បាត់ដំបង ៖ សពបុរសម្នាក់ដែលរក្សាទុកនៅក្នុងទីអារាមមួយយប់ទៅហើយ នៅតែមិនទាន់ស្គាល់អត្តសញ្ញាណ គឺដោយសារតែមានការប៉ះទង្គិចគ្នា រវាងម៉ូតូ ជាមួយនឹងរថយន្តដឹកមាន់ ទា ខណៈដែលរថយន្តនោះបានបើកបរក្នុងល្បឿនលឿន ហើយបានព្យាយាមបើកគេចរោងការទៅខាងឆ្វេង ទើបបណ្តាលឲ្យបុកទៅលើម៉ូតូ ដែលកំពុងបើកបរច្រាសទិសយ៉ាងពេញទំហឹងតែម្តង។
ហេតុការណ៍នេះបានកើតឡើង កាលពីវេលាម៉ោង៦និង៤៥នាទី ព្រលប់ថ្ងៃទី៤ ខែធ្នូ ឆ្នាំ២០១៥ស្ថិតក្នុងភូមិរំចេក៣ សង្កាត់រតនៈ ក្រុងបាត់ដំបង ខេត្តបាត់ដំបង រវាងរថយន្តដឹកមាន់ ទាធុន២តោនកន្លះ ពាក់ស្លាកលេខ កំពង់ចាម 2A-1867 ជាមួយនឹងម៉ូតូម៉ាកឌ្រីម០៦ពណ៌ខ្មៅ ពាក់ស្លាកលេខ បាត់ដំបង 1A-6546 ក្នុងទិសដៅច្រាស់គ្នា។
តាមប្រភពពីកន្លែងកើតហេតុ បានឲ្យដឹងថា នៅមុនពេលគ្រោះថ្នាក់ចរាចរនោះកើតឡើង គឺមានរថយន្តមួយគ្រឿងសម្រាប់ដឹកមាន់ ទា បានបើកបរយ៉ាងលឿនក្នុងទិសដៅពីជើងទៅត្បូង ។ លុះទៅដល់ត្រង់ចំណុចកើតហេតុ ដែលនៅទីនោះ គឺមានរោងការមួយដែលត្រូវបានសាងសង់ឡើងនៅលើចំណែកផ្លូវមួយផ្នែក ដែលធ្វើឲ្យរថយន្តនេះ ត្រូវព្យាយាមបើកគេច ពីរោងការនោះហើយបានយកចង្កូតទៅខាងឆ្វេង គាប់ជួនពេលនោះដែរ ក៏មានម៉ូតូមួយគ្រឿងដែលកំពុងបើកបរក្នុងទិសដៅច្រាស់គ្នា បានបុកយ៉ាងពេញទំហឹងទៅលើក្បាលរថយន្តធ្វើឲ្យអ្នកបើកបរម៉ូតូរងគ្រោះទៅលើផ្ទៃមុខនឹងដើមទ្រូងស្លាប់ភ្លាមមួយរំពេច។
ភ្លាមៗនោះដែរក្រោយពេលដែលសមត្ថកិច្ចចរាចរបានចុះទៅដល់ គឺអ្នកបើកបររថយន្តបានរត់គេចខ្លួនបាត់ស្រមោលទាំងយប់បាត់ទៅហើយ ដោយបន្សល់តែសពជនរងគ្រោះ ដែលគ្មានអ្នកណាស្គាល់អត្តសញ្ញាណឡើយ ទើបសមត្ថកិច្ចបានសម្រេចយកសពទៅផ្ញើ នៅក្នុងទីអារាម វត្តសូភី ជាបណ្ដោះអាសន្នសិន ដើម្បីរង់ចាំក្រែងមានបងប្អូន ឬសាច់ញាតិណាមករក ចំណែកមធ្យោបាយធ្វើដំណើរទាំងពីរគ្រឿងក៏បាននាំយកទៅរក្សាទុក នៅការិយាល័យចរាចរផ្លូវគោកដែររង់ចាំធ្វើការដោះស្រាយជាក្រោយ។ បច្ចុប្បន្នរហូតមកទល់ នឹងម៉ោង៩ព្រឹក ថ្ងៃទី៥ ខែធ្នូ ក៏នៅតែមិនមាននរណាម្នាក់បានស្គាល់អំពីអត្តសញ្ញានសពបុរសម្នាក់នេះឡើយ៕
បើកលឿនហើយគេចរោងការ ទៅព្រលះម៉ូតូស្លាប់នៅនឹងកន្លែង
0 Comments