ភ្នំពេញ ៖ នេះជា ការបញ្ជាក់របស់លោក អ៊ុក សុយ អតីតសមាជិកគណៈកម្មាធិការនាយក និងជាប្រធាននាយកដ្ឋានកិច្ចការបោះឆ្នោត និងនីតិកម្មនៃគណបក្សសង្គ្រោះជាតិ កាលពីវេលាថ្ងៃត្រង់ ថ្ងៃទី១២ ខែធ្នូ ឆ្នាំ២០១៥ ដែលទើបត្រូវបានចាកចេញ កាលពីពេលថ្មីៗនេះ ដោយសារតែជួបបញ្ហាអយុត្តិធម៌ អំពើពុករលួយ និងបក្សពួកនិយម។
លោក អ៊ុក ស៊ុយ បានថ្លែងនៅក្នុងសន្និសីទកាសែតថា មូលហេតុដែលលោកចាកចេញពីគណបក្សសង្គ្រោះជាតិ មកចូលរួមជាមួយគណបក្សសំបុកឃ្មុំសង្គមប្រជាធិបតេយ្យ គឺដោយសារតែមេដឹកនាំគណបក្សសង្គ្រោះជាតិ ក្នុងនោះមានលោក សម រង្ស៊ី, លោក កឹម សុខា និងមន្ត្រីជាន់ខ្ពស់មួយចំនួន បានប្រព្រឹត្តឆ្គាំឆ្គងមកលើមន្ត្រីនៅក្នុងបក្សចាប់តាំងពីថ្នាក់ជាតិ រហូតដល់ថ្នាក់មូលដ្ឋាន។ ចំណុចដែលឆ្គាំឆ្គង និងគ្មានសីលធម៌របស់ថ្នាក់ដឹកនាំគណបក្សសង្គ្រោះជាតិ គឺកាលពីដើមឡើយមានគោលជំហរច្បាស់លាស់ ប្រកាន់ភ្ជាប់គុណធម៌ និងសីលធម៌ ប៉ុន្តែក្រោយពេលបោះឆ្នោតជាតិឆ្នាំ២០១៣ ដែលទទួលបាន៥៥ អាសនៈបែរជាភ្លេចខ្លួន ផ្គើនជាមួយ និងឆន្ទះប្រជាពលរដ្ឋ ក៏ដូចជាតំណាងគណបក្សនយោបាយក្នុងនឹងក្រៅប្រទេស។
លោក អ៊ុក ស៊ុយ លើកឡើងទៀតថា អំពើឆ្គាំឆ្គងរបស់មេដឹកនាំគណបក្សសង្គ្រោះជាតិ ក្នុងនោះមាន សម រង្ស៊ី, កឹម សុខា , អេង ឆៃអ៊ាង, យឹម សុវណ្ណ, ជូឡុង សូមូរ៉ា វានឹងបណ្ដាលឲ្យគណបក្សសង្គ្រោះជាតិ រលាយបន្តិចម្តងៗ ទៅតាមរយៈសកម្មភាពដឹកនាំរបស់មេដឹកនាំទាំងនោះ។ លោកបញ្ជាក់ថា “អំពើឆ្គាំឆ្គងទាំងអស់នោះ ដែលធ្វើឡើងដោយលោក សម រង្ស៊ី លោកកឹម សុខា លោកស្រីជូឡុង សូមួរ៉ា និងលោក អេង ឆៃអ៊ាង ជាដើមអាចនឹងធ្វើឲ្យគណបក្សសង្គ្រោះជាតិរលំរលាយជាក់ជាមិនខាន ហើយការរលំរលាយក៏ដូចជាការបាត់ជំនឿទុកចិត្តទាំងអស់ គឺផ្តើមចេញពីការដឹកនាំរបស់មេដឹកនាំគណបក្សនីមួយៗ។
