ប្រទេសអារ៉ាប៊ីសាអ៊ូឌីត បានសន្យានូវកញ្ចប់ប្រាក់សរុបចំនួន ៨ ពាន់លានដុល្លារនៅក្នុងការវិនិយោគ និងជំនួយនៅប្រទេសអេហ្ស៊ីប នៅក្នុងរយៈពេល ៥ ឆ្នាំខាងមុខនេះ នៅពេលដែលទីក្រុងរីយ៉ាត សម្លឹងមើលដើម្បីជំរុញទំនាក់ទំនងខាងយោធា និងសេដ្ឋកិច្ចជាមួយសម្ព័ន្ធមិត្ដរបស់ខ្លួន។
ព្រះមហាក្សត្រប្រទេសអារ៉ាប៊ីសាអ៊ូឌីត ព្រះអង្គ Salman បានមានបន្ទូលថា ការវិនិយោគរបស់អារ៉ាប៊ីសាអ៊ូឌីត នៅប្រទេសអេហ្ស៊ីប លើសផែនការ ៣០ ពាន់លាន riyals (៨ ពាន់លានដុល្លារ) និងថា ព្រះរាជាណាចក្រនេះបានរួមវិភាគទានក្នុងការផ្ដល់ឲ្យប្រទេសអេហ្ស៊ីប នូវសេចក្ដីត្រូវការខាងប្រេងសាំងនោះផង។ សេចក្ដីថ្លែងការណ៍មួយបោះពុម្ពផ្សាយដោយទីភ្នាក់ងារព័ត៌មាន អារ៉ាប៊ីសាអ៊ូឌីត បាននិយាយដូច្នេះ។
រដ្ឋមន្ដ្រីក្រសួងការពារប្រទេស និងជាព្រះអង្គម្ចាស់រងក្នុងការឡើងស្នងរាជសម្បត្ដិ ព្រះអង្គម្ចាស់ Mohammed Bin Salman អង្គនេះបានប្រកាសកាលពីថ្ងៃអង្គារ នៅក្នុងអំឡុងពេលយាងទៅបំពេញទស្សនកិច្ច នៅប្រទេសអេហ្ស៊ីបថា បន្ថែមលើនេះ នាវារបស់ប្រទេស អារ៉ាប៊ីសាអ៊ូឌីត នឹងគាំទ្រការធ្វើនាវាចរណ៍នៅព្រែកជីក Suez។
ការសន្យានេះបានកើតឡើង បើទោះបីជាមានការធ្លាក់ចុះ នៅក្នុងប្រាក់ចំណូលពីប្រេងរបស់ប្រទេស អារ៉ាប៊ីសាអ៊ូឌីតនេះក៏ដោយ ដែលមានចំនួនជាង៩០ ភាគរយនៃប្រាក់ចំណូលសាធារណៈ ដោយសារការធ្លាក់ចុះនៅក្នុងតម្លៃប្រេងឆៅចាប់តាំងពី ខែមិថុនា ឆ្នាំកន្លងមក។ ប្រទេស អារ៉ាប៊ីសាអ៊ូឌីត ដែលជាប្រទេសដ៏សំខាន់នៅក្នុងអង្គការ OPEC បានផ្ដល់ប្រាក់រាប់ពាន់លានដុល្លារនៅក្នុងជំនួយទៅឲ្យប្រទេសអេហ្ស៊ីប ចាប់តាំងពីប្រធានាធិបតី ឥស្លាម លោក មូហាម៉េត ម័រស៊ី ត្រូវគេបណ្ដេញចេញពីអំណាចនៅក្នុងឆ្នាំ ២០១៣ នោះមក។
នៅក្នុងខែមីនា ប្រទេស អារ៉ាប៊ីសាអ៊ូឌីត ប្រទេសគុយវ៉ែត និងប្រទេសអារ៉ាប់រួមអេមីរ៉ាត ប្រទេសនីមួយៗនេះបានផ្ដល់ប្រាក់ចំនួន ៤ ពាន់លានដុល្លារ នៅក្នុងការវិនិយោគ និងជំនួយ។ ប្រទេសអេហ្ស៊ីប កំពុងតែចូលរួមចំណែក នៅក្នុងក្រុមចម្រុះដឹកនាំដោយប្រទេស អារ៉ាប៊ីសាអ៊ូឌីត ដែលប្រយុទ្ធប្រឆាំងនឹងពួកឧទ្ទាមគាំទ្រដោយប្រទេសអុីរ៉ង់ នៅក្នុងប្រទេសយេមែន ចាប់តាំងពីខែមីនាមក។ អេហ្ស៊ីប ក៏កំពុងចូលរួមនៅក្នុងសម្ព័ន្ធភាព ដែលមានសមាជិក ៣៤ ប្រទេសដើម្បីប្រយុទ្ធប្រឆាំងនឹងអំពើភេរវកម្ម ដែលត្រូវបានប្រកាសកាលពីថ្ងៃអង្គារ ដោយព្រះអង្គម្ចាស់ Mohammed ផងដែរ។
ទីក្រុងគែរ កំពុងតែប្រយុទ្ធនឹងពួកបះបោរដឹកនាំដោយក្រុមរដ្ឋឥស្លាម នៅក្នុងឧបទ្វីបស៊ីណៃ។ ប៉ុន្ដែអេហ្ស៊ីប បានទទួលរងការរិះគន់ពីក្រុមសិទ្ធិមនុស្សពីបទចាត់វិធានការបង្ក្រាប ទៅលើអង្គការបងប្អូនមូស្លីមរបស់លោក ម័រស៊ី ដែលបានបន្សល់ទុកមនុស្សស្លាប់រាប់រយនាក់ និងរាប់ពាន់នាក់ជាប់គុកនោះ៕
AFP
ប្រទេសអារ៉ាប៊ីសាអ៊ូឌីត នឹងជំរុញការផ្ដល់ជំនួយ និងការវិនិយោគនៅប្រទេសអេហ្ស៊ីប
0 Comments