ប្រដាល់ ៖ ក្នុងកម្មវិធីប្រកួតប្រដាល់ជាមិត្តភាពអន្តរជាតិលើសង្វៀន SEA-TV នាថ្ងៃទី៤ ខែតុលា ឆ្នាំ២០១៥ អ្នកប្រដាល់ខ្មែរ៥រូបដែលឡើងប្រកួតជាមួយថៃនោះ គឺឈ្នះ២ ចាញ់៣នាក់។
លាស់ យីន អ្នកប្រដាល់ក្លិបសម្រែករាជសីហ៍ ប្រើពេលតែ២ទឹកប៉ុណ្ណោះ ផ្ដួលអ្នកប្រដាល់ប្រេស៊ីល K-Ros ឲ្យសន្លប់ក្រោកលែងរួច។
K-Ros អ្នកប្រដាល់ប្រេស៊ីលរូបនេះ ក្រៅពីចេះប្រើដៃ និងទាត់នោះ គេមិនចេះស្នៀតអ្វីផ្សេងនោះទេ។ លាស់ យីន បានប្រើជង្គង់ផ្ដួលអ្នកប្រដាល់ប្រេស៊ីលរូបនេះនៅទឹកទី២។
ឡៅ ចន្ទ្រា អ្នកប្រដាល់ក្លិបទ័ពឆ័ត្រយោង៩១១ បានស្តារភាពបរាជ័យពីការចាញ់ថៃលើកមុន មកយកឈ្នះអ្នកប្រដាល់ថៃ Pheach Nam Ek ដោយពិន្ទុ។ ប៉ុន្តែការឈ្នះរបស់ចន្ទ្រាលើកនេះ គឺទាំងលំបាកបន្ទាប់ពីប្រកួតគ្នា៥ទឹកពេញនោះ។
ស្ទើរគ្រប់ទឹកទាំងអស់ ចន្ទ្រា ជាអ្នកមានប្រៀបតែពេលខ្លះក៏ Pheach Nam Ek ធ្វើឲ្យ ចន្ទ្រា ចង់គាំងម្ដងៗដែរ តែបន្ទាប់ពីប្រកួតគ្នា៥ទឹកពេញនោះ ជ័យជំនះបានទៅ ឡៅ ចន្ទ្រា។
អ្នកប្រដាល់ ឯម សុធី ក្លិបឬទ្ធិពោធិ៍សែនជ័យកីឡា ប្រកួតចាញ់ពិន្ទុអ្នកប្រដាល់ថៃ Phun Savath។ សុធី ដែលជាអ្នកខ្លាំងមួយរូបនោះត្រូវ Savath វាយរាប់ចំនួន២លើកនៅទឹកទី១។ កែងSavath វាយចំថ្ពាល់ស្ដាំសុធីទាំង២កែង ធ្វើឲ្យ សុធី ដួលហូរឈាមហើយត្រូវអាជ្ញាកណ្ដាលរាប់៨។ ចាប់ពីទឹកទី២ទៅស្ថានភាព នៃការប្រកួតមានលក្ខណៈតឹងតែង តែអ្នកប្រដាល់ថៃនៅបន្តមានប្រៀបលើសុធីបន្តិចបន្តួចដដែល។ ចប់ទឹកទី៥ អ្នកប្រដាល់ថៃជាអ្នកឈ្នះពិន្ទុ។
ចំពោះការប្រកួតរបស់ ឃីម បូរ៉ា អ្នកប្រដាល់ក្លិបរស្មីភូមិគាបខេត្តបន្ទាយមានជ័យវិញគេបានវាយចាញ់អ្នកប្រដាល់ថៃPha Ravy ដោយពិន្ទុ បន្ទាប់ប្រកួតគ្នា៥ទឹកពេញនោះ។
ជាលើកទី១ ដែលគេឃើញ ឃីម បូរ៉ា បែកឈាមនៅក្នុងការប្រកួតលើសង្វៀន។ អ្នកប្រដាល់ថៃPha Ravyនេះ គេរឹងមាំណាស់ ទោះបីជា បូរ៉ា បញ្ចេញស្នៀតប្រចាំត្រកូល កែង និងជង្គង់យ៉ាងណាក្តី ក៏ពុំអាចបំបែករបាំងការពាររបស់ Pha Ravy បានដែរ។ ចប់ការប្រកួត បូរ៉ា ចាញ់ពិន្ទុអ្នកប្រដាល់ថៃ ។
