សៀមរាប ៖ ការអនុវត្តដីការបស់ព្រះរាជអាជ្ញារងអមសាលាដំបូងខេត្តសៀមរាប រួមជាមួយកម្លាំងអាវុធហត្ថ និងអាជ្ញាធរមូលដ្ឋានកាលពីព្រឹកថ្ងៃទី១៨ ខែធ្នូ ក្នុងការរឹបអូសយកផ្ទះរបស់កូនបំណុលដើម្បីយកលុយសងម្ចាស់បំណុលនោះ មិនបានសម្រេចនោះទេ។
សេចក្ដីរាយការណ៍បានឲ្យដឹងថា ការអនុវត្តមិនបានសម្រេចនេះ ដោយសារតែមានការយំស្រែកពីសំណាក់ម្ចាស់ផ្ទះជាកូនបំណុល ព្រមទាំងមានប្រជាពលរដ្ឋជាច្រើនបានមកជួយតវ៉ាធ្វើឲ្យមានភាពរញ៉េរញ៉ៃជាខ្លាំងជាហេតុធ្វើឲ្យកងកម្លាំងចុះអនុវត្តដីកាទាំងអស់សម្រេចដកថយមួយគ្រាសិននៅវេលាម៉ោង១១ព្រឹកថ្ងៃដដែលនេះ។
គួរបញ្ជាក់ថា កាលពីព្រឹកថ្ងៃទី១៨ ខែធ្នូ ឆ្នាំ២០១៥នេះ លោកថេង សំណាង ព្រះរាជអាជ្ញារងអមសាលាដំបូងខេត្តសៀមរាប បានដឹកនាំកម្លាំងកងរាជអាវុធហត្ថ ប៉ុស្តិ៍មូលដ្ឋាន និងអាជ្ញាធរមូលដ្ឋានបានចុះអនុវត្តដីការឹបអូសផ្ទះកូនបំណុលមួយកន្លែងដើម្បីលក់ យកលុយសងម្ចាស់បំណុលនៅចំណុចភូមិបន្ទាយចាស់ សង្កាត់ស្លក្រាម ក្រុង-ខេត្តសៀមរាប។ ប៉ុន្តែមានភាពចម្រូងចម្រាសយ៉ាងខ្លាំង ដោយកូនបំណុលធ្វើការតវ៉ាមិនព្រមប្រគល់ផ្ទះរបស់ខ្លួន ឲ្យលក់ឡាយឡុងជាដាច់ខាត ដោយពួកគាត់លើកឡើងថា បើជំពាក់លុយត្រូវសងលុយ មិនមែនសងផ្ទះនោះទេ។ ភាពចម្រូងចម្រាសនេះបានបន្តរហូតមកដល់ម៉ោង១១ព្រឹកថ្ងៃដដែលនេះ ទើបកងកម្លាំង ដែលចុះអនុវត្តនេះសម្រេចដកថយមួយគ្រាសិនតែម្ដង។
ផ្ទះខាងលើនេះ ត្រូវបានអំណាចតុលាការ លក់ឡាយឡុង ឲ្យទៅឈ្មោះផឹង ដិន តាំងពីថ្ងៃ២៦ ខែមករា ឆ្នាំ២០១៥ ប៉ុន្តែទើបតែចុះអនុវត្តដីកានៅថ្ងៃនេះ ធ្វើឲ្យមានភាពចម្រូងចម្រាសជាខ្លាំងរវាងភាគីចុះអនុវត្ត និងម្ចាស់ផ្ទះឡាក់គីតា ជាកូនបំណុល។ លើសពីនេះ ផ្ទះនោះត្រូវបានឈ្មោះផឹង ដិន ភេទប្រុស ទិញ និងបានធ្វើប្លន់ផ្ទេរផ្ទះនេះរួចរាល់អស់ហើយផងដែរ។
បើតាមការសាកសួរម្ចាស់ផ្ទះជាកូនបំណុលនោះ បានជំពាក់ម្ចាស់បំណុលចំនួន៦នាក់ផ្សេងៗគ្នា រហូតមកដល់ពេលនេះរយៈពេលប្រហែល៣ឆ្នាំមកហើយ ប៉ុន្តែម្ចាស់ផ្ទះជាកូនបំណុល បានអះអាងថា កន្លងមកក៏មានការសម្របសម្រួលសងអស់២៤០០ដុល្លារផងដែរ នៅសល់តែ៥១០០ដុល្លារទៀតប៉ុណ្ណោះ៕
សម្រែកទ្រហោយំ និងសំឡេងតវ៉ា ធ្វើឲ្យការអនុវត្តដីការឹបអូសផ្ទះត្រូវបរាជ័យ
0 Comments