ព្រឹត្តិការណ៍ខ្សែក្រវាត់ជើងឯកTIFFY SUPER FIGHT ទម្ងន់៦០គីឡូក្រាម លើសង្វៀន TV5 Arena នាយប់ថ្ងៃទី២៩ ខែវិច្ឆិកា ឆ្នាំ២០១៥នេះ បានឈានមកដល់វគ្គផ្ដាច់ព្រ័ត្រហើយ។
អ្នកប្រដាល់ ផៃ គឹមហឿត ក្លិបគីសែមានរិទ្ធ និង ឡុង សំណាង អ្នកប្រដាល់សាលវ័ន្តកីឡា ពួកគេទាំងពីរនឹងត្រូវប្រជែងគ្នា ដើម្បីយកតំណែងជាម្ចាស់ខ្សែក្រវាត់ជើងឯក TIFFY SUPER FIGHT ទម្ងន់៦០គីឡូក្រាមនេះ។ ផៃ គឹមហឿត ឆ្លងកាត់ការប្រកួតជម្រុះ៤ដំណាក់កាលកន្លងមក គេវាយឈ្នះទាំង៤ប្រកួត។ លើកទី១គេឈ្នះឈាន រស្មី ក្លិបរាជសីហ៍ខេត្តរតមគិរីដោយពិន្ទុ លើកទី២ ឈ្នះសេក ចាន់រាជ ក្លិបអង្គរមានជ័យដោយពិន្ទុ លើកទី៣ឈ្នះឃីម សាវ៉េត ក្លិបព្រះខ័នរាជដោយពិន្ទុ និងលើកទី៤ ដែលជាការប្រកួតពាក់កណ្តាលផ្តាច់ព្រ័ត្រនោះ គឹមហឿតបានវាយឈ្នះញ៉េ សិទ្ធ ក្លិបអេភូថងកីឡាដោយពិន្ទុ។
ចំពោះ អ្នកប្រដាល់ ឡុង សំណាង គេឈ្នះទាំង៤ដំណាក់កាលដូចគ្នាដែរ។ លើកទី១ សំណាងវាយឈ្នះម៉ន គឹមឡុង ក្លិបការិយាល័យទី៥ កងទ័ពជើងគោកដោយពិន្ទុ លើកទី២ឈ្នះផុន ផុល ក្លិបតាព្រហ្មមានជ័យ ដោយពិន្ទុ លើកទី៣ឈ្នះថន ភឿតក្លិបឃ្លាំងមឿងកីឡាដោយពិន្ទុ និងលើកទី៤ ប្រកួតពាក់កណ្តាលផ្ដាច់ព្រ័ត្រ វាយឈ្នះឌុន ប៊ុនធឿន ក្លិបប្រដាល់ខេត្តព្រៃវែងដោយពិន្ទុ ។
រវាងផៃ គឹមហឿត និង ឡុង សំណាង មិនដឹងថាអ្នកណានឹងឈ្នះការប្រកួតនេះទេ។ តាមការកត់សម្គាល់នោះ អ្នកប្រដាល់ទាំងពីររូបនេះ ពុំមានប្រវត្តិធ្លាប់ជួបគ្នាទេកន្លងមក ដូច្នេះនរណាឈ្នះ នរណាចាញ់នោះ មិនអាចទស្សន៍ទាយមុនបានឡើយ ។ ចាំមើល តើអ្នកណាជាម្ចាស់ខ្សែក្រវាត់ជើងឯកTIFFY SUPER FIGHT ទម្ងន់៦០គីឡូក្រាម នេះ ? ។
ចំពោះ ញ៉េ សិទ្ធ អ្នកប្រដាល់ក្លិបអេភូថងកីឡា ដែលត្រូវប្រកួតដណ្តើមយកលេខ៣ ជាមួយ ឌុន ប៊ុនធឿន ក្លិបខេត្តព្រៃវែង នោះវិញ ពុំដឹងថា បានទៅនរណានោះដែរ ព្រោះពួកគេទាំងពីរ ជាមិត្តរួមគ្រូជាមួយគ្នា ។ តែបើតាមលោកអេភូថង ដែលជាគ្រូបង្វឹកនិយាយនោះថា ពួកគេទាំងពីរនាក់ នឹងវាយគ្នាអស់ពីសមត្ថភាព ដើម្បីដណ្តើមយកប្រាក់រង្វាន់លេខ៣ នេះ។
គួរបញ្ជាក់ថា សម្រាប់អ្នកទទួលបានជាជើងឯកខ្សែក្រវាត់TIFFY SUPER FIGHT ទម្ងន់៦០គីឡូក្រាម នឹងទទួលបានខ្សែក្រវាត់ ពាន និង ទឹកប្រាក់រង្វាន់ចំនួន៤.០០០ដុល្លារ លេខ២ បានពាន និងរង្វាន់២.០០០ដុល្លារ លេខ៣ ពាន និងរង្វាន់អម៧៥០ដុល្លារ ហើយលេខ៤ បាន៥០០ដុល្លារ ៕
ផៃ គឹមហឿត និង ឡុង សំណាង នរណាជាម្ចាស់ខ្សែក្រវាត់ TIFFY SUPER FIGHT? ញ៉េ សិទ្ធ និង ឌុន ប៊ុន ធឿនវាយយកលេខ៣
0 Comments