សៀមរាប ៖ រាត្រីថ្ងៃ១៥កើត ខែកត្តិក ឆ្នាំមមែ បស្តស័ក ព.ស២៥៥៩ ត្រូវនឹងថ្ងៃទី២៥ ខែវិច្ឆិកា ឆ្នាំ២០១៥ នៅ ក្រុងទេសចរណ៍សៀមរាបអង្គរ នាឆ្នាំនេះអាជ្ញាធរខេត្ត ក្រុង និង មន្ទីរវប្បធម៌ និង វិចិត្រសិល្បៈខេត្ត និង ការចូលរួមរបស់បណ្តាអង្គភាព ស្ថាប័ន និង បងប្អូនប្រជាពលរដ្ឋគ្រប់មជ្ឈដ្ឋាន បានរៀបចំប្រារព្ធពិធី អកអំបុក សំពះព្រះខែ ក្នុងការបង្ហាញនៅចំពោះសាធារណមតិជាតិ អន្តរជាតិ អំពីភាពសម្បូរបែបខាង វិស័យវប្បធម៌ អរិយធម៌របស់ខ្មែរក៏ជាការឆ្លុះបញ្ចាំងឲ្យឃើញកម្ពុជាកំពុងស្ថិតក្នុងសន្តិភាពសុខដុមរមនា ពេញលេញទូទាំងប្រទេស ។ ពិធីនេះបានប្រារព្ធធ្វើនៅបរិវេណសួនច្បារមហាសណ្ឋាគារអង្គរខេត្តសៀមរាប ក្រោមវត្តមានរបស់លោក ឃឹម ប៊ុនសុង អភិបាលនៃគណៈអភិបាលខេត្ត និង លោក នូ ផល្លា ប្រធានក្រុមប្រឹក្សាខេត្ត លោកឈឹម ម៉ាអ្នកតំណាងរាស្ត្រមណ្ឌលសៀមរាបព្រមទាំងឯកឧត្ដម លោកឧកញ៉ា លោកជំទាវ ជាសមាជិកក្រុមប្រឹក្សាខេត្ត គណៈអភិបាលខេត្ត អស់លោក លោកស្រីជាថ្នាក់ដឹកនាំមន្ទីរ មន្ត្រីរាជការ អាជ្ញាធរក្រុង និង ប្រជាពលរដ្ឋយ៉ាងច្រើនកុះករ។
ពិធីបុណ្យនេះបានចាប់ផ្តើមដំណើរ ការទៅតាមកម្មវិធីកំណត់ពីម៉ោង២០ រហូតដល់រំលង អាធ្រាត ដោយមានការគោរពទៅតាមកាលវេលានៃដំណើរយាងចររបស់ព្រះច័ន្ទ និង គោរពទៅ តាមកាលកំណត់ ក្បួនខ្នាតគម្ពីរដីកា ដែលប្រជាពលរដ្ឋខ្មែរ យើងគោរពប្រតិបត្តិទៅតាមគន្លង ទំនៀមទម្លាប់ប្រពៃណី ប្រសិទ្ធិពិធីការជាលម្តាប់លម្តោយតរៀងមក។ ពិធីបុណ្យបានប្រព្រឹទ្ធទៅ មិនត្រឹមតែបានបង្ហាញចំពោះសាធារណមតិជាតិ អន្តរជាតិឲ្យឃើញ អំពីភាពសម្បូរបែបខាង វិស័យវប្បធម៌ អរីយធម៌ របស់ខ្មែរប៉ុណ្ណោះទេ តែជាសក្ខីភាពឆ្លុះបញ្ចាំងឲ្យឃើញថា កម្ពុជាបានកំពុងស្ថិត ក្នុងសន្តិភាព សុខដុមរមនា យ៉ាងពេញលេញ ទូទាំងប្រទេស ។ ពិធីអកអំបុក សំពះព្រះខែ គឺ ជាពិធីបុណ្យដែលមានចារឹកនៅក្នុងគម្ពីរបរម័តទិព្ធនី អត្ថកថា ចរិយាបិតក និយាយអំពី ការឧទ្ទិស្នាន ឧបោសថសីល របស់ព្រះបរមពោធិសាត ក្នុងជាតិកំណើតជា សត្វទន្សាយ មានព្រះនាមសសបណ្ឌិត ដើម្បីបំពេញពោធិសម្ពា ជាទានបរិម័តបារមី ឲ្យបានត្រាស់ជាព្រះពុទ្ធ។
