រដ្ឋាភិបាលអ៊ីរ៉ាក់បានទាមទារឲ្យរដ្ឋាភិបាល ទីក្រុង អង់ការ៉ា ដកចេញនូវកងកម្លាំងទួរគីជាង១០០នាក់ ដែលបានចូលក្នុងប្រទេសអ៊ីរ៉ាក់ជាមួយរថក្រោះ និងកាំភ្លើងធំដោយចោទប្រកាន់ថា “កំពុងបណ្តុះបណ្តាល” កងទ័ពនៅក្បែរតំបន់ Mosul ដែលកាន់កាប់ដោយក្រុមរដ្ឋឥស្លាម។ ទីក្រុងបាដាដបានសង្កត់ធ្ងន់ថា វាគឺជាការរំលោភលើអធិបតេយ្យភាពរបស់ខ្លួន។
ក្រសួងការបរទេសអ៊ីរ៉ាក់បាននិយាយនៅក្នុងសេចក្ដីថ្លែងការណ៍មួយនៅថ្ងៃសៅរ៍ថា កងទ័ពទួរគីកំពុងធ្វើសកម្មភាពរំលោភលើអធិបតេយ្យភាពរបស់ប្រទេស ហើយទាមទារឲ្យដកកងកម្លាំងចេញភ្លាម។
សេចក្ដីថ្លែងការណ៍នេះបានបន្តថា “អាជ្ញាធរអ៊ីរ៉ាក់បានអំពាវនាវឲ្យប្រទេសទួរគីគោរព ដល់ទំនាក់ទំនងជាអ្នកជិតខាងល្អ ហើយដកជាបន្ទាន់ចេញពីទឹកដីអ៊ីរ៉ាក់”។ សេចក្ដីថ្លែងការណ៍នេះបានសង្កត់ធ្ងន់ថា “កងទ័ពទួរគីបានចូលដោយគ្មានការស្នើសុំ ឬការអនុញ្ញាតពីអាជ្ញាធរអ៊ីរ៉ាក់ ដែលនេះជាការរំលោភលើអធិបតេយ្យភាពរបស់ប្រទេសអ៊ីរ៉ាក់យ៉ាងធ្ងន់ធ្ងរ”។
ជាមួយគ្នានោះ ក្រសួងការបរទេសបានហៅទង្វើរបស់ទួរគីនេះថាជា “ការលុកលុយមួយ” ។
យោងតាមប្រភពពីទីភ្នាក់ងារនេះបានឲ្យដឹងថា ក្រុមចម្រុះដឹកនាំដោយអាមេរិកប្រឆាំងនឹងក្រុមរដ្ឋឥស្លាមបានដឹងអំពីសកម្មភាពរបស់ទួរគីនេះ។
ប្រភពបានប្រាប់រ៉យទ័រថា “ទាហានទួរគីបានចូលដល់តំបន់ Mosul Bashiqa។ ពួកគេជាផ្នែកមួយនៃទម្លាប់ការហ្វឹកហាត់។ កងវរសេនាតូចមួយបានឆ្លងកាត់ចូលទៅក្នុងតំបន់នេះ”។ ទោះបីជាយ៉ាងណាក៏ដោយ រ៉យទ័រ មិនបានបញ្ជាក់ពីចំនួនទាហានពិតប្រាកដនោះទេ។
ដោយឡែក បើយោងតាមមន្ត្រីការពារជាតិអាមេរិកពីរនាក់ ដែលបានដកស្រង់សម្ដីដោយទីភ្នាក់ងាររ៉យទ័រ បាននិយាយថា ការដាក់ពង្រាយរបស់ទួរគីនេះគឺមិនមែនជាផ្នែកមួយនៃកិច្ចខិតខំប្រឹងប្រែងរបស់ក្រុមចម្រុះដឹកនាំដោយសហរដ្ឋអាមេរិកប្រយុទ្ធប្រឆាំងក្រុមរដ្ឋឥស្លាមឡើយ។
បើយោងតាមកាសែត Daily Sabah បានរាយការណ៍ថា កាលពីថ្ងៃសុក្រទាហានទួរគីចំនួន១៣០ នាក់បំពាក់ដោយអាវុធធុនធ្ងន់ត្រូវបានដាក់ពង្រាយនៅមូលដ្ឋានយោធាមួយនៅជាយក្រុង Mosul ដែលបច្ចុប្បន្នត្រូវបានកាន់កាប់ដោយក្រុម IS។
តំបន់ Bashiqa មានទីតាំងស្ថិតនៅប្រមាណ១០គីឡូម៉ែត្រភាគឦសាននៃទីក្រុង Mosul ។
ទីក្រុង Mosul ដែលជាទីក្រុងធំទីពីររបស់ប្រទេសអ៊ីរ៉ាក់ត្រូវបានរឹបអូសដោយក្រុមរដ្ឋឥស្លាមនៅក្នុងខែមិថុនា ឆ្នាំ២០១៤ ហើយត្រូវបានគ្រប់គ្រងយ៉ាងពេញលេញដោយពួកសកម្មប្រយុទ្ធនេះ ចាប់តាំងពីពេលនោះមក។ លើសពីនេះទៅទៀត ក្រុមជ្រុលនិយមមួយនេះបានរឹបអូសយកឃ្លាំងស្តុកអាវុធនិងគ្រាប់កាំភ្លើងដ៏ធំនៅក្នុងទីក្រុងនេះ៕ RT
ទីក្រុងបាដាដ ទាមទារឲ្យទួរគីដកកងទ័ព“បណ្តុះបណ្តាល”ចេញពីភាគខាងជើងអ៊ីរ៉ាក់
0 Comments