បាត់ដំបង ៖ គួរបញ្ជាក់ថា កន្លងមកកម្ពុជាថ្មីបានចុះផ្សាយស្ដីពីករណីរំលោភទៅលើក្មេងស្រីចំនួនពីរនាក់ ដែលម្នាក់មានអាយុ៦ឆ្នាំ និងម្នាក់ទៀតមានអាយុ៨ឆ្នាំជាសិស្សនៃសាលាបឋមសិក្សា តាស្តា និងរស់នៅភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង ដែលត្រូវបានគ្រូបង្រៀនម្នាក់ឈ្មោះ យស់ សុផានី ភេទប្រុស អាយុ៥០ឆ្នាំ រស់នៅភូមិវាលវង់ ឃុំសន្តិភាព ស្រុកសំពៅលូន បាន ប៉ះពាល់ ស្ទាបអង្អែលទៅលើដើមទ្រូង និងរុកចូលប្រដាប់ភេទកាលពីថ្ងៃទី១២ ខែវិច្ឆិកា ឆ្នាំ២០១៥ ខណៈដែលក្មេងស្រីទាំងពីរនាក់នេះទៅរៀនគួរជាមួយនឹងជនសង្ស័យខាងលើនៅចន្លោះពីម៉ោង១ ដល់ម៉ោង៣រសៀល។
លោក នី សុភ័ក្ត្រ អាយុ៣៨ឆ្នាំ រស់នៅភូមិត្រពាំងព្រលិត និងត្រូវជាឪពុករបស់ក្មេងស្រី ដែលមានអាយុ៦ឆ្នាំ បាននិយាយប្រាប់កម្ពុជាថ្មីថា កូនស្រីរបស់លោកត្រូវជនសង្ស័យ ដែលមាននាទីជាគ្រូបង្រៀននៅក្នុងសាលាបឋមសិក្សា តាស្តា នាំយកទៅក្នុងចំការដំឡូង ដែលមានចម្ងាយប្រហែល១គីឡូម៉ែត្រពីសាលា ដែលជាកន្លែងបង្រៀនគួរដោយបានប្រើប្រាស់ម្រាមដៃរុកចូលប្រដាប់ភេទថែមទៀត ចំណែកក្មេងស្រីម្នាក់ទៀតគឺបានត្រឹមតែស្ទាបអង្អែលលើដើមទ្រូង និងលើប្រដាប់ភេទតែប៉ុណ្ណោះ ហើយត្រូវបានសមត្ថកិច្ចឃាត់ខ្លួនកាលពីថ្ងៃទី១៥ ខែធ្នូ ឆ្នាំ២០១៥ វេលាម៉ោង១រសៀល។
ពាក់ព័ន្ធនឹងឈ្មោះគ្រូបង្រៀននេះដែរ លោក អាន សំអាត អនុប្រធានការិយាល័យអប់រំស្រុកសំពៅលូន សុំធ្វើការបំភ្លឺថា ជនសង្ស័យខាងលើគឺពុំមានឈ្មោះជាគ្រូក្របខ័ណ្ឌរបស់រដ្ឋ ឬក៏ជាគ្រូជាប់កិច្ចសន្យានៅក្នុងក្រសួងអប់រំនោះឡើយ ដោយជននេះគ្រាន់តែជាបុគ្គលម្នាក់ដែលស៊ីឈ្នួលបង្រៀនគួរនៅតាមផ្ទះឯកជនតែប៉ុណ្ណោះ ចំណែកសិស្សទាំងពីរនាក់នោះគឺលោកទទួលស្គាល់ថា ពិតជាសិស្សនៅសាលាបឋមសិក្សា តាស្តាពិតមែន។
ដូច្នេះលោកសុំធ្វើការបដិសេធរាល់បណ្ដាព័ត៌មានទាំងអស់ ដែលបានចេញផ្សាយថា ជននេះគឺជាគ្រូបង្រៀននៃសាលាបឋមសិក្សា តាស្តា គឺមិនពិតនោះទេ ដើម្បីជៀសវាងនូវការភ័ន្តច្រឡំទៅលើសេចក្ដីថ្លៃថ្នូររបស់បុគ្គលិកសិក្សាដទៃទៀតផងដែរ៕
សេចក្តីបំភ្លឺរបស់ការិយាល័យអប់រំស្រុកសំពៅលូន ពាក់ព័ន្ធករណីគ្រូបង្រៀនរំលោភសិស្ស
0 Comments