តាំងពីបុរាណកាលមក ពិធីអកអំបុក សំពះព្រះខែ ខ្មែរយើងមានទម្លាប់ប្រារព្ធធ្វើនៅតាមទីវត្ត អារាម ឬ នៅតាមភូមិ គេហដ្ឋានរៀងៗខ្លួន មិនដូច្នោះសោត គេអាចជួបជុំគ្នាធ្វើឡើង នៅតាមទី សាធារណៈណា មួយក៏បានផងដែរ។ តាំងពីបុរាណកាលមក ការប្រារព្ធពិធីនេះ ត្រូវបានរៀបចំ គ្រឿងសក្ការបូជា មានទៀនធូប ផ្កាភ្ញី នំចំណី ផ្លែឈើ សំខាន់ ផ្លែដូងខ្ចី និង ចេកទុំ ហើយចំពោះអំបុកវិញ ខ្មែរយើងពីបូរាណមក ពេលជួបជុំគ្នាប្រារព្ធ គឺត្រូវបាននាំមកជាមួយត្បាល់បុក អង្រែ និង ស្រូវទុំថ្មីៗ មកលីញដាល់អំបុក នៅនឹងកន្លែងប្រារព្ធពិធី ដើម្បីធ្វើឲ្យឱកាសនោះមានភាពសប្បាយរីករាយក្រៃលែង។ ក្រោយពេលដាល់អំបុក បានហើយគេយកអំបុកនោះទៅចាក់ជាពំនូក នៅមុខរានសក្ការបូជា និង នាំគ្នាបូជាទៀនធូក ឧទ្ទិសសុំសេចចក្តីសុខសប្បាយ សុំការរីកចម្រើន នូវភោគផលនៅបណ្តាឆ្នាំខាងមុខ ព្រមទាំងបួងសួងផ្សងនូវ ទឹកភ្លៀង ដែលបុរាណកាលឲ្យឈ្មោះថា (ពិធីសំពះព្រះខែ ) ។ ក្នុងរាត្រីនោះដែរ ក៏មានការសម្ដែងនូវ សិល្បៈ របាំបុរាណ ការប្រឡងចម្រៀង ការបង្ហាញម៉ូតសំលៀកបំពាក់របៀបខ្មែរផងដែរ។
ក្រោយពីពិធីសម្រកទៀនបង្វិលផ្សងទឹកភ្លៀងរួចមក គណៈអធិបតី ភ្ញៀវកិត្តិយស និង បងប្អូនប្រជា ពលរដ្ឋដែលបានចូលរួមក្នុងពិធី បាននាំគ្នាធ្វើការដង្ហែប្រទីបសំពៅជ័យ និង កន្ទោង ទៅបណ្ដែតក្នុងទឹកស្ទឹង សៀមរាប ដើម្បីឧទ្ទិស និង សុំសម្មាលាទោស ដល់ព្រះគង្គា ដែលផ្ដល់ដល់មនុស្សលោក សត្វ បានយក ទៅប្រើប្រាស់ ផឹក មួជ និង ស្រោចស្រពដំណាំកសិកម្ម ដល់ប្រជាកសិករក្នុងការចិញ្ចឹមជីវិតប្រចាំថ្ងៃ៕
ពិធីអកអំបុក សំពះព្រះខែ ព្រមទាំងបួងសួងផ្សងទឹកភ្លៀងនៅខេត្តសៀមរាប
0 Comments