ស្ទឹងត្រែង ៖ រថយន្តរាប់សិបគ្រឿងបានកកស្ទះលើកំណាត់ផ្លូវជាតិលេខ៧ ខណៈដែលក្រុមជញ្ជីងដឹកលើសទម្ងន់កំណត់បានធ្វើការរឹតបន្តឹង។ តែការរឹតបន្តឹងនេះត្រូវបានប្រជាពលរដ្ឋថា គ្រាន់តែធ្វើឲ្យល្អមើលតែប៉ុណ្ណោះ ខណៈផ្លូវជាតិលេខ៧មួយខ្សែបានរលាយបាត់អស់។ បច្ចុប្បន្នផ្លូវជាតិលេខ៧បានសាងសង់ថ្មីជិតរួចរាល់ហើយ។
ករណីបង្កឲ្យមានការកកស្ទះរថយន្តរាប់សិបគ្រឿងក្នុងការរឹតបន្តឹងពីការដឹកលើសទម្ងន់កំណត់នេះបានកើតឡើងនៅយប់ថ្ងៃទី១៦ ខែធ្នូ ឆ្នាំ២០១៥ លើកំណាត់ផ្លូវជាតិលេខ៧ ត្រង់ចំណុចជិតអូរពងមាន់ ប្រហែល១គីឡូ ស្ថិតក្នុងភូមិរាជានុកូ សង្កាត់/ក្រុង/ខេត្តស្ទឹងត្រែង។ ផ្លូវជាតិលេខ៧ បានស្ថាបនារួចរាល់នៅឆ្នាំ២០០៦ និងសម្ពោធដាក់ឲ្យប្រើប្រាស់ ក្រោមអធិបតេយ្យភាពរបស់ប្រមុខរាជរដ្ឋាភិបាលកម្ពុជា។
ក្នុងរយៈពេលដាក់ឲ្យប្រើប្រាស់នោះ ក៏មានការដាក់ជញ្ជីងថ្លឹងរថយន្តលើសទម្ងន់កំណត់នៅចំណុចអូរពងមាន់ឲ្យត្រូវស្តង់ដារទម្ងន់រថយន្ត និងផ្លូវថ្នល់ផងដែរ។
តែទោះជាយ៉ាងណា ការដាក់នេះ ពេលខ្លះ បានថ្លឹង និងពេលខ្លះបានផាកពិន័យ តែការថ្លឹងបានតិចតួចបំផុត រីឯការបង់លុយឲ្យក្រុមជញ្ជីងវាច្រើនជាង ទើបធ្វើឲ្យផ្លូវជាតិមួយនេះរងការខូចខាតទាំងស្រុង។
ក្នុងរយៈពេលនោះ ផ្លូវបានរងការខូចខាត ជញ្ជីងថ្លឹងរថយន្តលើសទម្ងន់កំណត់នៅចំណុចអូរពងមាន់បានផ្អាកមួយរយៈ និងបានស្ថាបនាកន្លែងថ្លឹងរថយន្តថ្មីនៅចំណុចខាងលើ។ ក្រោយពីក្រុមជញ្ជីងដាក់អស់ពេលជាច្រើនខែរួចមក ប្រជាពលរដ្ឋថា មិនដែលឃើញមានការរឹតបន្តឹងដូចថ្ងៃនេះទេ ឃើញតែរថយន្តធុនយក្សដឹកទំនិញ និងដឹកឈើលេចៗទ្រង់ធ្វើចរាចរណ៍យ៉ាងរលូន ពេលនេះសង្ស័យថាអាចមកពីការចរចាគ្នាមិនត្រូវហើយមើលទៅ? ទើបធ្វើឲ្យមានការកកស្ទះរថយន្តច្រើនបែបនេះ។
ការរឹតបន្តឹងរថយន្តដឹកលើទម្ងន់កំណត់ធ្វើឲ្យរថយន្តរាប់សិបគ្រឿងបានកកស្ទះ និងបានធ្វើឲ្យម្ចាស់រថយន្តខ្លះដាច់បាយ រហូតមានការប្រតិកម្ម ហើយពួកគាត់បានលើកឡើងថា ពួកគាត់បានធ្វើការដឹកជញ្ជូនកសិផលទៅមករហូត និងបានបង់លុយទៅឲ្យក្រុមជញ្ជីងចាប់ពី៥ម៉ឺន រហូត១៥ម៉ឺនរៀល ទៅតាមរថយន្តតូចធំ មិនដែលមានបញ្ហាអីទេ តែពេលនេះ បែរជាកាក់រថយន្តដើម្បីថ្លឹង និងធ្វើការពិន័យទៀតផង ទើបធ្វើឲ្យម្ចាស់រថយន្តខឹង ខ្លះបានយករថយន្តដាក់កាត់ផ្លូវធ្វើឲ្យមានការកកស្ទះចរាចរណ៍ទៀតផង។
ក្រោយពីមានបញ្ហានេះបានកើតឡើងពិបាកក្នុងការដោះស្រាយ អភិបាលខេត្តស្ទឹងត្រែងលោក កុល សអុល បានបញ្ជាឲ្យកម្លាំងនគរបាល និងកម្លាំងកងរាជអាវុធហត្ថខេត្ត ចុះមកធ្វើការអន្តរាគមន៍ដើម្បីធ្វើការសម្របសម្រួលឲ្យស្ថានការណ៍នេះល្អប្រសើរឡើងវិញ និងបានបញ្ជាឲ្យកម្លាំងជំនាញ កុំផាកពិន័យ គ្រាន់តែធ្វើកិច្ចសន្យាចំពោះរថយន្តណាដែលដឹកលើសទម្ងន់ បញ្ឈប់ការដឹកលើសបន្តទៀត បើសិនជានៅតែល្មើសនោះ ជំនាញនឹងចាត់វិធានការតាមផ្លូវច្បាប់។
ប្រជាពលរដ្ឋដែលឃើញហេតុការណ៍បានលើកឡើងថា បើសិនជាការអនុវត្តច្បាប់វិញនោះ កុំគ្រាន់តែធ្វើឲ្យល្អមើលតែមួយភ្លែត រួចបាត់ឈឹងទៅនោះ ផ្លូវជាតិពិតជាមិនបានយូរអង្វែងទេ វាងាយនឹងរងការខូចខាតណាស់ ហើយពួកគាត់ត្រូវចំណាយពេលវេលាយូរ ថវិកាជាតិជាច្រើនត្រូវខាតបង់អត់ប្រយោជន៍ ចំណេញតែបុគ្គលខិលខូចមួយក្តាប់តូចតែប៉ុណ្ណោះ៕
រឹតបន្តឹងការដឹកលើសទម្ងន់កំណត់ ធ្វើឲ្យរថយន្តរាប់សិបគ្រឿងកកស្ទះ
0 Comments