ភ្នំពេញ ៖ រថយន្តHILUX VIGO បើកបរដោយបុរសម្នាក់ស្ថិតនៅក្នុងសភាពស្រវឹង បានបើកក្នុងល្បឿនលឿន ហើយជ្រុលទៅបុករបាំងថ្មចែកទ្រូងផ្លូវ ពេញទំហឹង បណ្ដាលឲ្យបាក់អស់៧កង ប៉ុន្តែសំណាងល្អមិនបណ្ដាលឲ្យនរណាម្នាក់រងគ្រោះថ្នាក់ឡើយ។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ១១នឹង១០នាទីយប់ថ្ងៃទី១៧ ខែធ្នូ ឆ្នាំ២០១៥ នៅចំណុច មុខក្រសួងដែនដីនគរោបនីយកម្ម និងសំណង់ តាមបណ្ដោយផ្លូវព្រះមុនីវង្ស ស្ថិតក្នុងសង្កាត់ទន្លេបាសាក់ ខណ្ឌចំការមន។
សាក្សីបានឱ្យដឹងថា មុនពេលកើតហេតុគេបានឃើញរថយន្តHILUX VIGO ពណ៌ទឹកប្រាក់ ពាក់ស្លាកលេខ ភ្នំពេញ 2Y-4636 បើកបរដោយបុរសវ័យជាង៣០ឆ្នាំ ម្នាក់ទំនងជាស្រវឹងស្រាបានបើកតាមបណ្ដោយផ្លូវព្រះមុនីវង្ស ទិសដៅពីត្បូងទៅជើង ក្នុងល្បឿនយ៉ាងលឿនពេលមកដល់ចំណុចកើតហេតុបានបុករបាំងថ្មពុះចែកទ្រូងផ្លូវពេញទំហឹងបណ្ដាលឱ្យបែកខ្ទេចចំនួន៧កង់ ខ្ទាត រាយប៉ាយពេញផ្លូវ ប៉ុន្តែសំណាងល្អមិនបណ្ដាលឲ្យនណាម្នាក់រងគ្រោះថ្នាក់នោះទេ។
ចំណែករថយន្តបានរងការខូចខាតយ៉ាងដំណំ។ ក្រោយពីបង្កហេតុអ្នកបើករថយន្ត បង្កបានគេចខ្លួនបាត់ដោយបន្សល់ទុកតែរថយន្តនៅនឹងកន្លែងកើតហេតុហើយសមត្ថកិច្ចជំនាញបានចុះមកធ្វើការវាស់វែងនិងស្ទូចយករថយន្តបង្កទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយតាមផ្លូវច្បាប់ ៕
ស្រវឹងស្រាបើករថយន្តបុករបាំងចែកទ្រូងផ្លូវបាក់អស់៧កង់ សំណាងល្អអត់មានអ្នករបួស
0 Comments