ភ្នំពេញ៖ អង្គការ One World UK រួមជាមួយនឹងនាយកដ្ឋានសុខភាពសិក្សា នៃក្រសួងអប់រំ យុវជន និងកីឡា សមាគមអភិវឌ្ឍន៍សុខភាពប្រជាជនអង្គការបណ្តាញទូរស័ព្ទជំនួយកុមារកម្ពុជា សមាគមឥន្ទធនូ និងអង្គការសម្ព័ន្ធពាណិជ្ជកម្មកម្ពុជាប្រយុទ្ធនឹងជំងឺអេដស៍ បានរៀបចំពិធីផ្សព្វផ្សាយលទ្ធផល និងបទពិសោធន៍ ស្តីពីការអនុវត្តសាកល្បងគម្រោង”យុវជនវ័យឆ្លាត អនាគតល្អ” នាព្រឹកថ្ងៃទី១៨ ខែធ្នូនេះ នៅសណ្ឋាគារអីនធ័រកុងទីណង់តាល់។
យុវជនវ័យឆ្លាត អនាគតល្អជាគម្រោងសិទ្ធិសុខភាពបន្តពូជ និងសុខភាពផ្លូវភេទយុវវ័យ។ គម្រោងនេះរួមបញ្ចូលនូវការចងក្រង និងការអនុវត្តប្រព័ន្ធរៀនតាមអេឡិចត្រូនិក ដោយផ្អែកលើកម្មវិធីសិក្សាបំណិនជីវិតរបស់ក្រសួងអប់រំ យុវជននិងកីឡា និងប្រព័ន្ធសេវាកម្មសំនួរ និងចម្លើយដែលអាចទទួលបានព័ត៌មានទទួលបានព័ត៌មានតាមរយៈទូរស័ព្ទដៃចល័ត និងអីនធ័រណេត ដែលអាចឲ្យយុវជនសួរទាក់ទងនឹងបញ្ហាសុខភាពបន្តពូជ សុខភាពផ្លូវភេទ ដោយមិនវិនិច្ឆ័យ រក្សាការសម្ងាត់ និងត្រឹមត្រូវ។ គម្រោងនេះត្រូវបានសម្ពោធកាលពីថ្ងៃទី ២៨ ខែមីនា ឆ្នាំ ២០១៤កន្លងមក ជាមួយគោលបំណងលើកទឹកចិត្តដល់យុវជនស្វែងរកព័ត៌មាន និងរៀនសូត្រពីយេនឌ័រ បញ្ហាសុខភាពបន្តពូជ សុខភាពផ្លូវភេទ បញ្ហាសិទ្ធិ ដោយប្រើប្រាស់កម្មវិធីបំណិនជីវិតតាមបច្ចេកវិទ្យាព័ត៌មាន ជាកម្មវិធីបែបអប់រំកម្សាន្ត។
តាមរបាយការណ៍របស់គម្រោងយុវជនវ័យឆ្លាត អនាគតល្អបានបង្ហាញថា កម្ពុជាជាប្រទេសសំបូរទៅដោយយុវជនវ័យក្មេងយ៉ាងច្រើន ដែលមានច្រើនជាង ៦០% នៃចំនួន ប្រជាជនសរុប ហើយក្នុងនោះប្រហែល ៣២%មានអាយុក្រោម ១៥ឆ្នាំ។ ដោយភាគច្រើននៃប្រជាជនវ័យក្មេងឆាប់ប្រឡូកក្នុងទំនាក់ទំនងផ្លូវភេទ ធ្វើឲ្យយុវជនភាគច្រើនជាពិសេសក្មេងស្រី មានហានិភ័យខ្ពស់ ហើយយុវជនភាគច្រើនមិនហ៊ានទៅរកព័ត៌មាន និងសេវាសុខភាពបន្តពូជ និងផ្លូវភេទ។
កម្មវិធីយុវជនឆ្លាតនេះ បានប្រើប្រាស់បច្ចេកវិទ្យាទំនើប ដូចជាទូរស័ព្ទដៃ និងការសិក្សា តាមប្រព័ន្ធអេឡិចត្រូនិក ដើម្បីផ្តល់ព័ត៌មានដែលត្រឹមត្រូវ និងបង្កើនចំណេះដឹងទាក់ទិន និងប្រធានបទដ៏រសើបនេះ មានដូចជា ជំងឺកាមរោគ មេរោគហ៊ីវ ការមានផ្ទៃពោះដោយចៃដន្យ និងការរំលូតកូនដោយគ្មានសុវត្ថិភាព៕
ផ្សព្វផ្សាយលទ្ធផល និងបទពិសោធន៍ ស្តីពីការអនុវត្តសាកល្បងគម្រោង "យុវជនវ័យឆ្លាត អនាគតល្អ"
0 Comments