ភ្នំពេញ ៖ សិក្ខាសាលា ស្តីពី ស្ថានភាពពាណិជ្ជកម្ម នៃផលិតផលដំណាំម្រេចនៅកម្ពុជា ត្រូវបានប្រព្រឹត្តឡើងក្រោមវត្តមានលោក ច័ន្ទ ទិត្យរ៉ាម៉ូ រដ្ឋលេខាធិការ ក្រសួងពាណិជ្ជកម្ម តំណាងលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម ដោយមានការចូលរួមពីបណ្តាក្រុមហ៊ុនឯកជន សហគមន៍ម្រេច និងស្ថាប័នពាក់ព័ន្ធជាច្រើនទៀត នៅសណ្ឋាគារ ហ៊ីម៉ាវ៉ារី កាលពីថ្ងៃទី១៧ ខែធ្នូ ឆ្នាំ២០១៥។
នៅក្នុងឱកាសនេះលោក ច័ន្ទ ទិត្យរ៉ាម៉ូ រដ្ឋលេខាធិការ ក្រសួងពាណិជ្ជកម្មបានថ្លែងថា វិស័យកសិកម្មបានដើរតួយ៉ាងសំខាន់ក្នុងការអភិវឌ្ឍន៍ប្រទេសជាតិ ប្រជាជនកម្ពុជាភាគច្រើន ជាកសិករ ប្រកបមុខរបរធ្វើស្រែ ចំការសម្រាប់ចិញ្ចឹមជីវិតប្រចាំថ្ងៃ។ វិស័យកសិកម្មនៅកម្ពុជា នៅមានភាពទន់ខ្សោយនៅឡើយ បើប្រៀបធៀបទៅនឹងបណ្តាប្រទេសជិតខាង ដោយសារតែហេដ្ឋារចនាសម្ព័ន្ធបម្រើវិស័យកសិកម្មនៅមានកម្រិត។
ការអភិវឌ្ឍន៍សេដ្ឋកិច្ចប្រទេសជាតិអាណតិ្តទី៥នេះ បានដាក់ចូលវិស័យកសិកម្មជាអាទិភាព សម្រាប់ការអភិវឌ្ឍន៍មួយចំណែក ក្នុងការកាត់បន្ថយភាពក្រក្រីជូនប្រជាពលរដ្ឋ។ ចក្ខុវិស័យសេដ្ឋកិច្ចរបស់រាជរដ្ឋាភិបាល គឺលើកស្ទួយវិស័យកសិកម្ម សម្រាប់ទ្រទ្រង់កំណើនសេដ្ឋកិច្ចជាតិ និងធានាឲ្យបាននូវសន្តិសុខជាតិ តាមរយៈការធ្វើភាវូបនីយកម្ម ពីការធ្វើកសិកម្មតាមបែបប្រពៃណី ឆ្ពោះទៅរកដំណាក់កាលថ្មីមួយទៀត។
លោក ច័ន្ទ ទិត្យរ៉ាម៉ូ ថ្លែងបន្តឲ្យដឹងថា ការអភិវឌ្ឍន៍លើវិស័យកសិឧស្សាហកម្ម និងការកែច្នៃផលិតផលកសិកម្ម គឺជាការបង្កើនតម្លៃបន្ថែម ដើម្បីចូលរួមចំណែកនូវការងារបន្ថែមថ្មីៗទៀត និងជួយទប់ស្កាត់ការធ្វើចំណាកស្រុករបស់ប្រជាពលរដ្ឋ។ ជាមួយគ្នានេះដែរវិស័យឯកជន និងដៃគូអភិវឌ្ឍននានា ដើរតួនាទីយ៉ាងសំខាន់លើកស្ទួយនូវវិស័យកសិកម្មនេះផងដែរ។ ដំណាំម្រេច ក៏ត្រូវបានចាត់ទុកជាដំណាំអាទិភាពមួយនៅក្នុងប្រទេសកម្ពុជា សម្រាប់ការនាំចេញ។
យោងតាមទិន្នន័យសហគមន៍ដំណាំម្រេចអន្តរជាតិឆ្នាំ២០១៤ កម្ពុជាបានផលិតម្រេចប្រមាណ ៨ពាន់ដើម សម្រាប់ប្រើប្រាស់ក្នុងស្រុក និងការនាំចេញ លុះរហូតដល់ឆ្នាំ២០១៥ ដំណាំម្រេចមានការកើនឡើង ប្រមាណ ៩ពាន់ដើម សម្រាប់ប្រើប្រាស់ក្នុងស្រុក និងការនាំចេញផងដែរ។ តាមការប៉ាន់ប្រមាណផលិតផលដំណាំម្រេចនៅកម្ពុជាក្នុងឆ្នាំ២០១៦ ខាងមុខនេះ អាចនឹងកើនឡើង ១ម៉ឺន១ពាន់ដើម ដោយសារតម្រូវការ នៃការប្រើប្រាស់ទីផ្សារម្រេចក្នុងស្រុកមានការកើនឡើង ក៏ដូចជាតម្រូវការទីផ្សារអន្តរជាតិមានការកើនឡើងផងដែរ។ ដោយមើលឃើញពីសក្ដានុពលទាំងនេះ ក្រសួងពាណិជ្ជកម្ម និងដៃគូពាក់ព័ន្ធមួយចំនួនបានសម្រេចដាក់បញ្ចូលដំណាំម្រេចនេះ ជាពិសេសម្រេចខេត្តកំពត ដែលការពារដោយច្បាប់នៃប្រទេសកម្ពុជា៕
សិក្ខាសាលាស្តីពីស្ថានភាពពាណិជ្ជកម្មនៃផលិតផលដំណាំម្រេចនៅកម្ពុជា
0 Comments