លោកអ៊ុក ស៊ុយ បានលើកឡើងទៀតថា កន្លងមកលោកបានប្រាប់ឲ្យមេដឹកនាំគណបក្សសង្គ្រោះជាតិប្រកាន់ខ្ជាប់នូវក្រមសីលធម៌និងគុណធម៌ ដោយកុំប្រើមនុស្សចាត់ទុកជាស្លឹកចេក ជាក្រូចឆ្មា ឬជាកាកអំពៅ។ លោកអះអាងថា កាលដែលគណបក្សសង្គ្រោះជាតិឡើងអាសនៈមកដល់៥៥នេះ ក៏ដោយសារ តែការខិតខំប្រឹងប្រែងរបស់ថ្នាក់ដឹកនាំទាំងអស់ ប៉ុន្តែ មូលហេតុដែលនាំឲ្យលោកចាកចេញនេះ គឺដោយសារតែថ្នាក់ដឹកនាំនៅក្នុងគណបក្សសង្គ្រោះជាតិធ្វើសកម្មភាពបែបអយុត្តិធម៌ និងពុករលួយ ដោយដកអ្នកចាស់ដាក់អ្នកថ្មី តាមរយៈបក្ខពួកនិយម គ្រួសារនិយម លុយនិយម ហើយអ្នកស្មោះត្រង់ពិតប្រាកដ បែរជាត្រូវបោះបង់ចោលដោយមិននឹកនានោះឡើយ ហើយនៅពេលមានកិច្ចប្រជុំគណៈកម្មាធិការនាយកម្តងៗ ថ្នាក់ដឹកនាំទាំងនោះចាត់ទុកកិច្ចប្រជុំជាបាល់ទាត់លេងតាមចិត្ត ដោយមិនចាត់ទុកមតិរបស់សមាជិកជារឿងសំខាន់ឡើយ។
លោកអ៊ុក ស៊ុយបានលើកឡើងទៀតថា មេដឹកនាំ គណបក្សសង្គ្រោះជាតិមកដល់ពេលនេះ បាននឹងកំពុងក្បត់ឆន្ទៈប្រជាពលរដ្ឋ ដែលជាអ្នកគាំទ្រគ្រប់រាជធានីខេត្តទាំងអស់ ពីព្រោះក្រោយពីការបោះឆ្នោត ឆ្នាំ២០១៣ គណបក្សសង្គ្រោះជាតិបានអះអាងម្តងថា ទទួលបាន៦៣ ម្តងថា ៦២ ហើយលោកខ្លួនឯង ដែលជាអ្នកកាន់កិច្ចការបោះឆ្នោត ក្រោយពីបូកសរុបមិនឃើញទទួលបានដូចការប្រកាសនោះទេ ហើយមេដឹកនាមគណបក្សសង្គ្រោះជាតិ ក្រោយពីការប្រកាសបែបនេះ ថែមទាំងទៅស្បថនៅសៀមរាបទៀតផង ថា នឹងមិនចូលសភាជាដាច់ខាត។ ប៉ុន្តែពេលនោះលោកបានប្រាប់ឲ្យថ្នាក់ដឹកនាំគណបក្សសង្គ្រោះជាតិ ប្រកាន់ជំហរឲ្យច្បាស់លាស់ ហើយត្រូវរកឲ្យឃើញអ្វីដែលខ្លួននិយាយថា ទទួលបាន៦២ ឬ៦៣អាសនៈ តែផ្ទុយទៅវិញគណបក្សសង្គ្រោះជាតិបែរជាបង្កើតគណៈកម្មការធ្វើបាតុកម្មអហិង្សាទៅវិញ ក្នុងន័យមួយគឺដើម្បីដុតកម្ដៅប្រជារាស្ត្រឲ្យធ្វើបាតុកម្មកាន់តែខ្លាំងក្លា ដើម្បីតថ្លៃចូលរដ្ឋសភា ។
