេលកន្លងមកក្រុមហ៊ុន១នេះបានស្ថាបនាផ្លូវបេតុងនៅក្នុងមូលដ្ឋានរបស់ពួកគាត់ ប៉ុន្តែពុំមានគុណភាពស្តង់ដារត្រឹមត្រូវទៅតាមបទដ្ឋានបច្ចេកទេសនោះទេ ពីព្រោះផ្លូវដែល ក្រុមហ៊ុន១នេះបានស្ថាបនារួចនោះ គឺវាហាក់បីដូចជាបានតែ១រយៈខ្លីប៉ុណ្ណោះ គឺផ្លូវត្រូវរងការខូចខាតជាបណ្តើរៗទៅវិញ ។ប៉ុន្តែពេលនេះពួកគាត់សង្ឃឹមថា ក្រុមហ៊ុន សំ ស៊ីវន ធ្វើការស្ថាបនាដោយយកចិត្តទុកដាក់ជាមិនខានហើយអាចធានាបានគុណភាពយូរអង្វែង ដើម្បីកុំឲ្យខាតបង់លុយកាក់របស់រដ្ឋនិងប្រាក់បដិភាគរបស់ប្រជាពលរដ្ឋបើសិនជាធ្វើពីមុខខូចពីក្រោយបែបនេះការអភិវឌ្ឍន៍មូលដ្ឋានមិនអាចដើរទៅមុខរួចទេ៕
ស្ថាបនាផ្លូវបេតុងមិនទាន់បានប៉ុន្មានផងបើកការដ្ឋានជួសជុលឡើងវិញ
0 Comments