បន្ទាយមានជ័យ ៖ ព្រឹកថ្ងៃទី១៨ ខែធ្នូ ឆ្នាំ២០១៥ លោក លី សារី អភិបាលរងខេត្តបន្ទាយមានជ័យបានដឹកនាំកម្លាំងជំនាញចុះពិនិត្យស្ទឹងសិរីសោភ័ណគ្រោង និង បិទស្ទឹងទុកទឹកសម្រាប់បម្រើតាមសេចក្តីត្រូវការរបស់ប្រជាពលរដ្ឋក្នុងខេត្តបន្ទាយមានជ័យក្នុងរដូវប្រាំងខាងមុខនេះ។
លោកលីសារីបានិយាយក្នុងការចុះពិនិត្យស្ទឹងនោះថាស្ទឹងសិរីសោភ័ណអាជ្ញាធរខេត្តគ្រោងនិងបិតនេះនៅចំណុចភូមិតាទុង សង្កាត់ភ្នៀត ក្រុងសិរីសោភ័ណខេត្តបន្ទាយមានជ័យ។ លោកលីសារីបានបញ្ជាក់ទៀតថា បន្ទាយមានជ័យសព្វថ្ងៃនេះប្រជាពលរដ្ឋកំពុងជួបគ្រោះខ្វះទឹករយៈពេល២ឆ្នាំមកហើយដោយបានការយកចិត្តទុកដាក់ពី លោកឧបនាយករដ្ឋមន្ត្រីកែ គឹមយ៉ាន ប្រធានក្រុមការងារថ្នាក់ជាតិចុះជួយខេត្តបន្ទាយមានជ័យលោកបានឲ្យអាជ្ញាធរថ្នាក់ខេត្តដោះស្រាយបញ្ហាទឹកជូនប្រជាពលរដ្ឋឲ្យបានគ្រប់គ្រាន់ឆ្នាំនេះ ទើបលោក លី សារី ដឹកនាំមន្ត្រីជំនាញចុះទៅពិនិត្យទឹកស្ទឹងសិរីសោភ័ណ នៅចំណុចតាទុង ដើម្បីគ្រោងចាក់ដីបិទទឹកស្ទឹងនេះស្តុបទឹកទុកសម្រាប់បម្រើសេចក្តីត្រូវការរបស់ប្រជាពលរដ្ឋកុំឲ្យខ្វះដូចឆ្នាំមុនទៀត។
លោក លី សារី បានបញ្ជាក់ថា ខេត្តបន្ទាយមានជ័យមានក្រុងសិរីសោភ័ណ និង ស្រុកមង្គលបូរីដែលប្រឈមខ្វះខាតទឹកសម្រាប់ប្រជាពលរដ្ឋប្រើប្រាស់រយៈពេល២ឆ្នាំហើយនៅឆ្នាំ២០១៤ដល់ ២០១៥ខេត្តបានដាក់វិធានការទប់ទឹកស្ទឹង ដើម្បីប្រជាពលរដ្ឋបានប្រើប្រាស់គ្រប់គ្រាន់នៅរដូវប្រាំងខាងមុខនេះ។
លោក ជា សុវណ្ណធួនអនុប្រធានមន្ទីរសាធារណការ និង ដឹកជញ្ជូនខេត្តបន្ទាយមានជ័យបាននិយាយថា ក្រុងសិរីសោភ័ណនៅឆ្នាំ ២០១៥គឺខ្វះទឹកប្រើប្រាស់នៅអំឡុងខែ៤តែនៅឆ្នាំ២០១៦នេះបើមិនមានវិធានការបិទស្ទឹងសិរីសោភ័ណទេ នៅអំឡុងខែ២ដល់៤អាចខ្វះទឹកប្រជាពលរដ្ឋប្រើប្រាស់ព្រោះទឹកស្ទឹងស្រក១ថ្ងៃ២ទៅ៣តឹកឯណោះ។ លោកបានសំណូមសុំឲ្យមន្ទីរធនធានទឹក និង ឧតុនិយមខេត្តត្រូវលើកគម្រោងកសាងសំណង់ស្ទាក់ទឹកឲ្យបាន២កន្លែងដើម្បីកុំឲ្យប្រជាពលរដ្ឋខ្វះទឹកប្រើប្រាស់បន្ត។
លោក ហួត តុងឡាយ ម្ចាស់ក្រុមហ៊ុនទឹកស្អាតសិរីសោភ័ណបាននិយាយថា ក្រុងសិរីសោភ័ណអ្នកប្រើប្រាស់ទឹក១ថ្ងៃអស់១៥.០០០ទៅ២០.០០០ម៉ែត្រគូបដោយមានការយកចិត្តទុកដាក់ថ្នាក់ដឹកនាំខេត្តបានទប់ទឹកស្ទឹងសិរីសោភ័ណនេះសង្ឃឹមថា ឆ្នាំ២០១៦នេះមិនខ្វះខាតដូចឆ្នាំ២០១៥ឡើយ៕
លោក លី សារី ដឹកនាំមន្ត្រីជំនាញចុះពិនិត្យស្ទឹងសិរីសោភ័ណគ្រោងនឹងបិទស្ទឹងទុកទឹកសម្រាប់បម្រើសេចក្តីត្រូវការរបស់ប្រជាពលរដ្ឋ
0 Comments