ផាន់ គ្រាន់ អ្នកប្រដាល់ក្លិបគុជសាកីឡា ក៏វាយចាញ់Sing Pheach Noy អ្នកប្រដាល់ថៃ ដោយពិន្ទុដែរ ក្រោយពីប្រកួតគ្នាប្រាំទឹកពេញនោះ។ គ្រាន់ បានធ្វើការវាយលុកទៅលើ Sing Pheach Noy ដោយប្រើស្នៀតទាត់ផ្ទួនៗ តែមិនអាចធ្វើអ្វីអ្នកប្រដាល់ថៃនោះបានឡើយ។ ផ្ទុយទៅវិញ Sing Pheach Noy បានសងវិញនូវអ្វីដែលគ្រាន់បានវាយមកលើគេ ដែលបណ្តាលឲ្យ ផាន់ គ្រាន់ ថិតក្នុងស្ថានភាពការពារខ្លួនយ៉ាងលំបាក។ ទីបំផុត អ្នកប្រដាល់ថៃឈ្នះ ផាន់ គ្រាន់ដោយពិន្ទុ។
ដោយឡែក សេក គឹមរួន ក្លិបអង្គរមានជ័យខេត្តសៀមរាបបានផ្តួលអ្នកប្រដាល់ចាន់ រក្សា ក្លិបអេភូថងកីឡាដោយពិន្ទុ។ គឹមរួន ដែលមានកណ្ដាប់ដៃខ្លាំងនោះ បានដាល់រក្សាដួលនៅក្នុងទឹកទី២ ប៉ុន្តែមិនបានធ្វើឲ្យរក្សាចុះចាញ់ងាយៗនោះទេ គេក្រោកបន្តការប្រកួតជាមួយ គឹមរួន រហូតដល់ចប់ទឹកទី៥ និងចាញ់ត្រឹមពិន្ទុប៉ុណ្ណោះ។
មៀច សុខរ៉ា អ្នកប្រដាល់ក្លិប តាព្រហ្មមានជ័យ ប្រកួតស្មើជាមួយ សុខ ចិន្តា អ្នកប្រដាល់ក្លិបឃ្លាំងមឿងកីឡា ខណៈដែល អ៊ិន កំសត់ អ្នកប្រដាល់ក្លិបសម្រែករាជសីហ៍ឈ្នះថៃ ស័ក្តសារៈ ក្លិប កងទ័ពជើងទឹកដោយពិន្ទុ ហើយពេជ្រ ប៊ុនឆេន ក្លិបមជ្ឈមណ្ឌលកីឡា ខ.ភ.ម ផ្ដួល ហេង ប៊ុនសុងក្លិបព្រៃទទឹងខេត្តបាត់ដំបងក្នុងទឹកទី២។
*K.Cement ៖ ឆៃ សារ៉ា និងប្រាក់ រស្មី ឡើងទៅពាក់កណ្ដាលផ្ដាច់ព្រ័ត្រ
ប្រដាល់ ៖ ការប្រកួតបញ្ចប់ពូល A នៃខ្សែក្រវាត់ K-Cement ទម្ងន់៦៣,៥០គីឡូក្រាមលើសង្វៀន SEA-TV ថ្ងៃទី៣ ខែតុលា ឆ្នាំ២០១៥ ឆៃ សារ៉ា អ្នកប្រដាល់សមាគមកីឡាក្រសួងការពារជាតិបានក្លាយជាអ្នកប្រដាល់ស្ថិតនៅកំពូលគេនៃពូលA។
ឆៃ សារ៉ា និងប្រាក់ រស្មី ដែល២ប្រកួតឈ្នះទាំង២ប្រកួតដូចគ្នានោះ នៅក្នុងការប្រកួតលើកទី ៣ ដើម្បីដណ្ដើមលំដាប់ថ្នាក់កំពូលតារាងនោះ សារ៉ា បានផ្ដួលអ្នកប្រដាល់ប្រាក់ រស្មីនៅទឹកទី២។ទោះជាយ៉ាងណា ក៏អ្នកប្រដាល់ទាំង២រូបនេះ បានឡើងទៅប្រកួតនៅវគ្គពាក់កណ្ដាលផ្ដាច់ព្រ័ត្រជាមួយគ្នាដែរ។
ចំណែកការប្រកួតគ្នា រវាង តក់ សោភ័ណ្ឌ ក្លិបម្កុដរាជសីហ៍ជាមួយ ស៊ូ វណ្ណៈក្លិបនាគមានជ័យវិញនោះ វណ្ណៈផ្ដួល សោភ័ណ្ឌ នៅទឹកទី២។ តែយ៉ាងណា ទាំង សោភ័ណ្ឌ និងវណ្ណះ នេះ គឺត្រូវជ្រុះធ្លាក់ពីការប្រកួតដណ្ដើមខ្សែក្រវាត់ត្រឹមនេះ៕
ខ្មែរឈ្នះ២ ចាញ់៣ ក្នុងការប្រកួតជាមួយថៃនៅSEA-TV
0 Comments