លោក អ៊ុក ស៊ុយ បានលើកឡើងទៀតថា នៅពេលនោះមេដឹកនាំគណបក្សសង្គ្រោះជាតិបានប្រកាសឲ្យប្រជាពលរដ្ឋចូលរួមឲ្យបានសកម្មដើម្បីបង្កើតគណៈកម្មការស្វែងរកការពិត ដើម្បីរាប់សន្លឹកឆ្នោត ប៉ុន្តែនៅពេលអ្នកចូលរួមឡើងដល់១លាននាក់ ស្រាប់តែមេដឹកនាំប្រកាសឲ្យផ្អាកសិន តាមពិតការបំផុសបំផុលឲ្យប្រជាពលរដ្ឋចូលរួមដើម្បីបង្កើតគណៈកម្មការស្វែងរកការពិតនោះ គឺគ្មានទាល់តែសោះ ហើយមិនបាច់និយាយទៅដល់ការធ្វើសកម្មភាពរាប់សន្លឹកឆ្នោតនោះទេ ដែលសូម្បីតែបង្កើតមិនចេញផង។ លោកលើកឡើងដែរថា នៅពេលដែលថ្នាក់ដឹកនាំសម្រេចចូលសភា លោកក៏បានសួរទៀត ថាហេតុអីក៏សម្រេចចូលសភាខុសពីជំហរកាលពីមុន។ នៅពេលនោះលោកសម រង្ស៊ីបានថ្លែងថា អ្នកនយោបាយត្រូវតែផ្លាស់ប្ដូរជំហរ ហើយការចូលសភាគឺដើម្បីកែទម្រង់ច្បាប់ កែទម្រង់ផ្ទៃក្នុងរដ្ឋសភា និងកែច្បាប់បោះឆ្នោត។
អ្វីដែលគួរចាប់អារម្មណ៍ទៀតនោះ ជាធម្មតាអ្នកតំណាងរាស្ត្រជាប់ឆ្នោតគ្រប់បក្សនយោ បាយមុនចូលរដ្ឋសភា គឺកែបទផ្ទៃក្នុងនៃរដ្ឋសភា ប៉ុន្តែគណបក្សសង្គ្រោះជាតិមិនបានកែទេ ហើយដើរចូលទាំងញញឹមញញែមដើម្បីតំណែង ដែលក្នុងនោះក៏បានស្នើសំុឲ្យបង្កើតគណៈកម្មការមួយបន្ថែមទៀតដើម្បីចែកតំណែង ហើយនៅពេលមានសំណួរពីថ្នាក់ដឹកនាំនៅក្នុងគណបក្ស លោកសម រង្ស៊ីក៏ដូចជាលោកកឹម សុខា បានឆ្លើយថា ចាំមើលសិន កុំទាន់អាលនិយាយ។ តាមលោកអ៊ុក ស៊ុយបានលើកឡើងថា នៅក្នុងការបោះឆ្នោតឆ្នាំ២០១៣នៅខ្វះតែ៧អាសនៈប៉ុណ្ណោះនឹងឈ្នះហើយ ប៉ុន្តែនៅពេលដែលជំហរមេដឹកនាំ មិនច្បាស់លាស់ គឺមិនអាចធ្វើអ្វីទទួលបានជោគជ័យនោះទេ។ លោកសម រង្ស៊ីនិយាយថា ចាកចេញ១០ឬ២០ក៏មិនអីដែរ ប៉ុន្តែបើប្រជាពលរដ្ឋដើរចេញមែន គឺធ្វើឲ្យគណបក្សសង្គ្រោះជាតិបាត់បង់អាសនៈយ៉ាងពិតប្រាកដ។
