ភ្នំពេញ ៖ នៅព្រឹកថ្ងៃទី៥ ខែធ្នូ ឆ្នាំ២០១៥នេះ នគរបាលព្រហ្មទណ្ឌខណ្ឌជ្រោយចង្វារបានបង្ហាញមុខក្រុមជនសង្ស័យ ដែលរៀបចំគម្រោងវាយសម្លាប់មនុស្សប្លន់យកម៉ូតូកាលពី៤ ខែធ្នូ ឆ្នាំ២០១៥ រួមនឹងវត្ថុតាងដំបងវាយសម្លាប់ និងម៉ូតូ។ ប៉ុន្តែអ្វីដែលសមត្ថកិច្ចហួសចិត្តនោះ គឺក្រោយពេលសារភាពពីគម្រោងប្លន់សម្លាប់សង្សារយកម៉ូតូហើយនោះ នាងបានសុំសមត្ថកិច្ចទៅរៀបការនៅថ្ងៃទី២០ ខែធ្នូ ដោយមិនដឹងថាខ្លួនមានទោសកម្រិតណាឡើយ។
សមត្ថកិច្ចបានឲ្យដឹងថា ក្នុងការវាយសម្លាប់នេះ ពួកគេបានរៀបចំគម្រោងទុកជាមុន ដោយជនសង្ស័យឈ្មោះធឿន គីម ជាសន្តិសុខឯកជនISAមានស្រុកកំណើតនៅភូមិសាម្កាក់ ឃុំអូរតាប៉ោង ស្រុកបាកាន ខេត្តពោធិ៍សាត់ បានរៀបចំគម្រោងតាំងពី១០ថ្ងៃមុនដោយសារគេខឹងនឹងបុរសជាសង្សារថ្មីមកដណ្តើមស្រីស្នេហ៍របស់គេ។ ប្រភពបន្តថា ស្ត្រីចិត្តស្លុយរូបនោះ គ្រាដែលដឹងថា សង្សារចាស់ខឹងនឹងសង្សារថ្មី នាងរឹតតែបញ្ឈឺចិត្តរហូតដើម្បីឈានដល់ការរៀបគម្រោងសម្លាប់យកម៉ូតូពីជនរងគ្រោះ។
សមត្ថកិច្ចបានបន្តថា ខណៈពេលសាកសួរ ក៏បែកធ្លាយរឿងនាងជាស្ត្រីមេម៉ាយកូន១ មានសង្សារចាស់ជាសន្តិសុខ និងមានគូដណ្ដឹង១ទៀត ដែលនឹងត្រូវរៀបការនៅថ្ងៃទី២០ ខែធ្នូ នៅខេត្តកំពត ហើយនេះជាការរៀបចំគម្រោងដើម្បីប្លន់យកម៉ូតូជិះទៅរៀបការ។ ចំណែកជនសង្ស័យជាសន្តិសុខ មិនមានគម្រោងប្លន់អ្វីនោះទេ ប៉ុន្តែគ្រាន់តែឈឺចិត្តនឹងសង្សារចាស់ ដែលមានថ្មីហើយតេបញ្ឈឺរាល់ថ្ងៃ ដោយរាល់ពេលឲ្យតែគេខលទៅ នាងតែងតែនិយាយថាកំពុងដេកជាមួយសង្សារថ្មី។
ដូច្នេះគោលបំណងរបស់បុរសជាសន្តិសុខនេះគឺសម្លាប់ជនរងគ្រោះតែម្ដង ព្រោះតែគំនុំ ហើយស្ត្រីសង្ស័យថាសម្លាប់ក៏សម្លាប់ចុះ តែនាងសូមយកម៉ូតូដើម្បីលក់យកលុយទៅរៀបការ។
សមត្ថកិច្ចបានបន្តទៀតថា នៅវេលាម៉ោង១០យប់ថ្ងៃទី៣ ខែធ្នូ ស្ត្រីសង្ស័យនោះបានមកជួបសង្សារចាស់ជាសន្តិសុខ នៅកន្លែងសន្តិសុខយាមនោះ ហើយគេក៏រៀបចំគម្រោងថាត្រូវឲ្យដឹកសង្សារថ្មីមកកន្លែងកើតហេតុដើម្បីឲ្យគេសម្លាប់ចោល។ តាមការគ្រោងទុក នៅយប់មុនពេលកើតហេតុជនរងគ្រោះ និងស្ត្រីសង្ស័យ បានដឹកគ្នាពីស្ទឹងមានជ័យមកច្រៀងខារ៉ាអូខេ«ឌ្រីមវើល» ស្ថិតក្នុងភូមិកៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ។ ក្រោយពីចេញពីខារ៉ាអូខេវេលានៅម៉ោងប្រហែល១យប់រំលងអធ្រាត្រឈានចូលថ្ងៃទី៤ ខែធ្នូ នាងក៏ឲ្យសង្សារថ្មីនោះឌុបឆ្វែលចុះឆ្វែលឡើងដើម្បីបង្ហាញសង្សារចាស់ជាសន្តិសុខថា គេបានដឹកសង្សារថ្មីនោះមកហើយ។
ចំណែកសង្សារចាស់វិញបានយកដំបង ដែលខ្លួនកាប់ទុកកាលពី១០ថ្ងៃមុនជាអាវុធសម្លាប់ជនរងគ្រោះ លាក់ទុកនៅម្តុំកន្លែងកើតហេតុតាំងពីម៉ោង១០យប់ម្ល៉េះ។ លុះពេលស្ត្រី និងជនរងគ្រោះមកដល់កន្លែងនោះ ក៏ឈប់ឱបថើប គ្នារួចក៏បបួលគ្នារួមភេទនៅក្នុងព្រៃត្រែង។ ខណៈពេលកំពុងឱបថើបញីញក់យ៉ាងត្រេកត្រអាលនោះ និងបម្រុងឡើងឋានសួគ៌ ស្រាប់សង្សារចាស់ក៏យកដំបង ដែលលាក់ទុកនោះវាយពីក្រោយរហូតទាល់តែផុងលលាដ៍ក្បាលស្លាប់តែម្ដង។
សមត្ថកិច្ចបញ្ជាក់ថា ស្ត្រីសង្ស័យឈ្មោះអ៊ូច ស្រីរ័ត្ន ហៅរ័ត្ន អាយុ១៩ឆ្នាំ រស់នៅភូមិត្នោតជ្រុំ សង្កាត់បឹងទំពុន ខណ្ឌមានជ័យ និងមានស្រុកកំណើតនៅភូមិប្រាល ឃុំតានី ស្រុកអង្គរជ័យខេត្តកំពត បានស្គាល់គ្នាជាមួយជាជនសង្ស័យជាសន្តិសុខនោះរយៈពេល៣ខែមកហើយ។ ចំណែកសង្សារថ្មី ដែលត្រូវនាងរួមនឹងសន្តិសុខជាសង្សារចាស់រៀបចំគម្រោងវាយសម្លាប់ប្លន់យកម៉ូតូនោះ ឈ្មោះយ៉ុន តុលា ហៅយូ អាយុ២២ឆ្នាំ រស់នៅភូមិឫស្សី សង្កាត់ស្ទឹងមានជ័យ ខណ្ឌមានជ័យ ជាជាងម៉ាស៊ីនកិនស្រូវ មានស្រុកកំណើតភូមិតាគៀត ឃុំព្នៅទី១ ស្រុកស៊ីធរកណ្តាល ខេត្តព្រៃវែង ត្រូវនាងអះអាងថាទើបនឹងស្គាល់គ្នាបានកន្លះខែប៉ុណ្ណោះ។
បើតាមស្ត្រីសង្ស័យបានសារភាពបន្ថែមថា នាងជាស្ត្រីមេម៉ាយមានកូនស្រី១អាយុ២ឆ្នាំ ហើយនាងនិយាយថាដោយសារតែប្តីនាងវាយធ្វើបាបពេកក៏បានលែងលះគ្នារយៈពេលជិត២ឆ្នាំមកហើយ រួចក៏បានមកចូលធ្វើការនៅក្នុងហាងមនោរម្យនៅសង្កាត់ស្ទឹងមានជ័យ។ ទីនោះហើយដែលនាងបានស្គាល់មនុស្សប្រុសជាបន្តបន្ទាប់ ចុងក្រោយក៏បានស្គាល់ជនជាតិចិនម្នាក់ ធ្វើការជាបុគ្គលិកនៅបុរីប៉េងហួត ចូលដណ្តឹងនាង ហើយពួកគេនឹងចូលរោងការនៅថ្ងៃទី២០ ខែធ្នូ ឆ្នាំ២០១៥នេះ នៅស្រុកកំណើតនាងស្ថិតក្នុងភូមិប្រាល ឃុំតានីស្រុកអង្គរជ័យ ខេត្តកំពត។
អ្វីដែលហួសចិត្តនោះស្ត្រីសង្ស័យបានសុំសមត្ថកិច្ចទៅរៀបការនៅថ្ងៃទី២០ខែធ្នូនេះ ដោយមិនដឹងថានាងមានទោសកម្រិតណាឡើយ។
គួរបញ្ជាក់ថា បុរសម្នាក់ត្រូវឃាតកវាយចំក្បាលផុងលលាដ៏ក្បាលស្លាប់បាត់បង់ជីវិត យ៉ាងអាណោចអាធ័មក្នុងថ្លុកឈាម ខណៈដឹកស្រីស្នេហ៍ដែលស្គាល់គ្នាកន្លះខែដើរលេង មកដល់កន្លែងស្ងាត់ក៏បានឱបថើបញីញក់ ក៏ត្រូវសង្សារចាស់ជាសន្តិសុខយាមនៅក្បែរនោះមកវាយសម្លាប់តាមគម្រោងដែលរៀបចំទុកមុន។
បន្ទាប់ពីធ្វើសកម្មភាពរួច សមត្ថកិច្ចល្បាតឃើញជនសង្ស័យ២នាក់នោះដើរចេញពីកន្លែងកើតហេតុមានប្រឡាក់សុទ្ធតែឈាមក៏ឃាត់ខ្លួនយកទៅសាកសួរនៅអធិការនគរបាលខណ្ឌជ្រោយចង្វារ។
ករណីវាយសម្លាប់នេះបានបង្កការភ្ញាក់ផ្អើលកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី៤ ខែវិច្ឆិកា ឆ្នាំ២០១៥នៅជិតរង្វង់មូលស្ពានជ្រោយចង្វារខាងកើតស្ថិតក្នុងភូមិដើមគរ ផ្លូវជាតិលេខ៦ សង្កាត់ជ្រោយចង្វារ ខណ្ឌជ្រោយចង្វារ។
បច្ចុប្បន្ន ជនសង្ស័យទាំង២នាក់ត្រូវបានសមត្ថកិច្ចកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់៕
សារភាពពីគម្រោងប្លន់សម្លាប់សង្សារយកម៉ូតូ ហើយសុំសមត្ថកិច្ចទៅរៀបការនៅថ្ងៃទី២០ធ្នូ
0 Comments