ជាមួយគ្នានោះ លោកអ៊ុក ស៊ុយ បានបញ្ជាក់ដែរថា មកដល់ពេលនេះ មេដឹកនាំគណបក្សសង្គ្រោះជាតិតែងតែប្រើវិធីសាស្ត្រលាបពណ៌ទៅឲ្យសកម្មជនណាម្នាក់ដែលចង់ចាកចេញពីគណបក្ស ថាបានទទួលផលប្រយោជន៍លុយកាក់ឬជាអ្វីមួយពីគណបក្សផ្សេង ប៉ុន្តែសម្រាប់រូបលោកផ្ទាល់ចាប់ផ្តើមពីចូលជីវភាពនយោបាយមិន ដែលមានអ្នកណានៅ ពីក្រោយខ្នងនោះទេ ហើយលោកក៏មិនដែលចង់បានតួនាទីឬបុណ្យស័ក្ដិណាមួយនោះឡើយ។ លោកអះអាងថា ប្រសិនបើចង់បានបុណ្យស័ក្តិ តួនាទី នៅពេលគណបក្សសង្គ្រោះជាតិទទួលបាន៥៥អាសនៈ គ្រាន់តែនិយាយតាមមេដឹកនាំ កុំប្រឆាំងជាមួយ គេទៅ គេនឹងឲ្យហើយ ប៉ុន្តែលោកមិនរវល់ហើយការចូលមកគណបក្សសំបុកឃ្មុំសង្គមប្រជាធិបតេយ្យក៏គ្មានអ្វីទាំងអស់ សូម្បីតែសៀវភៅក៏រ៉ៃអង្គាសប្រាក់ពីសមាជិក ដើម្បីបោះពុម្ពដែរ ដូច្នេះលោកគ្រាន់តែស្រឡាញ់គោលជំហរនៃការដឹកនាំតែប៉ុណ្ណោះ។
សូមបញ្ជាក់ថា លោក អ៊ុក ស៊ុយ បានប្រកាសលាលែង ពីគណបក្សសង្គ្រោះជាតិ តាមរយៈលិខិតមួយច្បាប់ចុះថ្ងៃទី០៣ ខែធ្នូ ឆ្នាំ២០១៥ ហើយបានលិខិតបានបញ្ជាក់ថា ការសុំលាលែងនេះ ដោយសារតែ ថ្នាក់ដឹកនាំកំពូលនៅក្នុងបក្ស គឺលោក សម រង្ស៊ី និងលោក កឹម សុខា ព្រមទាំងថ្នាក់ដឹកនាំមួយចំនួនទៀត ដឹកនាំបែបគ្មានសីលធម៌ និងគ្មានគុណធម៌។
លោក អ៊ុក ស៊ុយ សរសេរយ៉ាងនេះថា “ខ្ញុំបាទ អ៊ុក ស៊ុយ សមាជិកគណៈកម្មាធិការនាយក និងជាប្រធាននាយកដ្ឋានកិច្ចការបោះឆ្នោត និងនីតិកម្មនៃគណបក្សសង្គ្រោះជាតិ។ សូមគោរពជូន ឯកឧត្តមសម រង្ស៊ី ប្រធានគណបក្សសង្គ្រោះជាតិ ឯកឧត្តមកឹម សុខា អនុប្រធានគណបក្សសង្គ្រោះជាតិ (បច្ចុប្បន្នប្រធានស្តីទីគណបក្សសង្គ្រោះជាតិ) សុំលាលែងចេញពីគណបក្សសង្គ្រោះជាតិ។
លិខិតលោក អ៊ុក ស៊ុយ លើកមូលហេតុថា “ឯកឧត្តមប្រធាន ឯកឧត្តមអនុប្រធាន និងជាថ្នាក់ដឹកនាំក្នុងបក្សចំនួនបួនរូបទៀតដឹកនាំបក្សគ្មានសីលធម៌ និងគ្មានគុណធម៌មកលើថ្នាក់ដឹកនាំក្នុងបក្ស ជាពិសេសមកលើប្រជាពលរដ្ឋខ្មែររាប់លាននាក់ ដែលលោកបានខិតខំផ្តល់សេចក្តីទុកចិត្តឲ្យគណបក្សសង្គ្រោះជាតិកន្លងមក។ សេចក្តីដូចបានបញ្ជាក់ក្នុងកម្មវត្ថុ និងមូលហេតុខាងលើ ខ្ញុំជម្រាបជូនឯកឧត្តមប្រធាន ឯកឧត្តមអនុប្រធានថា ការដឹកនាំគណបក្សសព្វថ្ងៃនេះ ឯកឧត្ដមប្រធាន ឯកឧត្តមអនុប្រធានបានឃុបឃិតគ្នាជាមួយថ្នាក់ដឹកនាំក្នុងបក្សចំនួន៤រូបទៀត ប្រព្រឹត្តអំពើអយុត្តិធម៌ផ្ទៃក្នុងបក្សតែងតាំងមនុស្សចាប់ពីថ្នាក់ជាតិរហូតមកដល់ថ្នាក់រាជធានី/ខេត្ត-ក្រុង ស្រុក/ខណ្ឌ-ឃុំ/សង្កាត់ ហើយខ្ញុំក៏បានស្នើសុំឲ្យកែចរឹតដឹកនាំក្នុងពេលប្រជុំគណៈកម្មាធិការនាយកម្តងៗ ឯកឧត្តមប្រធាន ឯកឧត្តមអនុប្រធានយកអង្គប្រជុំរបស់គណៈកម្មាធិការនាយកគណបក្ស ទាត់លេងដូចបាល់ ជាពិសេសមិនគោរពសំដីរបស់ខ្លួន ដែលសន្យាមកលើប្រជាពលរដ្ឋខ្មែររាប់លាននាក់ថា មិនចូលរដ្ឋសភា តែទីបញ្ចប់ចូលដើម្បីយកតំណែង រីឯថាសំឡុតមិនខ្លាច គេមិនទាន់នឹងធ្វើអីផង គ្រាន់តែចេញដីកាកោះរត់បាត់អស់។
ទាក់ទងនិងការលើកឡើងនេះ លោក យ៉ែម បុញ្ញប្ញទ្ធិ មន្ត្រីអ្នកនាំពាក្យគណបក្សសង្គ្រោះជាតិ ធ្លាប់បានថ្លែងប្រាប់អ្នកសារព័ត៌មានថា “ជាធម្មតានៅពេលមានការចាកចេញ តែងតែមានការលើកឡើងពីហេតុផលនោះខ្លះហើយ ដែលជារឿងធម្មតា”។ ដោយឡែកកាលពីវេលាម៉ោង៩ព្រឹក ថ្ងៃទី១២ ខែធ្នូ ឆ្នាំ២០១៥ នេះ នៅស្នាក់ការកណ្ដាលគណបក្សសង្គ្រោះជាតិ ដែលមានទីតាំងស្ថិតនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ក៍បានធ្វើការកោះប្រជុំតំណាងរាស្ត្រ និងសកម្មជនទូរទាំងរាជធានី ខេត្ត ជាបន្ទាន់ក្រោមអធិបតី លោក កឹម សុខា ប្រធានស្តីទីគណបក្ស ហើយតាមខ្លឹមសារ គឺលោក កឹម សុខា បានប្រាប់ឲ្យតំណាងរាស្ត្រទាំងអស់ធ្វើការពង្រឹងសកម្មករជនគណបក្សរបស់ខ្លួនអោយបានល្អ ដោយលើកឡើងពីករណីពាក់ព័ន្ធរឿងសមាជិកសកម្មមួយនៅខេត្តឩត្តរមានជ័យ បានប្រកាសចូលរួមជាមួយគណបក្សប្រជាជនកម្ពុជា៕
អតីតសកម្មជនថា គណបក្សសង្គ្រោះជាតិនឹងរលាយ ដោយសារតែជំហរមិនច្បាស់លាស់របស់មេដឹកនាំ
0 Comments